ក្រសួងរ៉ែងនិងថាមពល បានអះអាងថា ពិតជាមានកប៉ាល់ចំណុះជាង៨ពាន់តោន ចូលមកដឹកខ្សាច់នៅ តំបន់ស្ទឹងហាវ ខេត្តកោះកុង នៅពេលថ្មីៗនេះពិតប្រាកដមែន ប៉ុន្តែថាមិនមែនជាការធ្វើអាជីវកម្មខ្សាច់ខុសច្បាប់ ប្រឆាំងបម្រាមរបស់រដ្ឋាភិបាល ដូចអ្នករាយការណ៍របស់អង្គការមាតាធម្មជាតិលើកទ្បើងនោះទេ។
សេចក្តីប្រកាសព័ត៌មានចុះថ្ងៃទី៥ខែឧសភានេះ ក្រសួងរ៉ែនិងថាមពល បានលើកឡើងថា កាលពីថ្ងៃទី២៥ខែមេសា ពិតជាមានកប៉ាល់ចំណុះជាង៨ពាន់តោន(៨ ៦៧៩ តោន) ចូលមកដឹកខ្សាច់ នៅក្នុងឃុំកែវផុស ស្រុកស្ទឹងហាវ ខេត្តកោះកុងពិតប្រាកដមែន។
ក្រសួងឲ្យដឹងទៀតថា ខ្សាច់នោះ ជាប្រភេទខ្សាច់ ស (ខ្សាច់ស៊ីលីកា) និងជាប្រភេទខ្សាច់ឧស្សាហកម្មផលិត កែវ ដប ដែលធ្វើអាជីវកម្មដោយក្រុមហ៊ុន ម៉ុងឫទ្ធីគ្រប់ ខូអិលធីឌី ស្ថិតក្នុងដែនដីគោក មិនមែនជាខ្សាច់ដែលយកចេញពីព្រែកនានា ដូចដែលសមាជិកអង្គការមាតាធម្មជាតិរាយការណ៍នោះទេ។
ក្រសួងបញ្ចាក់ថា ក្រុមហ៊ុននេះ ទទួលបានគោលការណ៍ធ្វើអាជីវកម្មខ្សាច់ពីរដ្ឋាភិបាល និងទទួលបានអាជ្ញាបណ្ណត្រឹមត្រូវពីក្រសួងរ៉ែ និងថាមពល។
កាលពីថ្ងៃទី១ខែឧសភា សកម្មជនបរិស្ថានតំបន់អារ៉ែងក្នុងខេត្តកោះកុងបាន បង្ហោះវីដេអូឃ្លីបតាមបណ្តាញសង្គម ដោយរាយការណ៍ថា សកម្មភាពបូមខ្សាច់នៅតំបន់ស្ទឹងហាវ ខេត្តព្រះសីហនុ នៅតែបន្តកើតមានដដែល បើទោះបីជារដ្ឋាភិបាលកម្ពុជា បានសម្រេចហាមឃាត់ការនាំចេញខ្សាច់ពីប្រទេសកម្ពុជាទៅកាន់បរទេសក៏ដោយ។
សេចក្តីរាយការណ៍នោះ ក៏បានបង្ហាញរូបភាព សាឡង់តូចៗជាច្រើន និងមានកប៉ាល់ធំមួយកំពុងផ្ទេខ្សាច់ពីសាឡង់តូចៗនោះទៀតផង ដែលសកម្មជនបរិស្ថានអង្គការមាតាធម្មជាតិ ហៅកប៉ាល់នោះថា ជាកប៉ាល់យក្យមានចំណុះ៣ម៉ឺនតោន។
កាលពីឆ្នាំ២០១៦ក្រសួងរ៉ែ និងថាមពល បានប្រកាលផ្អាកការនាំចេញខ្សាច់ពីកម្ពុជាទៅកាន់បរទេសបណ្ដោះអាសន្ន ក្រោយពីផ្ទុះឡើងនូវភាពចម្រូងចម្រាស់ ខាងតួលេខរវាងរដ្ឋាភិបាលកម្ពុជា និងតួលេខរបស់ប្រទេសដែលទិញខ្សាច់ពីកម្ពុជាថា មានចំនួនខុសគ្នារាប់រយលានដុល្លារ។
ទោះជាយ៉ាងណាក្រសួងរ៉ែនិងថាមពលអះអាងក្នុងសេក្តីថ្លែងការណ៍នោះថា មកដល់ពេលនេះ ក្រសួងនៅតែបន្តផ្អាកការនាំចេញខ្សាច់ទៅលក់នៅក្រៅប្រទេសដដែល លើកលែងតែប្រភេទខ្សាច់ស ឬ ស៊ីលាកា ដែលធ្វើអាជីវកម្មដោយក្រុមហ៊ុន ម៉ុង ឫទ្ធី នេះ៕
