មន្ត្រីនគរបាលខេត្តព្រៃវែង បានឲ្យដឹងថា កម្មការិនី ១៥នាក់ ត្រូវបានបញ្ជូនទៅសង្គ្រោះបន្ទាន់ភ្លាមៗ បន្ទាប់ពីរងរបួសធ្ងន់ស្រាល ក្រោយពីរថយន្តដឹកកម្មករមួយគ្រឿង បានក្រឡាប់ធ្លាក់ផ្លូវ នៅព្រឹកព្រលឹមថ្ងៃនេះ។
អធិការនគរបាលស្រុកព្រះស្ដេច លោក ជ័យ សេងហាក់ ត្រូវបានវេបសាយនគរបាលជាតិដកស្រង់សម្ដីចុះផ្សាយថា រថយន្តដឹកកម្មករមួយគ្រឿង បានក្រឡាប់ធ្លាក់ផ្លូវ នៅតាមបណ្ដោយផ្លូវជាតិលេខ ស្ថិតភូមិព្រៃខ្លា ឃុំកំពង់សិង្ហ នៅម៉ោងប្រហែល ៦កន្លះព្រឹកថ្ងៃនេះ ដោយបណ្ដាលឲ្យកម្មការិនីដល់ទៅ ១៥នាក់ បានរងរបួសធ្ងន់ស្រាល។
មន្ត្រីនគរបាលរូបនេះ បានឲ្យដឹងបន្ថែមថា កម្មការិនីរងគ្រោះទាំងនោះ ត្រូវបានសង្គ្រោះបន្ទាន់នៅមន្ទីរពេទ្យអ្នកលឿង និងមន្ទីរពេទ្យនៅទីរួមខេត្តព្រៃវែង ខណៈដែលអ្នកបើកបររថយន្ត ត្រូវបានសមត្ថកិច្ចបញ្ជាក់ថា បានរត់គេចខ្លួនបាត់ ក្រោយឧបទ្ទវហេតុនោះកើតឡើង៕