អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងទៅកាន់អ្នកយកព័ត៌មាននៅម៉ោង៩យប់ថ្ងៃអាទិត្យទី៤មិថុនានេះថា គណបក្សសង្គ្រោះជាតិដណ្តើម បានសំឡេងប្រមាណជា៤៦% នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤ នេះបើតាមលទ្ធផលបឋមនៃការរាប់សំឡេងឆ្នោតដោយគណបក្សនេះ។
លោក យឹម សុវណ្ណ ថ្លែងក្នុងសន្និសិទសារព័ត៌មាននៅទីស្នាក់ការគណបក្សសង្គ្រោះជាតិថា «លទ្ធផលបឋមនេះ នឹងធ្វើឲ្យគណបក្សសង្គ្រោះជាតិកើនសំឡេងពី៣០% នៅក្នុងការបោះឆ្នោតឆ្នាំ២០១២ទៅ៤៦%»។
លោកបន្ថែមថា៖ «គណបក្សសង្គ្រោះជាតិឈ្នះប្រមាណជាជាង៥០០ឃុំ»។
ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៣ គណបក្សប្រជាជនកម្ពុជាទទួលបានសំឡេង៦២% ចំណែកគណបក្ស សម រង្សី និងគណបក្សសិទ្ធិមនុស្សរួមគ្នា ទទួលបានប្រមាណជា៣០%។
បើតាមលោក យឹម សុវណ្ណ លទ្ធផលនៃការបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃអាទិត្យនេះ បង្ហាញថា គណបក្សសង្គ្រោះជាតិនឹងឈ្នះការបោះឆ្នោតជាតិឆ្នាំ២០១៨។
លោកថា៖ «គណបក្សសង្គ្រោះជាតិនឹងទទួលបានសម្លេង៦០% ដើម្បីកាន់កាប់រដ្ឋាភិបាល។ នៅក្នុងការបោះឆ្នោតជាតិឆ្នាំ២០១៨យើងបូកថែមតែ១០%ទៅ១៥%ទៀតយើងនឹងឈ្នះ»។
លោក យឹម សុវណ្ណ លើកឡើងដែរថា គណបក្សនេះនៅតែកត់សំគាល់ពីការគម្រាមកំហែង ប្រព័ន្ធផ្សព្វផ្សាយរបស់រដ្ឋនិងឯកជនមិនបានគោរពតាមគោលការណ៍ណែនាំរបស់គ.ជ.ប ការបាត់បង់សិទ្ធិបោះឆ្នោតរបស់កម្មករចំណាកស្រុក និងការមិនបានទៅបោះឆ្នោតរបស់ពលរដ្ឋដែលមានសិទ្ធិបោះឆ្នោតជាង១៤% ថានៅតែជាបញ្ហា ដែលធ្វើឲ្យប៉ះពាល់ដល់ដំណើរការសេរីនិងយុត្តិធម៌នៃការបោះឆ្នោត។
គណកម្មាធិការជាតិរៀបចំការបោះឆ្នោត (គជប) អះអាងថា ប្រជាពលរដ្ឋដែលមានសិទ្ធិបោះឆ្នោតចំនួន៨៥.៧៤% បានទៅបោះឆ្នោតជ្រើសរើសក្រុមប្រឹក្សាឃុំសង្កាត់អាណតិ្តទី៥ដែលទើបបានបិទបញ្ចប់នៅម៉ោង៣រសៀលថ្ងៃអាទិត្យ ទី៤ ខែមិថុនានេះ។
VOD នៅមិនទាន់អាចសុំការអធិប្បាយពីអ្នកនាំពាក្យគណបក្សប្រជាជនកម្ពុជា លោក សុខ ឥសាន ដើម្បីឆ្លើយតបនឹងការលើកឡើងរបស់គណបក្សសង្រ្គោះជាតិបាននៅឡើយទេនៅយប់ថ្ងៃអាទិត្យនេះ ដោយលោកអះអាងថា កំពុងជាប់រវល់រាប់សន្លឹកឆ្នោត។
បន្ទប់ស្ថានការណ៍បោះឆ្នោតដែលសម្របសម្រួលដោយអង្គការខមហ្វ្រែល (Comfrel) និងអង្គការតម្លាភាពកម្ពុជា (TI Cambodia)ដែលបានដាក់ពង្រាយអ្នកអង្កេតការណ៍នៅតាមការិយាល័យបោះឆ្នោតនៅទូទាំងប្រទេសបានវាយតម្លៃថា ទោះបីជានៅមានភាពមិនប្រក្រតីតិចតួច តែដំណើរការបោះឆ្នោតបានប្រព្រិត្តទៅដោយរលូន សុវត្ថិភាព និងសន្តិវិធី។
បើតាមនីតិវិធីរបស់គ.ជ.ប លទ្ធផលជាផ្លូវការនៃការបោះឆ្នោតជ្រើសរើសក្រុមប្រឹក្សាឃុំសង្កាត់នឹងត្រូវប្រកាសជាផ្លូវការនៅថ្ងៃទី២៥ ខែមិថុនាខាងមុខនេះ៕
