រដ្ឋមន្រ្តីក្រសួងការបរទេសកម្ពុជាបានលើកឡើងថា អធិបតេយ្យភាពរបស់កម្ពុជាត្រូវបានគំរាមកំហែងដោយរដ្ឋាភិបាលបរទេស និង អង្គការមិនមែនរដ្ឋាភិបាលមួយចំនួន ជុំវិញការបង្រ្កាបលើបក្សសង្គ្រោះជាតិកាលចុងឆ្នាំ ២០១៧។
រដ្ឋមន្រ្តីក្រសួងការបរទេសលោក ប្រាក់ សុខុន បានលើកឡើងបែបនេះនៅក្នុងសុន្ទរកថាក្នុងពិធីបើកសន្និបាតបូកសរុបការងារឆ្នាំ ២០១៧ និង ទិសដៅការងារឆ្នាំ ២០១៨ របស់ក្រសួងការបរទេសកាលពីថ្ងៃទី ២៨ ខែកុម្ភះ។
លោក ប្រាក់ សុខុន បានលើកឡើងថា៖ «អធិបតេយ្យជាតិរបស់យើងត្រូវបានគំរាមកំហែង ដោយសាររដ្ឋាភិបាលបរទេសមួយចំនួន អង្គការក្រៅរដ្ឋាភិបាលបរទេស និងអង្គការជាតិខ្លះ ដែលទទួលឥទ្ធិពលពីរដ្ឋាភិបាលបរទេសទាំងនោះ ជ្រៀតជ្រែកចូលកិច្ចការផ្ទៃក្នុងរបស់យើង»។
លោក ប្រាក់ សុខុនបន្តថា រយៈពេលប៉ុន្មានខែចុងក្រោយនេះ ប្រទេសកម្ពុជាទទួលរងនូវការរិះគន់ ចោទប្រកាន់ពីរដ្ឋាភិបាលលោកខាងលិចមួយចំនួន ជុំវិញអ្វីដែលពួកគេថាជាការបង្រ្កាបពីសំណាក់រដ្ឋាភិបាលទៅលើបក្សប្រឆាំង សារព័ត៌មានឯករាជ្យ និង សង្គមស៊ីវិល។
លោកប្រាក់ សុខុន លើកឡើងបន្តថា ជាការឆ្លើយតបទៅនឹងការចោទនេះ ក្រសួងការបរទេសបានចេញផ្សាយឯកសារមួយចំនួន ដូចជា «ប្រាប់ពីការពិត (To Tell The Truth)» ឯកសារ «កម្ពុជា៖ ស្ថិរភាព និងការអភិវឌ្ឍជាអតិភាព (Cambodia: Stability and Development First) ដែលបកស្រាយពីការលំបាករបស់កម្ពុជា ក្នុងការថែរក្សាសន្តិភាព និងជំរុញការអភិវឌ្ឍ។
រដ្ឋាភិបាលកម្ពុជារងការរិះគន់ និង ដាក់សម្ពាធពីប្រទេសលោកខាងលិចបែបនេះ បន្ទាប់ពី គណបក្សសង្គ្រោះជាតិត្រូវបានតុលាការកំពូលសម្រេចរំលាយចោលកាលពីថ្ងៃទី ១៦ ខែ វិច្ឆិកា ហើយប្រធានបក្សលោក កឹម សុខា ត្រូវរងការឃុំខ្លួន ដោយរដ្ឋាភិបាលចោទថាមានទោសក្បត់ជាតិ ឃិបឃិតជាមួយបរទេសប៉ុនប៉ងផ្ដួលរលំរដ្ឋាភិបាលស្របច្បាប់។
ជាមួយគ្នានោះប្រទេសលោកខាងលិចមានសហគមន៍ មានអាល្លឺម៉ង់ ស៊ុយអ៊ែត និង សហរដ្ឋអាមេរិកជាដើម បានដាក់ទណ្ឌកម្ម និង ព្រមានពីការដើរថយក្រោយនៃលទ្ធិប្រជាធិបតេយ្យនៅកម្ពុជា ហើយជំរុញឲ្យរដ្ឋាភិបាលកម្ពុជាស្ដារលទ្ធិប្រជាធិបតេយ្យឡើងវិញ ដើម្បីឈានទៅរកការបោះឆ្នោតដោយត្រឹមត្រូវ និង យុត្តិធម៌ នាពេលខាងមុខ ៕
