សហរដ្ឋអាមេរិក និងចិន បានចាប់ផ្ដើមកិច្ចពិភាក្សាសេដ្ឋកិច្ច និងយុទ្ធសាស្ត្រប្រចាំឆ្នាំរបស់ពួកគេ នៅទីក្រុងប៉េកាំង នៅថ្ងៃចន្ទនេះ ខណៈកំណើននៃភាពតានតឹងជុំវិញជម្លោះនៅសមុទ្រចិនខាងត្បូង បានគំរាមកំហែងទៅលើជំនួបនេះ។
យោងតាមទីភ្នាក់ងារព័ត៌មាន AFP ប្រធានាធិបតីចិន លោក ស៊ី ជិនពីង បានថ្លែងនៅក្នុងសុន្ទរកថាបើកកិច្ចប្រជុំថា ចិន និងអាមេរិក ត្រូវការបង្កើនទំនុចចិត្តនឹងគ្នាទៅវិញទៅមក ដោយលោកបានអំពាវនាវឲ្យបង្កើនកិច្ចខិតខំប្រឹងប្រែងគ្រប់គ្រងជម្លោះ និងបញ្ចៀសការវិនិច្ឆ័យខុស។
ប្រទេសចិន បានអះអាងជាម្ចាស់លើដែនទឹកស្ទើរតែទាំងអស់នៅសមុទ្រចិនខាងត្បូង បើទោះបីជាមានការអះអាងជាម្ចាស់ពីសំណាក់បណ្ដាប្រទេសជិតខាងនៅតំបន់អាស៊ីអាគ្នេយ៍ក៏ដោយ ហើយចិនបានកសាងកោះសិប្បនិម្មិតនានា នៅតំបន់នោះ សម្រាប់ប្រើប្រាស់ធ្វើជាមូលដ្ឋានយោធា។
ក្រុងវ៉ាស៊ីងតោន បានឆ្លើយតបនឹងបញ្ហានេះ ដោយបានបញ្ជូននាវាចម្បាំងទៅកៀកនឹងកោះប៉ប្រះទឹកដែលចិនអះអាងជាម្ចាស់នោះ ដោយបានធ្វើឲ្យចិនខឹងសម្បារយ៉ាងខ្លាំង។
កិច្ចប្រជុំរវាងប្រទេសទាំងពីរនេះ គ្រោងលើកយកបញ្ហានានាលើសពីជម្លោះសមុទ្រចិនខាងត្បូងទៅទៀត ក្នុងនោះមានទាំងការប្រែប្រួលអាកាសធាតុ សុវត្ថិភាពប្រព័ន្ធអ៊ិនធឺណិត ភេរវកម្ម ពាណិជ្ជកម្ម និងកិច្ចសហប្រតិបត្តិការផ្នែកសេដ្ឋកិច្ច៕
