នាយករដ្ឋមន្ត្រីឥណ្ឌា លោក នរេន្ទ្រា ម៉ូឌី នៅថ្ងៃនេះ បានផ្ដល់កម្ចីយ៉ាងធំតម្លៃ ៥០០លានដុល្លារ សម្រាប់កិច្ចសហប្រតិបត្តិការខាងវិស័យយោធា ទៅដល់វៀតណាម ដែលកំពុងស្វះស្វែងពង្រឹងវិស័យការពារជាតិ នៅចំពោះមុខឥទ្ធិពលយោធាចិន ក្នុងសមុទ្រចិនខាងត្បូង។ នេះដោយយោងតាមសេចក្ដីរាយការណ៍របស់ Reuters។
បើតាម Reuters កិច្ចព្រមព្រៀងនេះ ស្ថិតក្នុងចំណោមកិច្ចព្រមព្រៀងសហប្រតិបត្តិការជាច្រើនទៀត ដែលលោក ម៉ូឌី បានចុះហត្ថលេខានៅទីក្រុងហាណូយ ជាមួយនាយករដ្ឋមន្ត្រីវៀតណាម លោក ង្វៀន ស៊ុនភូក អំឡុងដំណើរទស្សនកិច្ចលើកដំបូងរបស់នាយករដ្ឋមន្ត្រីឥណ្ឌានៅក្នុងរយៈពេល ១៥ឆ្នាំកន្លងមកនេះ។
ឥណ្ឌា និងវៀតណាម សុទ្ធតែជាប្រទេសមានព្រំដែនជាប់ជាមួយចិន ហើយមានទំហំពាណិជ្ជកម្មធំជាមួយចិនផងដែរ។ ប៉ុន្តែ ប្រទេសទាំងពីរនេះ មានជម្លោះទឹកដីជាមួយក្រុងប៉េកាំង ជុំវិញដែនដីហិមាល័យ និងសមុទ្រចិនខាងត្បូង។
Reuters ដែលបានឃើញកំណត់ហេតុរដ្ឋាភិបាលកាលពីខែមិថុនាកន្លងមកនោះ បានផ្សាយថា ឥណ្ឌាមានបំណងលក់មីស៊ីលឲ្យវៀតណាម និងប្រទេស ៤ទៀត៕
