ក្នុងពិធីសម្ពោធរឿង «ម្ចាស់បំណុល» កាលពីពេលថ្មីៗ លោក អ៊ិន សុភិន ដែលជាផលិតកររឿងនិងជាម្ចាស់ផលិតកម្មមហាហង្ស បានអះអាងថាក្នុងការផលិតរឿងភាគ ប្រសិនបើខាងផលិតករនីមួយៗ មិនមានដើមទុនចំណាយជាមុនរង្វង់១៥ម៉ឺនដុល្លារនោះទេ គឺបញ្ហាគុណភាពនឹងនៅតែកើតមានឡើង។ ក្នុងនោះបញ្ហារំពឹងទុនពីការលក់រឿងអោយប៉ុស្ដិ៍ ដោយមិនមានទុនបម្រុងតម្កល់ទុកក៏ជាបញ្ហាចោទផងដែរ សម្រាប់ផលិតករដែលត្រូវការគុណភាព។
លោក អ៊ិន សុភិន បានទទួលស្គាល់ថាភាពយន្តភាគនៅក្នុងប្រទេសកម្ពុជានៅមិនទាន់អាចប្រៀបប្រដូចនឹងភាពយន្តបរទេសនោះទេ ដោយសារតែបញ្ហាចំណាយដើមទុនមានកម្រិតខុសគ្នា។ លោកថាខ្សែភាពយន្តបរទេសមួយភាគៗ គេហ៊ានប្រើទុនដល់ច្រើនពាន់ដុល្លារ ដោយក្នុងរឿងខ្លះគេប្រើរហូតដល់ខ្ទង់ម៉ឺនដុល្លារក៏មាន ទើបជាហេតុធ្វើអោយភាពយន្តរបស់គេមានស្ដង់ដារ។ ប៉ុន្តែងាកមកមើលភាពយន្តភាគរបស់ប្រទេសកម្ពុជា មួយភាគៗ លោកថារឿងខ្លះចំណាយនៅក្រោម១ពាន់ដុល្លារក៏មានដែរ ទើបលោកយល់ថាជារឿងគួរសរសើរទៅវិញទេ ដែលរឿងភាគខ្មែរនៅតែអាចទទួលយកបាន។ លោកថាភាពយន្តបើចង់អោយមានគុណភាពត្រូវប្រើមួយរឿង១៥ម៉ឺនដុល្លារ ឬមួយភាគរង្វង់៣ពាន់ដុល្លារ បើមិនដូច្នេះទេ គឺកម្រិតគុណភាពនឹងនៅតែមិនអាចទៅរួច។
លោកនិយាយថា៖ «សម្រាប់ខ្ញុំមួយរឿង (ភាពយន្តភាគ) បើក្រោម១៥ម៉ឺនធ្វើអត់ល្អទេ ព្រោះទី១ យើងត្រូវការយកតួសម្ដែងល្អមកលេង ត្រូវប្រើកាមេរ៉ាកម្រិតខ្ពស់ និងត្រូវការបច្ចេកទេសដែលមានជំនាញ អ៊ីចឹងបើត្រឹមមួយរឿង១៥ម៉ឺនដុល្លារ ឬមួយភាគ៣ពាន់ដុល្លារ ទើបផលិតករម្នាក់ៗ អាចផលិតរឿងបានល្អ!»។
លោកថា លោកធ្លាប់ផលិតរឿងដែលមានការចំណាយតិចជាងនេះដាច់ឆ្ងាយ គឺទើសចិត្តចំពោះគុណភាពយ៉ាងខ្លាំង ដោយសារតែការចាត់ចែងគឺត្រូវកាត់បន្ថយ និងសន្សំសំចៃគ្រប់ផ្នែក។ ក្នុងនោះការជ្រើសរើសតួដែលមានកេរ្តិ៍ឈ្មោះអោយមកសម្ដែងក៏ពិបាកផងដែរ ដោយសារតែតារាសម្ដែងដែលមានសមត្ថភាព និងមានឈ្មោះល្បី សុទ្ធតែមិនថតក្នុងតម្លៃទាប។
លោកនិយាយថា៖ «រឿងដុំអត់ពិបាកទេ ដោយសារជារឿងដែលផលិតកម្មនីមួយៗផលិតខ្លួនឯង ចឹងផលិតឲ្យកាន់តែល្អ ក៏ទាក់ទាញរកចំណូលបានច្រើនដែរ ប៉ុន្តែសម្រាប់រឿងភាគអត់ចឹងទេ បើប៉ុស្ដិ៍(ទូរទស្សន៍)គាត់អោយយើងមួយភាគប៉ុន្មានគឺទាល់តែលៃតាមហ្នឹង ចឹងហើយទើបរឿងខ្លះទទួលស្គាល់ថាខ្វះខាតគុណភាពមែន!»។
លោកថា មួយភាគកាលពីមុនចំណាយរង្វង់១ពាន់ដុល្លារបាន ប៉ុន្តែលុះត្រាតែ ១ ៧០០– ១ ៨០០ទើបបាន ហើយនៅមិនទាន់ល្អទេ ដោយត្រូវចំណាយរង្វង់៣ពាន់ដុល្លារ ទើបមានស្ដង់ដារទទួលយកបាន។ លោកថាមកទល់ពេលនេះ បណ្ដាស្ថានីយទូរទស្សន៍ជាដៃគូ បានដំឡើងអោយមួយភាគខ្ពស់ជាងមុន ហើយលោកក៏ផលិតផ្ទៃរឿងអាស្រ័យទៅលើតម្លៃចចារផងដែរ។
លោក អ៊ិន សុភិន បន្តថាខ្សែរឿងរបស់លោកនៅប៉ុស្ដិ៍ផ្សេងគឺមានរឿងខ្លះផលិតក្រោមមួយភាគ៣០០០ដុល្លារ ប៉ុន្តែសម្រាប់ជាមួយទូរទស្សន៍ PNN អត់មានរឿងណាដែលលោកចំណាយក្រោម៣ពាន់ដុល្លារនោះទេ ដោយសារតែស្ថាប័ននោះប្រឹទព្រៀងគុណភាពរឿង។ ជាក់ស្ដែងរឿង «បំភ្លេចមិនបាន» ដែលបានដាក់បញ្ចាំង និងរឿង «ម្ចាស់បំណុល» ដែលលោកទើបប្រកាសចេញថត គឺសុទ្ធតែគ្រោងចំណាយដល់កម្រិតនោះ។
លោកនិយាយថា៖ «នៅPNN រឿងគាត់កម្រិតខុសគេ តែគាត់ក៏អោយថ្លៃយើងខ្ពស់ដែរ អ៊ីចឹងហើយទើបខ្ញុំហ៊ានចាយមួយភាគ៣ពាន់ដុល្លារធ្វើអោយគាត់ ដោយគ្រាន់តែរឿង«ម្ចាស់បំណុល»មួយ ខ្ញុំគ្រោងចំណាយ១៥ម៉ឺនដុល្លារ!»។
លោកថា ការផលិតភាពយន្តគឺជារឿងស្មុគស្មាញ ជាពិសេសផលិតករដែលខ្វះខាតទុន ដែលបណ្ដាលអោយរាំងស្ទះកណ្ដាលទី។ ក្នុងនោះបញ្ហាតម្រូវអោយតួរង់ចាំទទួលថវិការហូតទាល់តែភាពយន្តត្រូវបានបញ្ចាំង ក៏ជាហេតុផលប៉ះពាល់គុណភាពរឿងផងដែរ ដោយសារតែតួបាត់បង់ទឹកចិត្តចង់សម្ដែង ហើយផលិតករដែលមានបញ្ហារឿងបណ្ដាក់លុយតួ ក៏ទឹកមាត់មិនសូវប្រៃក្នុងពេលចុះថត។ លោកទទូចអោយបណ្ដាទូរទស្សន៍ហ៊ានចំណាយទិញរឿងខ្មែរក្នុងកម្រិតកាន់តែល្អ ដើម្បីអោយផលិតករអាចផលិតមួយភាគដល់៣ពាន់ដុល្លារ អោយរឿងមានគុណភាពគ្រប់គ្រាន់។
លោកថាខ្សែរឿង «ម្ចាស់បំណុល!» គឺជារឿងដែលសាកល្បងផលិតអោយអស់ដល់១៥ម៉ឺនដុល្លារ ឬមួយភាគ៣ពាន់ដុល្លារ ដោយប្រកាសថាមិនឆិនឆៃដូចការផលិតបណ្ដារឿងកន្លងមកទេ ដើម្បីកុំអោយPNN អន់ចិត្ត។
លោកនិយាយថា៖ «ក្នុងចំណោមរឿងភាគទាំងអស់ដែលខ្ញុំផលិត តាមមើលរឿង«ម្ចាស់បំណុល»ប្រហែលជាថតមួយភាគអត់ក្រោម៣ពាន់ដុល្លារទេ ព្រោះ PNN បើនិយាយហើយធ្វើអត់ដូចកុងត្រា ពិតជាដើរជាមួយគ្នាអត់កើត ចឹងបានរឿងហ្នឹងអត់កេងទេ ប្រហែលមានតែអស់ច្រើនជាង១៥ម៉ឺនដុល្លារផងមួយរឿងហ្នឹង!»។
លោកថា ១៥ម៉ឺនដុល្លារសម្រាប់រឿងភាគមិនច្រើននោះទេ ប៉ុន្តែលុះត្រាតែតម្លៃប៉ុណ្ណឹងទើបធ្វើរឿងអាចទទួលយកគុណភាពបានសម្រាប់ភាពយន្តភាគខ្មែរ៕
