សហភាពអឺរ៉ុប ចាត់ទុកការបន្ដឃុំខ្លួនអ្នកការពារសិទ្ធិមនុស្ស៥រូបរយៈពេល៦ខែទៀតថា ធ្វើឡើងតាមទំនើងចិត្ត និងទទូចឲ្យដោះលែងជាបន្ទាន់ ខណៈពួកគេជាប់ពន្ធនាគារជាង១ឆ្នាំមកហើយ។
ក្នុងសេចក្ដីថ្លែងការណ៍ ចេញផ្សាយថ្ងៃទី៤ខែឧសភាឆ្នាំ២០១៧ សហភាពអឺរ៉ុបបានប្រតិកម្មទៅនឹងការសម្រេចរបស់តុលាការកម្ពុជា ដែលនៅបន្ដឃុំខ្លួនមន្ដ្រីការពារសិទ្ធិមនុស្សរបស់អង្គការអាដហុកចំនួន៤រូប និងមន្ត្រីគ.ជ.ប ឲ្យជាប់ពន្ធនាគារ៦ខែបន្ថែមទៀត ខណៈពួកគេបានជាប់ឃុំជាង១ឆ្នាំហើយ ពោល ចាប់តាំងពីការសម្រេចឃុំខ្លួនលើកដំបូង កាលពីថ្ងៃទី២៨ខែមេសាឆ្នាំ២០១៦។
សហភាពអឺរ៉ុបយល់ថា ការសម្រេចឃុំខ្លួនជាបណ្ណោះអាសន្នបន្ដទៀតនេះ គឺធ្វើឡើងតាមអំពើចិត្តរបស់អ្នកមានកាន់អំណាច និងទទូចឲ្យរដ្ឋាភិបាល និងតុលាការកម្ពុជាដោះលែងពួកគេឲ្យមានសេរីភាពឡើងវិញជាបន្ទាន់។ សហភាពអឺរ៉ុបថា រដ្ឋាភិបាលកម្ពុជាត្រូវគោរពសិទ្ធិជនជាប់ចោទទាំង៥នាក់ទាំងនោះ ដោយថាត្រូវអនុវត្តតាមឲ្យបានពេញលេញតាមច្បាប់ជាតិ និងកិច្ចព្រមព្រៀងនានា ដែលកម្ពុជាជាសមាជិកហត្ថលេខី។
កាលពីថ្ងៃទី២៨ខែមេសាឆ្នាំ២០១៦ អង្គភាពប្រឆាំងអំពើពុករលួយបានចាប់ខ្លួនមន្ត្រីអាដហុក៤រូប រួមមានលោក នី សុខា លោក យី សុខសាន លោក ណៃ វង់ដា លោកស្រី លឹម មន្នី និងមន្ត្រី គ.ជ.ប លោក នី ចរិយា។ បន្ទាប់មក តុលាការបានចោទប្រកាន់អ្នកការពារសិទ្ធិមនុស្សទាំងនោះពីបទសូកប៉ាន់សាក្សីតាមក្រមព្រហ្មទណ្ឌកម្ពុជា ខណៈដែលសមាគមនោះបានឲ្យលុយជាង២០០ដុល្លារ ទៅនារីអ៊ុតសក់ម្នាក់ ដែលមកស្វែងរកសេវាច្បាប់ទាក់ទងនឹងការទម្លាយថាស្តី្ររូបនោះមានទំនាក់ទំនងស្នេហាលួចលាល់ជាមួយប្រធានគណបក្សប្រឆាំងលោក កឹម សុខា៕
