ស្ថានទូតបារាំងប្រចាំនៅកម្ពុជា គ្រោងនឹងធ្វើពិធីរម្លឹកខួប៥០ឆ្នាំនៃដំណើរទស្សនៈកិច្ចរបស់លោកឧត្តមសេនីយ៍ ដឺហ្គោល នៅកម្ពុជា នៅថ្ងៃទី១០-១១ ខែតុលា ។ នេះបើតាមសេចក្តីប្រកាសព័ត៌មានរបស់ស្ថានទូតបារាំង។
ពិធីអបអរខួបទី៥០ឆ្នាំ នៃដំណើរទស្សនកិច្ចរបស់លោក ដឺហ្គោល នៅកម្ពុជានេះ សម្រេចធ្វើឡើងជាលើកទី២ ក្រោយពិធីរម្លឹកខួបលើកដំបូងកាលពី២០ឆ្នាំមុន បានធ្វើឡើងក្នុងអំឡុងទសវត្សឆ្នាំ១៩៩០។
បើតាមសេចក្តីប្រកាសព័ត៌មានដដែល ពិធីរម្លឹកខួប៥០ឆ្នាំនេះ នឹងមានការរៀបចំកម្មវិធីផ្សេងៗ ដូចជា ស្និសីទស្តីពី «ស្មារតីនៃសុន្ទកថាក្រុងភ្នំពេញនិងកម្ពុជា» ពិព័រណ៍និងទស្សនីយភាពពាក់ព័ន្ធនឹងឥទ្ធិពលនៃដំណើរទស្សកិច្ចរបស់លោកឧត្តមសេនីយ៍ ដឺហ្គោល។
ទំនាក់ទំនងមិត្តភាព និងស្ថេរភាពរវាងកម្ពុជា និងប្រទេសបារាំង ត្រូវបានគេកត់សម្គាល់ដោយព្រឹត្តិការណ៍ប្រវត្តិសាស្ត្រជាច្រើន ក្នុងនោះមានដំណើរទស្សនកិច្ចផ្លូវរដ្ឋរបស់លោកឧត្តមសេនីយ៍ ដឺហ្គោល ក្នុងអំឡុងឆ្នាំ១៩៦៦ ដែលបានធ្វើឡើងក្នុងលក្ខណៈទ្វេភាគី មិត្តភាព និងសាមគ្គីភាព ទៅលើជោគវាសនានៃប្រទេសកម្ពុជានិងបារាំង ក្នុងរយៈពេលជាងកន្លះសតវត្សកន្លងទៅ។
ប្រទេសកម្ពុជាបានឋិតនៅក្រោមនឹមអាណានិគមនិយមបារាំងអស់រយៈពេល៩០ឆ្នាំ ពោលគឺចាប់ពីឆ្នាំ១៨៦៣ ដល់ឆ្នាំ១៩៥៣៕
