លោកនាយករដ្ឋមន្រ្តីហ៊ុន សែន បានរិះគន់ចំៗ ទៅកាន់ឯកអគ្គរដ្ឋទូតអាមេរិកប្រចាំនៅកម្ពុជា គឺលោក វិលាម ហៃត៍(William A. Heidt ) ថាមិនចេះធ្វើការងារផ្នែករដ្ឋបាល ទាក់ទងនិងការប្រកាសកាត់ជំនួយដល់រដ្ឋាភិបាលកម្ពុជា។
លោក នាយករដ្ឋមន្រ្តីហ៊ុន សែន រិះគន់ចំៗបែបនេះនៅចំពោះមុខកម្មកររោងចក្រប្រមាណជាង ២ម៉ឺននាក់ក្នុងពិធីជួបសំណេះសំណាលនាថ្ងៃទី ០៣ ខែ មីនា នេះក្នុងទឹកដីក្រុងព្រះសីហនុ។
លោក ហ៊ុន សែន បានលើកឡើងដោយរិៈគន់ថា៖« ណោតទូតធម្មតាគេសរសេរទៅក្រសួងការបរទេស ទូតនេះ(អាមេរិក) ផ្ញើទៅអគ្គនាយកដ្ឋានពន្ធដារ។ គ្រាន់តែទម្លាប់ទូតក៏ខុសដែរ អគ្គនាយកដ្ឋានពន្ធដារវានៅក្រោមក្រសួងសេដ្ឋកិច្ចហិរញ្ញវត្ថុទៅទៀត។ បើថាមិនចេះកិច្ចការទូតទេ គួរតែរៀនឡើងវិញ។ ចឹងបានខ្ញុំចេះតែនិយាយថា អ្នកខ្លះគ្រាន់តែកើតនៅប្រទេសអ្នកមានប៉ុននឹង តែក៏មិនមែនខួរក្បាល ខ្លាំងជាងយើងអ្នកក្រដែរ »។
លោក ហ៊ុន សែន បានហៅឯកអគ្គរដ្ឋទូតនោះថាជា«អគ្គរដ្ឋទូតភូតកុហក» ព្រោះលោក ហ៊ុន សែនថាអាមេរិកបានបញ្ចប់ជំនួយរបស់ខ្លួនមកកម្ពុជាតាំងពី ២០១៦ ហើយទើបតែប្រកាសកាត់នៅពេលនេះ ដែលលោកហៅថាជា«ជំនួយខ្យល់» ដែលជារឿងទាក់ទងនឹងនយោបាយ។
ជាមួយគ្នានោះលោកហ៊ុន សែនក៏ជំរុញឲ្យលោកឯកអគ្គរដ្ឋទូតវិលាម ហៃត៍ ធ្វើការបកស្រាយឲ្យបានច្បាស់ផងនូវអ្វីដែលលោកថាជាការផ្ដាច់ជំនួយមកកាន់កម្ពុជា។
កាលពីថ្ងៃទី ២៧ ខែ កុម្ភះ រដ្ឋាភិបាលអាមេរិកចេញសេចក្ដីថ្លែងការណ៍ប្រកាសថា ខ្លួននឹងព្យួរ ឬបិទកម្មវិធីជំនួយយោធា កម្មវិធីជំនួយ USAID និងមូលនិធិជាច្រើនទៀត ប៉ុន្តែថា នឹងបន្តជួយគម្រោងជាច្រើនដើម្បីគាំទ្រដល់ប្រជាជនកម្ពុជា។
រដ្ឋាភិបាលអាមេរិកលើកឡើងថាការសម្រេចផ្អាកជំនួយជាច្រើនផ្ដល់មកកម្ពុជាគឺ ឆ្លើយតបទៅនិងអ្វីដែលអាមេរិកហៅថា ធ្វើឲ្យលទ្ធិប្រជាធិបតេយ្យនៅក្នុងប្រទេសកម្ពុជាដើរថយក្រោយ។
ក្នុងសេចក្ដីថ្លែងការណ៍ដដែលនោះសហរដ្ឋអាមេរិកថា ក្នុងរយៈពេល ២៥ឆ្នាំកន្លងមកនេះ សហរដ្ឋអាមេរិកជាដៃគូអភិវឌ្ឍដ៏ល្អនៅកម្ពុជា ហើយបានជួយកម្ពុជា គិតជាទឹកប្រាក់ជាង ១ពាន់លានដុល្លារក្នុងការលើកស្ទួយការលូតលាស់ផ្នែកសេដ្ឋកិច្ច សង្គម និងប្រជាធិបតេយ្យ៕
