គណៈកម្មការរៀបចំពិធីបុណ្យបានប្រាប់ពីតម្រាយផ្លូវមួយចំនួនដែលត្រូវដង្ហែរសព លោក ប៉ែន សុណ្ណ អតីតនាយករដ្ឋមន្ត្រីក្រោយការដួលរលំរបបខ្មែរក្រហម ទៅបូជានៅវត្តឫស្សីសាញ់ នៅព្រឹកថ្ងៃអាទិត្យទី៦ខែវិច្ឆិកានេះ។
លោក ឡុង រី សមាជិកគណៈកម្មការរៀបចំពិធីបុណ្យឲ្យដឹងថា ក្បួនដង្ហែរនឹងចាប់ផ្តើមនៅម៉ោង៧ព្រឹក ចេញពីវត្តថាន់កាត់ទៅផ្លូវម៉ៅសេទុង ទៅដល់ការ៉ាស់សាំងបូកគោ បត់ទៅឆ្វេងលើផ្លូវព្រះមុនីវង្ស ដល់ការ៉ាស់សាំងច្រមុះជ្រូកជិតស្ពានអាកាសក្បាលថ្នល់បត់ឆ្វេងឡើងផ្លូវ២៧១ ចេញពីផ្លូវ២៧១ ទៅដល់ចំណុចកែងផ្លូវ៣៧១ ឆ្លងទៅផ្លូវ៣៧១ ហើយឡើងទៅផ្លូវទៅរកសាលាកសិកម្ម បត់ទៅខាងស្តាំដៃឆ្ពោះទៅកាន់ឈាបនដ្ឋានវត្តឫស្សីសាញ់។
លោកបន្តថា នៅក្នុងថ្ងៃរំកិលនិងដង្ហែរសព មានការសហការជាមួយអាជ្ញាធរដែនដីក្នុងខណ្ឌពាក់ព័ន្ធទាំងអាវុធហត្ថទាំងប៉ូលិស ដើម្បីសម្របសម្រួលក្បួនឲ្យអធឹកអធម និងរៀបចំដើម្បីកុំឲ្យមានការកកស្ទះចរារណ៍។
លោក ប៉ែន សុវណ្ណ ជាអតីតនាយករដ្ឋមន្ត្រីនៃរបបសាធារណរដ្ឋប្រជាមានិតកម្ពុជា ចន្លោះឆ្នាំ១៩៧៩ដល់ឆ្នាំ១៩៨១។ លោកទទួលមរណភាពកាលពីថ្ងៃទី២៩ ខែវិច្ឆិកា ឆ្នាំ២០១៦ ក្នុងជន្មាយុ៨០ឆ្នាំ។
ក្រោយការទទួលមរណភាពបក្សប្រឆាំង និងអ្នកគាំទ្រមួយចំនួនចាត់ទុកលោក ប៉ែន សុវណ្ណ ថាវីរបុរសរបស់ជាតិ ដែលហ៊ានប្រឆាំងវៀតណាមឈ្លានពាន ទោះបីប្រឈមគ្រោះថ្នាក់។ ប៉ុន្តែគណបក្សប្រជាជនកម្ពុជាចាត់ទុក លោក ប៉ែន សុវណ្ណ ដែលប្រឆាំងគោលនយោបាយរបស់វៀតណាមថា មិនមែនជាអ្នកស្នេហាជាតិទេ៕
