មេដឹកនាំនិស្សិតហុងកុង និងជាសកម្មជនប្រជាធិបតេយ្យ Joshua Wong ត្រូវបានអាជ្ញាធរថៃឃាត់ខ្លួននៅឯព្រលានយន្តហោះសុវណ្ណភូមិ កាលពីយប់មិញ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដែលបានដកស្រង់សេចក្ដីប្រកាសព័ត៌មានពីគណបក្ស Demosisto របស់សកម្មជនរូបនេះ។
AFP បានបន្តថា លោក Wong បានធ្វើដំណើរតាមជើងហោះហើរក្រុមហ៊ុន Emirate ពីទីក្រុងហុងកុងទៅទីក្រុងបាងកក ជាទីដែលសកម្មជនរូបនេះគ្រោងថ្លែងទៅកាន់និស្សិតនៅសាកលវិទ្យាល័យជូឡាឡុងកន នៅថ្ងៃព្រហស្បតិ៍ស្អែកនេះ។
នៅលើទំព័រហ្វេសប៊ុករបស់ខ្លួន គណបក្ស Demosisto បាននិយាយថា ពួកគេទទួលបានការជូនដំណឹងពីសកម្មជននិស្សិតថៃ លោក នីតិវិត ចូតិផាត់ផៃសល្យ អំពីការឃាត់ខ្លួនលោក Wong នៅព្រលានយន្តហោះ។ សកម្មជននិស្សិតថៃ បន្ថែមថា អាជ្ញាធរថៃទទួលសម្ពាធពីចិនជុំវិញដំណើរទស្សនកិច្ចរបស់លោក Wong។
AFP បានដកស្រង់ខ្លឹមសារនៃសេចក្ដីប្រកាសព័ត៌មាននោះថា គណបក្ស Demosisto ថ្កោលទោសយ៉ាងខ្លាំងក្លាចំពោះអន្តរាគមន៍របស់រដ្ឋាភិបាលថៃ ទៅលើការកម្រិតសេរីភាព និងសិទ្ធិចូលប្រទេសនេះរបស់លោក Wong៕
គណបក្សនេះក៏បានអំពាវនាវឲ្យដោះលែងលោក Wong ជាបន្ទាន់ផងដែរ ហើយបានស្នើសុំជំនួយពីក្រសួងអន្តោប្រវេសន៍ហុងកុង ដើម្បីធានាសុវត្ថិភាពរបស់សកម្មជនរូបនេះ៕