លោកនាយករដ្ឋមន្ត្រី ហ៊ុន សែន បានអះអាងថា លោកកំពុងតែរកវិធីឲ្យចៅរបស់គាត់ដកសញ្ជាតិពីអាមេរិក ដោយថាខ្លាចមេដឹកនាំប្រទេសនោះ ចាប់ឲ្យចូលធ្វើជាទាហាន ដើម្បីធ្វើសង្គ្រាមជាមួយប្រទេសដទៃ។
ក្នុងឱកាសជួបកីឡាករនៅថ្ងៃទី៣ខែសីហានេះ លោកនាយករដ្ឋមន្ត្រី ហ៊ុន សែន បានថ្លែងថា នៅអាមេរិកឲ្យតែគ្រប់អាយុ ត្រូវមានកាតព្វកិច្ចចូលបម្រើកងទ័ព។ ករណីនេះលោកឲ្យដកសញ្ជាតិចៅរបស់លោកចេញពីសញ្ជាតិអាមេរិក ដោយថាដើម្បីជៀសវាងបញ្ហាប្រឈមនានា នៅថ្ងៃអនាគត។
លោកថ្លែងថា «ចៅខ្ញុំមួយមានសញ្ជាតិអាមេរិក ព្រោះវាកើតនៅទីនោះ ឥឡូវខ្ញុំកំពុងរកវិធីធ្វើម៉េចឲ្យ ចៅរបស់ខ្ញុំដកសញ្ជាតិពីអាមេរិកចេញ ព្រោះក្រែងអាមេរិកធ្វើសង្គ្រាមជាមួយគេ តម្រូវឲ្យចៅរបស់ខ្ញុំទៅធ្វើទាហានអាមេរិក តែដល់អាយុ ទៅធ្វើទាហានកាតព្វកិច្ច អត់ទេ ខ្ញុំមិនព្រម ដកសញ្ជាតិចេញមក មិនចំាបាច់អាមេរិកទាដកទេ អាមេរិកទាឲ្យធ្វើទាហានរួចហើយតាមមកចាប់ចៅឯងមកដល់ស្រុកខ្មែរទៀត»។
យ៉ាងណាក៏ដោយVODមិនអាចសុំការបំភ្លឺភ្លាមៗពីអ្នកនាំពាក្យស្ថានទូតអារិកប្រចំាកម្ពុជាបានទេនៅល្ងាចថ្ងៃនេះ។
លោក ហ៊ុន សែន ថ្លែងទៀតថា មានមតិមួយចំនួនលើកឡើងថាអាមេរិកជាប្រទេសល្អ ស្ងប់សុខ ប៉ុន្តែលោកថាក្នុងមួយឆ្នាំៗ នៅអាមេរិក តែងតែបើកការបាញ់ប្រហារគ្នានៅតាមតំបន់មួយចំនួន ដោយថាបណ្តាលមានមនុស្សស្លាប់ជាច្រើននាក់៕
