អាជ្ញាធរខេត្ដសៀមរាប អោយដឹងថា ភ្ញៀវទេសចរណ៍ជាតិនិងអន្ដរជាតិចូលរួមទស្សនាពិធីបុណ្យអំទូក បណ្ដែតប្រទីប អកអំបុក និងសំពះព្រះខែ នៅឆ្នាំ២០១៧ មានចំនួនជិត៣០ម៉ឺននាក់ កើនឡើង៣៦,២៨% បើធៀបកាលពីឆ្នាំ២០១៦។
អភិបាលខេត្ដសៀមរាប លោក ឃឹម ប៊ុនសុង មានប្រសាសន៍ថា ព្រះរាជពិធីបុណ្យអំទូក រយៈពេលពីរថ្ងៃ ចាប់ពីថ្ងៃទី២ដល់ថ្ងៃទី៣ខែវិច្ឆិកា ឆ្នាំ២០១៧នេះ មានអ្នកទស្សនាប្រមាណជាង២៨ម៉ឺននាក់ ក្នុងនោះមានភ្ញៀវជាតិ ប្រមាណជាង២៥ម៉ឺននាក់ និងភ្ញៀវទេសចរណ៍អន្ដរជាតិ មានប្រមាណបីម៉ឺននាក់ ដែលលោកថា បើប្រៀបធៀប កាលពីឆ្នាំ២០១៦កើនឡើង៣៦,២៨%។
បើតាមលោក ឃឹម ប៊ុនសុង អោយដឹងថា ពិធីបុណ្យអុំទូក បណ្ដែតប្រទីប និងអកអំបុក សំពះព្រះខែនេះ ខេត្តសៀមរាបមានដាក់កម្លាំងសមត្ថកិច្ចការពារសន្ដិសុខសណ្ដាប់ធ្នាប់ ប្រមាណ៧០០នាក់ ក្នុងនោះមានកម្លាំងនគរបាល កម្លាំងកងរាជអាវុធហត្ថ និងកម្លាំងប្រជាការពារភូមិផងដែរ ខណៈដែលកម្លាំងថែរក្សាបរិស្ថានប្រមាណ២០០នាក់៕
