គណបក្សប្រជាជនកម្ពុជាប្រកាសទទួលយកលទ្ធផលបោះឆ្នោត ដែលគណបក្សខ្លួនទទួលបានអាសនៈទាំង ៥៨ ក្នុងការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ កាលពីថ្ងៃទី ២៥ កុម្ភៈកន្លងទៅ។
គណបក្សប្រជាជនបានចេញសេចក្ដីថ្លែងការណ៍មួយចុះថ្ងៃទី ០៣ ខែ មីនា ថាគណបក្សរបស់ខ្លួនប្រកាសជាឧឡារិក ទទួលយកលទ្ធផលផ្លូវការនៃការបោះឆ្នោតជ្រើសរើសសមាជិកព្រឹទ្ធសភានីតិកាលទី ៤នេះ ដោយថាលទ្ធផលនេះបានឆ្លុះបញ្ចាំងពីឆន្ទៈ និង បំណងប្រាថ្នារបស់ប្រជាពលរដ្ឋដែលស្រលាញ់សន្តិភាព។
ក្នុងសេចក្តីថ្លែងការណ៍ដដែលនោះបន្តថាការបោះឆ្នោតកាលពីពេលថ្មីៗនោះ គឺបានប្រព្រឹត្តទៅក្នុងបរិយាកាសល្អ ស្របតាមរដ្ឋធម្មនុញ្ញ និង ច្បាប់ ដែលមានលក្ខណៈ សេរី ត្រឹមត្រូវ និង យុត្តិធម៌។
ជាមួយគ្នានោះគណបក្សប្រជាជនក៏បានសំដែងការដឹងគុណចំពោះអង្គបោះឆ្នោតដែលបក្សនេះថាជាតំណាងរាស្រ្តប្រសូតចេញពី ឆន្ទៈរបស់ពលរដ្ឋ ដែលបោះឆ្នោតគាំទ្រឲ្យគណបក្សប្រជាជនទទួលបានជ័យជម្នះដ៏ត្រចះត្រចង់នេះ។
ក្នុងសេចក្ដីថ្លែងការណ៍នោះដែរគណបក្សប្រជាជនក៏បានវាយតម្លៃខ្ពស់ចំពោះ គ.ជ.ប ដោយថាបានខិតខំ បំពេញតួនាទី ភារកិច្ចរបស់ខ្លួនដែលប្រជាជនបានប្រគល់ឲ្យ ប្រកបដោយភាពអព្យាក្រឹត ប្រសិទ្ធភាព និង ការទទួលខុសត្រូវ។
បន្ថែមលើនោះគណបក្សប្រជាជនក៏បញ្ជាក់ដែរថាព្រឹទ្ធសភាដែលដឹកនាំដោយបក្សរបស់ខ្លួនតែឯងនេះ នឹងប្រតិបត្តិយ៉ាងម៉ឹងម៉ាត់នូវរដ្ឋធម្មនុញ្ញ បទបញ្ជាផ្ទៃក្នុង និងមុខងារទាំង ៣ របស់ព្រឹទ្ធសភាគឺមុខងារនីតិកម្ម ជាតំណាង និង មុខងារតាមដានការអនុវត្តច្បាប់ ដើម្បីលើកម្ពស់ការតាក់តែងច្បាប់ និង ខិតខំពង្រឹងលទ្ធិប្រជាធិបតេយ្យ ទាំងនៅថ្នាក់ជាតិ និង ថ្នាក់ក្រោមជាតិ។
ទោះបីជាយ៉ាងណាកាលពីថ្ងៃទី ២៥ ខែកុម្ភៈគណបក្សសង្គ្រោះជាតិ ដែលត្រូវបានរំលាយចោលទៅហើយនោះ បានចេញសេចក្ដីថ្លែងការណ៍បដិសេធ មិនទទួលស្គាល់លទ្ធផលនៃការបោះឆ្នោតជ្រើសតាំងសមាជិកព្រឹទ្ធសភានេះទេ ដោយថា ការបោះឆ្នោតនេះ ត្រូវបានធ្វើឡើងដោយខុសច្បាប់ និងផ្ទុយពីរដ្ឋធម្មនុញ្ញ។
ការបោះឆ្នោតនោះមានការចូលរួមពីគណបក្សនយោបាយចំនួន ៤ ប៉ុន្តែ គណបក្សសង្គ្រោះជាតិ ដែលទទួលបានការគាំទ្រពីពលរដ្ឋជិត ៣លាននាក់នោះ មិនត្រូវបានអនុញ្ញាតឲ្យចូលរួមក្នុងការបោះឆ្នោតអសកលនេះទេ បន្ទាប់ពីបក្សប្រឆាំងមួយនេះ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន។
ចំណែកឯអាសនៈជាប់ឆ្នោតទាំងអស់របស់បក្សប្រឆាំងមួយនេះ ត្រូវបានដកហូត និងបែងចែកទៅឲ្យគណបក្សផ្សេង ដែលពលរដ្ឋពុំបានបោះឆ្នោតឲ្យនៅអំឡុងការបោះឆ្នោតជាតិឆ្នាំ២០១៣ និងការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១៧កន្លងមកនេះ៕
