អយ្យការអមសាលាដំបូងរាជធានីភ្នំពេញបានសម្រេចចោទប្រកាន់ លោក កឹម សុខា ថាបានឃុបឃិតជាសម្ងាត់ជាមួយបរទេស ក្បត់ជាតិកម្ពុជា ដោយប្រឆាំងទៅនឹងក្រមព្រហ្មទណ្ឌ។
លោក កឹម សុខា ត្រូវបានចាប់ខ្លួនបញ្ជូនទៅពន្ធនាគារត្រពាំងថ្លុង ជាប់ព្រំដែនវៀតណាម ទាំងពាក់កណ្តាលយប់ថ្ងៃអាទិត្យចុងសប្តាហ៍មុន តាមបញ្ជារបស់លោក ហ៊ុន សែន ដោយចោទថា លោក កឹម សុខា ថាបានប្រព្រឹត្តអំពើក្បត់ជាតិ និងចារកម្មឃុបឃិតជាមួយបរទេសផ្ដួលរំលំរដ្ឋាភិបាល។
បន្ទាប់ពីចំណាយពេលសួរចម្លើយ លោក កឹម សុខា ពេញមួយថ្ងៃកាលពីថ្ងៃចន្ទ ទី៤ កញ្ញាម្សិលមិញនៅថ្ងៃនេះអយ្យការអមសាលាដំបូងរាជធានីភ្នំពេញបានចេញសេចក្តីថ្លែងការណ៍មួយ ដោយបានសម្រេចចោទប្រកាន់លោក កឹម សុខា តាមបញ្ញាត្តិនៃមាត្រា៤៤៣ ពីបទសន្និដ្ឋិភាពជាមួយបរទេស ដោយតុលាការចាត់ទុកថាទំនាក់ទំនងរបស់ លោក កឹម សុខា ជាមួយបរទេសនេះថាជាទំនាក់ទំនងដែលក្បត់ជាតិកម្ពុជា។
ក្នុងសេចក្តីថ្លែងការណ៍នោះបានសរសេរថា៖ «ផ្អែកតាមសម្តីជាចំហររបស់លោកកឹម សុខា នៅក្នុងវីដេអូក្លីបដែលកំពុងផ្សព្វផ្សាយមកដល់ពេលនេះ រួមទាំងភស្ភុតាងដែលអាជ្ញាធរមានសមត្ថកិច្ចប្រមូលបាន បង្ហាញច្បាស់ថា សកម្មភាពឃុបឃិតជាមួយបរទេសក្បត់កម្ពុជានេះ កើតមានពីឆ្នាំ១៩៩៣ ហើយផែនការនេះបន្តអនុវត្តជាជំហានៗ រហូតមកដល់ពេលបច្ចុប្បន្ននេះ។ ការធ្វើសកម្មភាពបន្តមកដល់ពេលនេះគឺកំណត់បានជាស្ថានភាពនៃបទល្មើសជាស្តែងដោយយោងតាមក្រមនីតិវិធីព្រហ្មទណ្ឌព្រះរាជាណាចក្រកម្ពុជា»។
បើរកឃើញកំហុសពិតមែនតាមក្រមព្រហ្មទណ្ឌកម្ពុជា លោក កឹម សុខា អាចប្រឈមនឹងទោសដាក់ពន្ធនាគារពី១៥ឆ្នាំ ទៅ៣០ឆ្នាំ។
គណបក្សសង្គ្រោះជាតិបានចាត់ទុកថាការចាប់ខ្លួនលោក កឹម សុខា នេះជាការគំរាមកំហែងផ្នែកនយោបាយ រំលោភរដ្ឋធម្មនុញ្ញកម្ពុជា និងស្នើឲ្យដោះលែងប្រធានគណបក្សខ្លួនដោយគ្មានលក្ខខណ្ឌ។
តំណាងអង្គការសហប្រជាជាតិ និងស្ថានទូតធំៗរួមមាន អង់គ្លេស អូស្ត្រាលី អាមេរិក និងសហភាពអឺរ៉ុបនិងប្រទេសមួយចំនួនទៀត បានសម្តែងការព្រួយបារម្ភជាខ្លាំង ជុំវិញការចាប់ខ្លួនលោក កឹម សុខា ហើយពួកគេ ជំរុញឲ្យរដ្ឋាភិបាលកម្ពុជា បញ្ឈប់ការគំរាមកំហែងលើគណបក្សប្រឆាំង។
លោក កឹម សុខា គឺជាមនុស្សទី៣ ដែលត្រូវបានរដ្ឋាភិបាលរបស់លោក ហ៊ុន សែន បញ្ជាឲ្យអាជ្ញាធរចាប់ខ្លួនដាក់ពន្ធនាគារ បន្ទាប់ពីលោក ញឹក ប៊ុនឆៃ ប្រធានគណបក្សខ្មែររួបរួមជាតិ ដោយចោទពីបទ «ផលិតគ្រឿងញៀន» និងលោក សួន សេរីរដ្ឋា ប្រធានគណបក្សអំណាចខ្មែរ ដោយចោទពីបទ «ប្រមាថកងទ័ពជាតិ» និងប្រមាថព្រះមហាក្សត្រ៕
