អត្រាអ្នកគ្មានការងារធ្វើនៅអាមេរិក បានធ្លាក់ចុះមកដល់កម្រិតទាបបំផុតនៅក្នុងរយៈពេល ១០ឆ្នាំចុងក្រោយនេះ ដោយសារតែការងើបឡើងវិញដ៏ខ្លាំងនៅក្នុងទីផ្សារការងារកាលពីខែមេសា ដែលនាំមកនូវអារម្មណ៍រំសាយមួយសម្រាប់លោក ដូណាល់ ត្រាំ បន្ទាប់ពីខកបំណងនឹងបញ្ហាកំណើនសេដ្ឋកិច្ចនៅដើមអាណត្តិរបស់លោក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រសួងការងារអាមេរិក បានចេញរបាយការណ៍នៅថ្ងៃនេះថា ក្រោយពីមានកំណើនយឺតកាលពីខែមីនា ម៉ាស៊ីនសេដ្ឋកិច្ចអាមេរិកបានបន្ថែមការងារថ្មីប្រហែល ២១ម៉ឺន ១ពាន់កន្លែងបន្ថែមទៀត ខណៈដែលអត្រាអ្នកអត់ការងារធ្វើធ្លាក់មកនៅត្រឹមកម្រិត ៤.៤ភាគរយ ពោលគឺជាអត្រាទាបបំផុតគិតចាប់តាំងពីខែឧសភា ឆ្នាំ២០០៧មក។
តួលេខនេះបានជួយពង្រឹងធនាគារកណ្ដាលអាមេរិក ឲ្យអនុវត្តតាមផែនការដំឡើងអត្រាការប្រាក់ ២បន្ថែមទៀត នៅឆ្នាំ២០១៧នេះ និងអាចធ្វើឲ្យមានក្ដីបារម្ភអំពីអត្រាអតិផរណា។
លទ្ធផលនេះ ខុសទៅនឹងអ្វីដែលក្រុមអ្នកវិភាគបានព្យាករទុក ដោយថា នឹងមានការងារថ្មី ១៨ម៉ឺនកន្លែងនៅខែមុន ដែលអាចធ្វើឲ្យអត្រាអ្នកអត់ការងារធ្វើចុះមកនៅត្រឹមតែ ៤.៦ភាគរយប៉ុណ្ណោះ៕
