ប្រធានរដ្ឋសភា លោក ហេង សំរិន បានច្រានចោលសំណើរបស់គណបក្សប្រឆំាង ដែលបានស្នើសុំកោះហៅរដ្ឋមន្ត្រីក្រសួងរ៉ែ និងថាមពល ចូលបំភ្លឺពីភាពខុសគ្នារវាងតួរលេខនាំខ្សាច់ទៅក្រៅប្រទេស និងគម្រោងរុះរើការដ្ឋានលាងខ្សាច់នៅក្នុងតំបន់អភិរក្សជម្រកសត្វព្រៃតាតៃក្នុងខេត្តកោះកុង។
ក្នុងសំណើរបស់តំណាងរាស្ត្របក្សសង្រ្គោះជាតិ បានស្នើឲ្យ លោក ស៊ុយ សែម ជួយបំភ្លឺពីភាពខុសគ្នារវាងតួរលេខនាំខ្សាច់ទៅលក់នៅប្រទេសសិង្ហបុរី ការផ្តល់អាជ្ញាប័ណ្ណឲ្យក្រុមហ៊ុនណា នៅតំបន់ណាខ្លះ និងសកម្មភាពបូមខ្សាច់នៅតែបន្តកើត បើទោះជារដ្ឋាភិបាលប្រកាសឲ្យបញ្ឈប់ការនាំចេញខ្សាច់គ្រប់ប្រភេទ។
អ្នកនាំពាក្យរដ្ឋសភា លោក ឡេង ប៉េងឡុង បានប្រាប់VODនៅថ្ងៃទី២ខែសីហានេះថា លោក ហេង សំរិន បានច្រានចោលសំណើរបស់តំណាងរាស្ត្រគណបក្សង្គ្រោះជាតិ លោក សុន ឆ័យ ដោយប្រធានរដ្ឋសភា អះអាងថា សំណើនោះ ធ្វើឡើងផ្ទុយពីរដ្ឋធម្មនុញ្ញ និងជ្រៀតជ្រែកកិច្ចការរបស់រដ្ឋាភិបាល។
លោកនិយាយថា «វាខុសខ្លឹមសារ មាត្រាដែលគាត់យោងវាខុសទំាងស្រុង វាចូលលូកដៃក្នុងកិច្ចការរបស់រដ្ឋាភិបាលហើយ បានសម្តេចប្រធាន[ហេង សំរិន] មិនអាចបញ្ជូនទៅបានទេ»។
លោក សុន ឆ័យ មានប្រសាសន៍ថា សំណើរបស់លោកមិនខុសច្បាប់ និងមិនបានជ្រៀតជ្រែកកិច្ចការផ្ទៃក្នុងរដ្ឋាភិបាលនោះទេ ដោយថាលោកធ្វើតាមតួនាទីតំណាងរាស្ត្រ ជួយរកដំណោះស្រាយជូនប្រជាពលរដ្ឋម្ចាស់ឆ្នោត។
លោកនិយាយថា «ខ្ញុំមើលដូចមិនមានអ្វីខុសនូវមាត្រាដែលគាត់និយាយ មាត្រា៩៦ ដូចជានិយាយច្បាស់ណាស់ថារដ្ឋមន្ត្រីត្រូវឆ្លើយតបយ៉ាងយូណាស់ឲ្យបានមួយសប្តាហ៍ ពេលទទួលបានលិខិត កន្លងទៅលោកស៊ុយ សែម មិនបានឆ្លើយទេ លិខិតកាលពីលើកមុនផ្ញើទៅមួយខែហើយ អត់មានការឆ្លើយតបតាមគោលការណ៍រដ្ឋធម្មនុញ្ញ ដូច្នេះជាសរុបខ្ញុំមានការព្រួយបារម្ភដែរ ក្នុងគោលការណ៍លទ្ធិប្រជាធិបតេយ្យអំណាចដាច់ពីគ្នារដ្ឋសភា រដ្ឋាភិបាល និងតុលាការ ឥឡូវដូចជាឥទ្ធិពលនៃអំណាចប្រតិបត្តិ[រដ្ឋាភិបាល]គ្រប់ដណ្តប់ទំាងរដ្ឋសភា ទំាងតុលាការកាន់តែធ្ងន់ធ្ងរដែលផ្ទុយពីប្រជាធិបតេយ្យ នេះជាការព្រួយបារម្ភ»។
លោក សុន ឆ័យ ឲ្យដឹងថាលោកបានធ្វើសំណើរទៅប្រធានរដ្ឋសភាច្រើនដងមកហើយ ដើម្បីឲ្យ លោក ហេង សំរិន កោះហៅរដ្ឋមន្ត្រីនៅក្នុងគណបក្សកាន់អំណាចចូលបំភ្លឺជុំវិញភាពមិនប្រក្រតីក្នុងកិច្ចការរបស់ខ្លួន ឲ្យសាធារណៈជនបានដឹង។ ប៉ុន្តែលោកថាមិនដែលជួបឧបសគ្គដូចពេលនេះទេ។
កាលពីថ្ងៃទី៣១ខែតុលា ឆ្នាំ២០១៦ ក្រុមអង្គការសង្គមស៊ីវិលជិត៥០ស្ថាប័ន បានផ្ញើលិខិតចំហមួយច្បាប់ទៅរដ្ឋមន្ត្រីក្រសួងរ៉ែនិងថាមពល លោក ឌិត ឌីណា ដោយទាមទារឲ្យបកស្រាយបំភ្លឺការនាំចេញខ្សាច់ពីប្រទេសកម្ពុជា ទៅកាន់ប្រទេសនានា ចាប់ពីឆ្នាំ២០០៧ដល់ឆ្នាំ២០១៥ផងដែរ។ តែអ្នកនាំពាក្យក្រសួងរ៉ែនិងថាមពល លោក ឌិត ទីណា បានថ្លែងថា ប្រទេសកម្ពុជាបាននាំខ្សាច់ចេញទៅបរទេសក្នុងបរិមាណជាង១៧លានតោន នៅចន្លោះឆ្នាំ២០០៧ដល់ឆ្នាំ២០១៥។
ទោះជាយ៉ាងណា តួលេខនេះខុសគ្នាឆ្ងាយពីតួលេខដែលគេទទួលបានពីខាងនាយកដ្ឋានស្ថិតិពាណិជ្ជកម្មរបស់រដ្ឋាភិបាលសិង្ហបុរី ដែលបានបង្ហាញថាខ្សាច់ចំនួន៧២.៨លានតោន ត្រូវបាននាំចេញពីប្រទេសកម្ពុជាចូលទៅប្រទេសសិង្ហបុរី នៅក្នុងរយៈពេល៨ឆ្នាំ៕