សេតវិមាននៅថ្ងៃនេះ បានចេញមកបញ្ជាក់ឡើងវិញនូវការគាំទ្ររបស់ខ្លួនចំពោះគោលនយោបាយដែលទទួលស្គាល់ក្រុងប៉េកាំងជារដ្ឋាភិបាលតែមួយ នៅក្នុងគោលនយោបាយ “ចិនតែមួយ” បន្ទាប់ពីប្រធានាធិបតីជាប់ឆ្នោត លោក ដូណាល់ ត្រាំ បាននិយាយទូរស័ព្ទជាមួយប្រធានាធិបតីតៃវ៉ាន់ អ្នកស្រី សៃ អ៊ីវ៉េន ដែលជំរុញឲ្យចិនមិនសប្បាយចិត្តនោះ។
ទីភ្នាក់ងារព័ត៌មាន AFP បានដកស្រង់សម្ដីអ្នកនាំពាក្យសន្តិសុខជាតិ អ្នកស្រី Emily Horne ដែលបានថ្លែងថា៖ “គ្មានការផ្លាស់ប្ដូរចំពោះគោលនយោបាយយូរអង្វែងរបស់យើងនោះឡើយ ចំពោះបញ្ហានៅច្រកសមុទ្រតៃវ៉ាន់”។
អ្នកនាំពាក្យរូបនេះថ្លែងបន្តថា៖ “យើងនៅតែប្ដេជ្ញាចិត្តយ៉ាងរឹងមាំចំពោះគោលនយោបាយ “ចិនតែមួយ” ផ្អែកតាមច្បាប់ទំនាក់ទំនងតៃវ៉ាន់ និងសេចក្ដីប្រកាសរួមចំនួន ៣។ ផលប្រយោជន៍ជាមូលដ្ឋានរបស់យើង គឺស្ថិតនៅក្នុងទំនាក់ទំនងប្រកបដោយសន្តិភាព និងស្ថិតស្ថេរនៅច្រកសមុទ្រ”៕