មន្ត្រីអង្កការសង្គមស៊ីវិល បង្ហាញការខកចិត្ត ទៅនឹងអាជ្ញាធរខេត្តកោះកុង ដែលបានចុះដកហូត ផ្ទាំងរូប សុំឲ្យដោះលែងមន្ត្រីសិទ្ធិមនុស្សអាដហុក៤រូប កំពុងជាប់ពន្ធនាគារ ដោយមិនបានសំអាងពីផ្លូវច្បាប់។
នៅប៉ុន្មានថ្ងៃនេះ អាជ្ញាធរខេត្តកោះកុងបាន ចុះដកហូត និងទម្លាក់ផ្ទាំងរូបភាព បិទនៅស្នាក់ការ របស់អង្កការ និងតាមផ្ទះតំណាងសហគមមួយចំនួន នៅស្រុកស្រែអំបិល។
មន្ត្រីសម្របសម្រួលសមាគមអាដហុក ប្រចាំខេត្តកោះកុង លោក ញៀប សំអឿន ឲ្យVOD ដឹងនៅថ្ងៃទី៤ឧសភានេះថា ការដែលអាជ្ញាធរចុះដកហូត និងទម្លាក់បដារូបភាពនេះ លោកថា ទាំងអាជ្ញាធរស្រុក ទាំងអាជ្ញាធរខេត្ត មិនបានបញ្ជាក់ថា ចំណាត់ការនោះផ្អែកលើច្បាប់អ្វីនោះទេ ដោយគ្រាន់តែអះអាង ថាពួកគេធ្វើតាមបញ្ជា របស់ថ្នាក់លើ ។
លោក ញៀប សំអឿន បង្ហាញការខកចិត្តថា ក្នុងនាមជាអាជ្ញាធរដែនដី តំណាងឲ្យរដ្ឋាភិបាលផងនោះគួយកច្បាប់មកអនុវត្ត មិនគួសំអាងត្រឹមបញ្ហាពីថ្នាក់លើនោះទេ។
មន្ត្រីសង្គមស៊ីវិលរូបនោះហៅចំណាត់ការបែបនេះថា ជាការរំលោភលើសេរីភាពបញ្ចេញមតិ ដោយសន្តិវិធី ពិសេសលោកថា រំលោភសិទ្ធិអង្គការសង្គមស៊ីវិល ដែលតែងតែសហការជំរុញអភិបាលកិច្ច។
លោក ញៀប សំអឿន ជំរុញឲ្យអាជ្ញាធរ ពិចារណាករណីនេះឡើងវិញ ដើម្បីឲ្យដូចទៅនឹងអ្វីដែលរដ្ឋាភិបាល ធ្លាប់លើកពីគោលការណ៍ ពង្រឹងនីតិរដ្ឋនោះ។
លោកថា៖ «យើងសុំឲ្យគាត់ធ្វើបានត្រង់ហ្នឹង។ ព្រោះគាត់និយាយថា ប្រទេសប្រជាធិបតេយ្យៗ គោលការណ៍នីតិរដ្ឋ ការគោរពច្បាប់។ ដល់ពេលគាត់ទៅអនុវត្តច្បាប់ គាត់ត្រូវយកច្បាប់ជាគោល។ ដល់ពេលយើងសួររកច្បាប់គាត់ថាមិនដឹងច្បាប់ណា។ គាត់អត់មានមាត្រាច្បាប់ណា មកប្រាប់យើងជាភាពកក់ក្តៅក្នុងការដែលគាត់ធ្វើហ្នឹង។ យើងមិនយល់ពីគោលបំណងគាត់ ហើយយើងសោកស្តាយណាស់។ ហើយបើសិនជាគាត់នូវបន្តធ្វើបែបនឹងទៀត សង្គមយើងមិនដឹងយ៉ាងម៉េចទេបាទ»។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត លើកឡើងដែរថា បដារូបភាពនោះ បានបិទនៅស្នាក់ការ របស់អង្គការមួយចំនួននៅក្នុងខេត្តនេះ និងនៅផ្ទះដំណាងសហគមន៍មួយចំនួន ក្នុងឃុំជីខលើ ស្រុកស្រែអំបិល ប្រមាណជាពីរខែមកហើយ។ លោកថាបិទនោះទៀតសោត ក៏គ្មានសញ្ញាណណាមួយបង្កឡើង ពីអសន្តិសុខសង្គមដូចការអះអាងរបស់អាជ្ញាធរដែរ។
លោក អំ សំអាត លើកឡើងទៀតថា បដារូបភាពនោះ ហាក់បានបង្ហាញពីសារតស៊ូមតិ បែបស្ងាត់ស្ងៀម។លោកថា ចំណាត់ការនោះ រំលោភលើសិទ្ធិសម្តែងមតិ ដោយសន្តិវិធី និងសិទ្ធិទទួលព័ត៌មាន។
លោកថា៖ «យើងគិតមើលផ្ទះឯកជនគេ គេចងនៅនឹងផ្ទះ មិនមែនសាធារណៈ ហើយបើសិនជាពលរដ្ឋធម្មតាទៅយកអាហ្នឹងវិញ តើវាពាក់ព័ន្ធទៅនឹងបទល្មើសឬក៏អត់? ចុះបើក្នុងនាមជាអាជ្ញាធរ។ ពីព្រោះអានេះជាទីឯកជនរបស់គេ មិនមែនជាទីសាធារណទេ។ ខ្ញុំយល់ថា អាជ្ញាធរគួរតែពិចារណាឡើងវិញអំពីចំនុចនេះ»។
បើតាមលោក អំ សំអាត ការដែលមន្ត្រីអង្គការសង្គមស៊ីវិល និងប្រជាពលរដ្ឋ យកបដារូបភាពនេះនៅបិទនៅស្នាក់ការ និងផ្ទះរបស់ពួកគេ គ្រាត់តែបង្ហាញថា ពួកគេ មិនពេញចិត្តទៅនឹងការបន្តឃុំខ្លួនមន្ត្រីអាដហុក មន្ត្រី គជប និងសកម្មជនដីធ្លី និងជាសារស្នើឲ្យរដ្ឋាភិបាល ពិចារណាដោះស្រាយពីបង្វល់របស់ពួកគេ ដែលលោកថា មានចែងនៅក្នុងច្បាប់។
រដ្ឋធម្មនុញ្ញមាត្រា៣៥ចែងថា «ពលរដ្ឋខ្មែរទាំងពីភេទ មានសិទ្ធិចូលរួមយ៉ាងសកម្មក្នុងជិវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយណារបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ»។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា ហៅចំណាត់ការ របស់អាជ្ញាធរនេះថា ជាការបង្ហាញសាច់ដុំ ច្រើនជាងការអនុវត្តច្បាប់។ លោកថា ចំណាត់ការបែបខ្លាចស្រមោលខ្លួនឯងនេះ និងធ្វើឲ្យប៉ះពាល់ដល់មុខមាត់រដ្ឋាភិបាល។
លោកថា៖ «អាជ្ញាធរគាត់ជាអ្នកជំរុញឲ្យមានការអនុវត្តច្បាប់ ឬជាអ្នកចាប់បង្ខំឲ្យអនុវត្តច្បាប់ ហើយបើខ្លួនឯងអត់មាន[សំអាង]ទៅលើច្បាប់[អី]ផង ហើយរំលោភច្បាប់អីអញ្ចឹង អាហ្នឹងបង្ហាញថាប្រទេសមួយហ្នឹងមិនដឹងគេយកស្អីទេ យកច្បាប់ឬក៏យកស្អីទេ អាងអំណាចខ្លួនឯង មានអាវុធមានអីអញ្ចឹង។ ដូចខ្ញុំថាអញ្ចឹង កាលណាយើងធ្វើ ទាំងដូចកំរោលចូលអញ្ចឹង វាធ្វើឲ្យពលរដ្ឋហ្នឹងអត់សប្បាយចិត្តទេបើទោះជាអ្នកខ្លះហ៊ាន និយាយហើយអ្នកខ្លះទៀតមិននិយាយ ក៏គេនឹងចម្រេចចិត្តនៅថ្ងៃបោះឆ្នោត»។
ទោះជាយ៉ាងណា មន្ត្រីសម្របសម្រួលសមាគមអាដហុក លោក ញៀប សំអឿន អះអាងថា ស្នងការខេត្តកោះកុង លោក សំ គិតវៀន ថ្មីបើលោកមិនបានប្រាប់ថា ការចុះដកហូតផ្ទាំងរូបភាព មន្ត្រីអាដហុកកំពុងជាប់ឃុំនោះ មិនបានបញ្ជាក់ថាផ្អែកលើច្បាប់អីក៏ដោយ ប៉ុន្តែលោកថា ការដកហូតនោះគ្រាន់តែជាការដកហូតបណ្តោះអាសន្ន ដោយថារងចាំពិភាក្សាគ្នា នៅពេលក្រោយ។
ទោះជាយ៉ាងអាដហុកអះអាងថា ពួកគេនឹងបន្តលើកផ្ទាំងរូបភាពនោះឡើងវិញ បើសិនជាអាជ្ញាធរ មិនអាចរកច្បាប់ណា មកសំអាង ទៅលើចំណាត់ការរបស់ខ្លួននោះ៕
