គណៈកម្មការរៀបចំកីឡាកងយោធពលខេមរភូមិន្ទ នឹងធ្វើការចល័តយោធភណ្ឌនៅក្នុងភូមិសាស្ត្ររាជធានីភ្នំពេញ ដើម្បីរៀបចំកម្មវិធីប្រកួតកីឡាកងយោធពលខេមរភូមិន្ទ នាថ្ងៃទី០៦-០៨ ខែមករា ឆ្នាំ២០១៧ នៅកោះពេជ្រ នេះបើតាមសេចក្តីជូនដំណឹង។
លិខិតរដ្ឋបាលសាលារាជធានី ចុះថ្ងៃទី៤ខែមករានេះ ឲ្យដឹងថា គណៈកម្មការរៀបចំនឹងធ្វើការចល័តសម្ភារៈបម្រើការងារមួយចំនួនរួមមាន រថពាសដែកចំនួន២គ្រឿង និងរថយន្តយោធាចំនួន១៥គ្រឿង នៅវេលាម៉ោង២ទៀបភ្លឺ ថ្ងៃទី៥ ខែមករា ឆ្នាំ២០១៧ ដោយចេញពីកងពលតូចអន្តរាគមន៍លេខ៧០ ឆ្ពោះទៅមជ្ឍមណ្ឌលសន្និបាតនិងពិព័រណ៍កោះពេជ្រ ដោយឆ្លងកាត់កំណាត់ផ្លូវជាតិលេខ៣ ផ្លូវវេងស្រេង មហាវិថីមុនីរ៉េត មហាវិថីម៉ៅសេទុង និងមហាវិថីសុធារស ហើយត្រឡប់ចូលកងពលតូចអន្តរាគមន៍លេខ៧០វិញ នៅទី៩ ខែមករា ឆ្នាំ២០១៧ វេលាម៉ោង២ទៀបភ្លឺ។
បើតាមសេចក្តីជូនដំណឹង សាលារាធានីភ្នំពេញអំពាវនាវឲ្យប្រជាពលរដ្ឋកុំមានការយល់ច្រឡំ និងភ្ងាក់ផ្អើលចំពោះការចល័តយោភណ្ឌសម្រាប់រៀបចំកម្មវិធីតាំងពិព័រណ៌សម្ភារៈយោធាខាងលើនេះ៕