លោកនាយរដ្ឋមន្ត្រី ហ៊ុន សែន រួមជាមួយគណៈប្រតិភូជាន់ខ្ពស់កម្ពុជា នៅព្រឹកថ្ងៃនេះ បានធ្វើដំណើរចាកចេញពីប្រទេសកម្ពុជា ដើម្បីបំពេញទសន្សកិច្ចផ្លូវការរយៈពេល ៣ថ្ងៃ នៅក្នុងប្រទេសជប៉ុន។
នៅលើទំព័រហ្វេសប៊ុកផ្លូវការរបស់លោក លោកនាយករដ្ឋមន្ត្រី បានរៀបរាប់ថា រូបលោក និងគណៈប្រតិភូជាន់ខ្ពស់ បានចាកចេញពីកម្ពុជាទៅបំពេញទស្សនកិច្ចផ្លូវការនៅប្រទេសជប៉ុន ចាប់ពីថ្ងៃទី០៦ ដល់ថ្ងៃទី០៩ ខែសីហានេះ។
លោក ហ៊ុន សែន ឲ្យដឹងថា ក្នុងដំណើរទស្សនកិច្ចនេះ លោកនឹងជួបពិភាក្សាការងារជាមួយនាយករដ្ឋមន្ត្រីជប៉ុន ហ្ស៊ិនហ្ស៊ូ អាបេ មុននឹងមេដឹកនាំទាំងពីរធ្វើជាសាក្សីនៃពិធីចុះហត្ថលេខាលើឯកសារជំនួយឥតសំណង ៣៥លានដុល្លារ និងកម្ចីឥណទានទំហំ ២០៩លានដុល្លារ។
លោក ហ៊ុន សែន បញ្ជាក់ថា ទឹកប្រាក់ជំនួយ ៣៥លានដុល្លារ នឹងត្រូវប្រើប្រាស់សម្រាប់គម្រោងធ្វើឲ្យប្រសើរឡើងវិញការការពារទឹកជំនន់ក្នុងរាជធានីភ្នំពេញ ខណៈកម្ចីឥណទាន ២០៩លានដុល្លារ នឹងត្រូវប្រើប្រាស់សម្រាប់អភិវឌ្ឍកំពង់ផែកុងតឺន័រថ្មីនៅកំពង់ផែស្វយ័តក្រុងព្រះសីហនុ៕
