ប្រជាសហគមន៍ដីធ្លី ខេត្តកោះកុង អះអាងថា អាជ្ញាធរបានចុះដកផ្ទាំងរូបភាពដែលទាមទាឲ្យដោះលែងមន្ត្រីសិទ្ធិមនុស្សនិងមន្ត្រី គ.ជ.ប ចេញពីជញ្ជាំងផ្ទះរបស់ពួកគេ ដោយថា ការដាក់រូបនេះបង្កអសន្តិសុខសង្គម។
កាលពីម្សិលមិញអាជ្ញាធរខេត្តកោះកុងក៏បានចុះទៅដកផ្ទាំងរូបភាពទាំងនោះ ចេញពីទីស្នាក់ការសមាគមសិទ្ធិមនុស្សអាដហុក និងអង្គការពីរទៀត ដោយអះអាងថា ពួកគេបានដាក់ផ្ទាំងរូបភាពដោយគ្មានការអនុញ្ញាត្តិ។
តំណាងសហគមន៍ដីធ្លីនៅឃុំជីខក្រោម ស្រុកស្រែអំបិល អ្នកស្រី ផាវ ញឺង ប្រាប់វីអូឌីថា នៅថ្ងៃនេះ អាជ្ញាធរបានចុះមកដកផ្ទាំងរូបភាពដែលបិតនៅជញ្ជាំងផ្ទះនិងមុខផ្ទះ នៅភូមិព្រែកជីក ឃុំជីខក្រោម ស្រុកស្រែកអំបិល ដែលសុំឲ្យដោះលែងមន្ត្រីការពារសិទ្ធិមនុស្ស ៤ រូប មន្រ្តី គ.ជ.ប ដែលកំពុងជាប់ពន្ធនាគារនោះ។ អ្នកស្រីបន្តថា បានជាពួកគាត់បិតរូបមន្ត្រីសង្គមស៊ីវិល នៅជាប់ជញ្ជាំផ្ទះនោះ ដោយសារពួកគាត់យល់ថា អ្នកជាប់ឃុំទាំង៥ រូបនោះមិនមានទោសកំហុសដូចការចោទប្រកាន់តុលាការឡើយ។
អ្នកស្រីថា «គ្រាន់តែពួកខ្ញុំទាមទារឲ្យដោះលែងគាត់មិនទោសអីទេ តើវាខុសអីខ្ញុំសួរចឹង គាត់ថា អត់មានទោសកំហុសអីទេ អី ប៉ុន្តែសូមឲ្យដោះផ្លាកនឹងចេញសិន ព្រោះអីគាត់មកពីប្រជុំពីកោះកុងមិញគេឲ្យដោះ។ ខ្ញុំសួរគេ ជាអ្នកណាគាត់ថាថ្នាក់លើ ខ្ញុំថាខ្ញុំសូមជួបថ្នាក់លើចឹងគាត់ឲ្យអធិការស្រុកស្រែកអំបិលឈ្មោះ ម៉ា ទី ជួបខ្ញុំ ហើយខ្ញុំសួរទៅគាត់ថាអត់មានហេតុផលអីផង កាលណាដែលដាក់ចឹងធ្វើឲ្យមានបញ្ហា អសន្តិសុខសង្គម ហើយមានបញ្ហាអ៊ួអាប់ កុំឲ្យបញ្ហាកើតឡើងសូមឲ្យដោះតែប៉ុណ្ណឹងទេ»។
អ្នកស្រីសម្ដែងការខកចិត្ត ចំពោះអាជ្ញាធរដែលបានចុះដកផ្ទាំងរូបដែលពួកគាត់នោះ។
អ្នកស្រីថា «ពួកខ្ញុំសោកស្ដាយ ដោយសារតែខ្ញុំអត់យល់ទេ ពីសង្គមបច្ចុប្បន្ន អាដំណោះស្រាយដីធ្លីអត់ដោះឲ្យពួកខ្ញុំ ប៉ុន្តែនៅពេលដែលពួកខ្ញុំលើកបដាទាមទារ រឿងដែលអយុត្តិធម៌អីមួយគឺ ត្រូវមកជួបបញ្ហាត្រូវឲ្យមកស្រាយ ត្រូវបានដកហូតចឹង»។
អធិការនគរបាលស្រុកស្រែកអំបិល លោក ម៉ា ទី មានប្រសាសន៍ថា ការមិនអនុញ្ញាត្តបិទរូបមន្ត្រីសង្គមស៊ីវិលនៅតាមផ្ទះនោះ ដោយខ្លាចប៉ះពាល់សណ្ដាប់ធ្នាប់សាធារណៈ។
លោកថា «ព្រោះអានេះវាជាការត្រួតពិនិត្យសន្តិសុខសណ្ដាប់ធ្នាប់ក្នុងមូលដ្ឋាន ចឹងការបិតនេះគឺនៅក្នុងមូលដ្ឋាន ខ្ញុំមិនមានចាប់ចងមនុស្សអីទេ ក្នុងខេត្តក្នុងស្រុកហ្នឹង។ ចឹងខ្ញុំបានប្រាប់គាត់ថា បើចង់បិតទេអាហ្នឹងយើងលើកបដាទាមទារគឺត្រូវទាមទារនៅកន្លែងដែលគេចាប់ដែលគេចងនឹងទៅ យើងកុំចេះតែលើកចឹង អាហ្នឹងវាខូចសណ្ដាបធ្នាប់នៅក្នុងមូលដា្ឋនអាហ្នឹងវាត្រូវអត់ឲ្យលើកចឹងហើយ»។
មន្ត្រីសម្របសម្រួលនៃអង្គការលីកាដូប្រចាំខេត្តកោះកុងលោក អ៊ិន គង់ជិត ចាត់ទុកករណីនេះថា ជាការរឹតត្បិតសេរីភាពរបស់ប្រជាពលរដ្ឋក្នុងការបញ្ចេញមតិ។
លោកថា «ព្រោះយើងមើលបដាដែលស្នើឲ្យមានការដោះលែងសកម្មជនការពារសិទ្ធិមនុស្ស ដូចជាមិនពាក់ព័ន្ធនឹងរឿងនយោបាយអីផង ខ្លឹមសារ ហើយគាត់បិតក៏បិតនៅរបងផ្ទះគាត់ លំនៅស្ថានរបស់គាត់ ទីលំនៅស្ថានរបស់គាត់ ហើយចឹងវាដូចជាហេតុផលមិនសមរម្យដែលមិនអាចទទួលយកបាន អាជ្ញាធរគាត់មានចេតនាមួយក្នុងការរារាំងសេរីភាពក្នុងបញ្ចេញមតិ សម្ដែងមតិ»។
គួរបញ្ជាក់ថាការដកបដាទាមទារឲ្យដោះលែងមន្ត្រីអាដហុក និងអគ្គលេខាធិការរង គជប ដែលជាប់ឃុំនេះគឺធ្វើឡើងស្របពេលមួយឆ្នាំនៃការឃុំខ្លួនពួកគេពីសំណាក់តុលាការរាជធានីភ្នំពេញ។
មន្ត្រីការពារសិទ្ធិមនុស្សសមាគមអាដហុក៤នាក់ មាន លោក នី សុខា លោក ណៃ វ៉ង់ដា លោក យី សុខសាន្ត និងលោកស្រី លឹម មុន្នី រួមទាំងមន្ដ្រី គ.ជ.ប ម្នាក់ទៀត លោក នី ចរិយា ត្រូវតុលាការសម្រេចឃុំខ្លួនបណ្តោះអាសន្ននៅពន្ធនាគារព្រៃស ជាងមួយឆ្នាំហើយ ដោយចោទប្រកាន់ពីបទ «សូកប៉ាន់សាក្សី» ទាក់ទិនសំណុំរឿងដ៏ចម្រោងចម្រាស់មួយ ពាក់ព័ន្ធនឹងកញ្ញា ខុម ចាន់តារាទី ហៅ “ស្រីមុំ” តែតុលាការរកមិនឃើញភស្តុតាងគ្រប់គ្រាន់ដើម្បីកាត់ទោសនៅឡើយ៕