ក្រសួងការបរទេសអាមេរិក បាននិយាយថា រដ្ឋមន្ត្រីការបរទេសអាមេរិក លោក John Kerry បានជជែកជាមួយរដ្ឋមន្ត្រីការបរទេសចិន លោក Wang Yi តាមទូរស័ព្ទ កាលពីថ្ងៃសុក្រ ម្សិលមិញ អំពីដំណើរទស្សនកិច្ចរបស់ប្រធានាធិបតីអាមេរិក លោក បារ៉ាក់ អូបាម៉ា ទៅកាន់ខេត្ត Hangzhou ប្រទេសចិន និងការចូលរួមក្នុងជំនួបប្រទេសមានសេដ្ឋកិច្ចធំទាំង ២០។
ទីភ្នាក់ងារព័ត៌មាន Reuters បានដកស្រង់ខ្លឹមសារសេចក្ដីប្រកាសព័ត៌មានក្រសួងការបរទេស ដែលបាននិយាយថា លោករដ្ឋមន្ត្រីការបរទេស John Kerry និងលោករដ្ឋមន្ត្រីការបរទេស Wang Yi ក៏បានពិភាក្សាគ្នាផងដែរអំពីការឆ្លើយតបដ៏សមរម្យទៅនឹងទង្វើគឃ្លើននាពេលថ្មីៗនេះរបស់កូរ៉េខាងជើង។
កាលពីថ្ងៃពុធកន្លងមកនេះ កូរ៉េខាងជើង បានបាញ់គ្រាប់មីស៊ីលមួយទៀត ដែលបានធ្លាក់ចូល ឬនៅជិតដែនទឹករបស់ជប៉ុនជាលើកដំបូង៕