តំណាងរាស្ត្រគណបក្សសង្គ្រោះជាតិហៅសេចក្តីស្នើច្បាប់វិសោធនកម្ម ស្តីពីលក្ខន្តិកៈមន្ត្រីរាជការ ដែលបានដាក់ជូនរដ្ឋសភាអនុម័តនៅថ្ងៃសុក្រនេះ ថាអាចនឹងធ្វើឲ្យស្ថាប័នមន្ត្រីរាជការពោពេញដោយបក្ខពួក ដោយសារមាត្រាថ្មីនៃច្បាប់នេះ បានបើកឱកាសឲ្យប្រធានអង្គភាព ឬស្ថាប័នរដ្ឋ អាចចាប់តំឡើងឋានៈដល់មន្ត្រីរបស់ខ្លួនបាន។
សភាជាតិនៃព្រះរាជាណាចក្រកម្ពុជា បានបើកសម័យប្រជុំពេញអង្គរបស់ខ្លួននៅព្រឹកទី៧ខែមេសានេះ ឡើងវិញបន្ទាប់ពីវិស្សមកាល។ ក្នុងការបើកសម័យប្រជុំពេញអង្គនេះ សភាបានទទួលយកវិសោធនកម្មច្បាប់ស្តីពីលក្ខន្តិកៈមន្ត្រីរាជការមកពិភាក្សានឹងអនុម័ត ក្នុងការការជជែកពិភាក្សាទៅលើវិសោធនកម្មច្បាប់ថ្មីនេះ តំណាងរាស្ត្រគណបក្សសង្គ្រោះជាតិ លោក ងឹម ញេង បានថ្លែងក្នុងអង្គប្រជុំថា មាត្រាមួយចំនួននៃវិសោធនកម្មនេះ អាចធ្វើឲ្យប៉ះពាល់ដល់ការងាររបស់មន្ត្រីរាជការ និងអាចធ្វើឲ្យយុវជនមួយចំនួនបាត់ឱកាសធ្វើជាមន្ត្រីរាជការ ហើយមាត្រាទី៣៣ថ្មី នៃច្បាប់ស្តីពីវិសោធនកម្មនេះ នឹងអាចធ្វើឲ្យប៉ះពាល់ទឹកចិត្តមន្ត្រីរាជការ ដោយសារតែមាត្រានេះបានចែងថា ការតំឡើងថ្នាក់សម្រាប់មន្ត្រីរាជការ គឺត្រូវធ្វើឡើងដោយការជ្រើសរើស ដែលលោកថា ការចែងបែបនេះនឹងអាចបង្កឲ្យបក្ខពួកក្នុងស្ថាប័នរដ្ឋ។
លោកថា៖ «កាលណាការតំឡើងថ្នាក់ដោយធ្វើការជ្រើសរើសហ្នឹង គឺវាហាក់ដូចជាផ្តល់អំណាច ដល់ប្រធានស្ថាប័នដែលរៀបចំការតំឡើងថ្នាក់ហ្នឹង ដល់អញ្ចឹងមន្ត្រីរាជការដែលអត់មានបក្ខពួកអត់មានខ្សែអីនឹងមិនត្រូវបានគេជ្រើសរើសទេ អញ្ចឹងការកសាងច្បាប់នវគឺយើងធ្វើមិចឲ្យអ្នកអនុវត្តន៍ហ្នឹងទទួលបានផលស្មើៗគ្នា អញ្ចឹងខ្ញុំយល់ថាពាក្យថា លើសពីនេះការតំឡើងថ្នាក់ត្រូវធ្វើឡើងដោយការជ្រើសរើសហ្នឹងគឺគួរតែលុបចោល គឺត្រូវដាក់ថានឹងគ្រប់ក្របខណ្ឌទៅបានហើយ មិនគួរថាជ្រើសរើសព្រោះថាការតំឡើងនោះគឺមានគណកម្មាការសម្រាប់តំឡើងហើយ»។
តំណាងឲ្យតំណាងរាស្ត្រហត្ថលេខីលើវិសោធនកម្មនេះ លោក ហ៊ូ ស្រ៊ី មានប្រសាសន៍ឆ្លើយតបថា ការធ្វើវិសោធនកម្មនេះ គឺធ្វើដោយផ្អែកទៅលើច្បាប់នានា ដែលពាក់ព័ន្ធ ហើយលោកថា វាមិនបានប៉ះពាល់ដល់លក្ខខន្តិកៈច្បាប់កាលពីមុននោះទេ។
ទោះជាយ៉ាងណា លោក ហ៊ូ ស្រ៊ី សុំមិនបកស្រាយបន្ថែមនោះទេ ដោយប្រគល់ភារៈនេះឲ្យលោកអគ្គលេខាធិការរដ្ឋសភា និងជាអ្នកចូលរួមពិនិត្យច្បាប់នេះ ធ្វើការបកស្រាយជំនួសលោកវិញ។
លោក ឡេង ប៉េងឡុង បានឆ្លើយតបទៅនឹងការលើកឡើងរបស់លោក ងឹម ញេង ថាការរៀបចំធ្វើវិសោធនកម្មនេះគឺធ្វើឡើងតាមគោលការណ៍មុខងារសាធារណៈ ដែលត្រូវពង្រឹងបន្ថែមដោយច្បាប់វិសោធនកម្មនេះ។
ចំពោះការលើកឡើងដែលថា វិសោធនកម្មនេះ នឹងធ្វើឲ្យមានបក្ខពួកនិយមនៅក្នុងស្ថាប័នរដ្ឋនោះ លោក ឡេង ប៉េងឡុង មានប្រសាសន៍ថា ការតំឡើងឋាន្តរស័ក្តិនេះ គឺធ្វើឡើងដោយចេញពីការសង្កេតរបស់ប្រធានស្ថាប័នទៅលើកិច្ចការរបស់មន្ត្រីខ្លួន មិនមានពាក់ព័ន្ធទៅនឹងបក្ខពួកនិយមនោះទេ។ លោកបញ្ជាក់ថា មន្ត្រីរាជការណា ដែលធ្វើការមិនកើត ឬខ្វះវិន័យនោះ នឹងមិនអាចត្រូវប្រធានស្ថាប័នខ្លួនតំឡើងឋានៈឲ្យនោះទេ។
លោកថា៖ «ក្នុងការតំឡើងឋាន្តរសិក្កិនេះ គេឲ្យថ្នាក់ដឹកនាំនេះមានសិទ្ធិមើល យើងមានអតីតភាពតែយើងគ្មានវិន័យអាហ្នឹងគេមិនឲ្យឡើងក៏បានដែរ។ ទាល់តែមានវិន័យ និងអតីតភាពបានឲ្យឡើង ហើយជ្រើសរើសត្រង់យើងធ្វើការល្អដែរបានគេជ្រើសរើស អញ្ចឹងគេចាត់ប្រភេទទាំងពីរហ្នឹងដើម្បីនឹង ឲ្យពិន្ទុ និងឲ្យមន្ត្រីរាជការណាដែលល្អៗ វាអញ្ចេស! អញ្ចឹងនៅក្នុងមាត្រា៣៣ហ្នឹងក៏ដូចជា គោលការសាធារណៈដទៃដែរគឺគេទុកឲ្យប្រធានស្ថាប័នលើកទឹកចិត្តជ្រើសរើស អ្នកដែលធ្វើការល្អគឺថាយើងជម្រុញឲ្យឡើងឋាន្តរសិក្ក័ អ្នកធ្វើការមិនល្អគឺយើងមិនឲ្យឡើង អាហ្នឹងគឺវាអញ្ចឹង»។
ទោះជាយ៉ាងណា ច្បាប់វិសោធនកម្មនេះ ត្រូវបានរដ្ឋសភាកម្ពុជាអនុម័តរួចហើយនៅព្រឹកថ្ងៃសុក្រនេះ ដោយសំឡេង៩៣លើ៩៨សំឡេង។ ច្បាប់នេះ ត្រូវបានក្រុមតំណាងរាស្ត្រហត្ថលេខីចំនួន២៩រូប ធ្វើសេចក្តីស្នើឲ្យកែប្រែចំនួន២២មាត្រា មកដល់សភាកាលពីថ្ងៃទី២០ខែមករាឆ្នាំ២០១៧។
អ្នកជំនាញខាងអភិបាលកិច្ចលោក ចាន់ វិបុល មានប្រសាសន៍ថា ប្រព័ន្ធគ្រប់គ្រងធនធានមនុស្សនៅកម្ពុជាពេលបច្ចុប្បន្ន មិនមានប្រព័ន្ធណាមួយ ដែលគួរឲ្យទុកចិត្តបានទេ ដោយថា ភាគតិចណាស់ដែលមន្ត្រីរាជការត្រូវបានជ្រើសឲ្យឡើងឋានៈតាមការងាររបស់ខ្លួននោះ។
លោកសង្កេតឃើញថា ការតែងតាំងតម្លើងឋាន្តរស័ក្កិទៅលើមន្ត្រីរាជការកម្ពុជាបច្ចុប្បន្ន គឺធ្វើឡើងតាមគោលការណ៍បក្សច្រើនជាង ដោយថាបញ្ហានេះ បណ្តាលមកពីប្រព័ន្ធរដ្ឋបាលកម្ពុជាបច្ចប្បន្ននេះ គឺនៅលាយឡំជាមួយបក្សនយោបាយ ដែលធ្វើឲ្យការសម្រេចជ្រើសរើស ឬតម្លើងឋាន្តរស័ក្កិទៅលើមន្ត្រីណាម្នាក់ គឺផ្តោតលើបក្សច្រើនជាង។
លោកថា៖ «យើងមើលប្រវត្តិរបស់វាប្រព័ន្ធគ្រប់គ្រងធនធានមនុស្សកម្ពុជាចាប់តាំងពីឆ្នាំ១៩៧៩មក អត់មានប្រព័ន្ធអី្វមួយដែលគួរឲ្យអាចជឿទុកចិត្តបានទេ អញ្ចឹងយើងអត់អាចរកឃើញការតម្លើងឋានៈមួយដែលធ្វើឡើងតាមប្រព័ន្ធគ្រប់គ្រងអភិបាលកិច្ចល្អទេ។ ខ្ញុំចង់និយាយឲ្យចំគឺមានប្រព័ន្ធបីនាពេលបច្ចុប្បន្ននេះ ទៅលើការឡើងឋានៈ ទីមួយគឺឡើងតាមរយៈគណបក្សនយោបាយ ទីពីរគឺឡើងតាមអំណាចទឹកប្រាក់ ទីបីគឺឡើងតាមទំនាក់ទំនងរវាងមេហើយនឹងកូនចៅ»។
បើតាមលោក ចាន់ វិបុល បញ្ហាសំខាន់នៃរឿងនេះ គឺត្រូវធ្វើយ៉ាងណាបំបែកកុំឲ្យអ្នកនយោបាយនៅលាយឡំជាមួយអ្នករដ្ឋបាល ទើបអាចធ្វើឲ្យប្រព័ន្ធរដ្ឋបាលរឹងមាំ និងអាចជៀសពីគណបក្សនិយមនៅក្នុងស្ថាប័នរដ្ឋនេះបាន។
លោកបន្តថា ប្រព័ន្ធច្បាប់ដ៏រឹងមាំមួយ បូករួមជាមួយការលើកទឹកចិត្តដល់មន្ត្រីរាជការស៊ីវិល ជាពិសេសគឺប្រព័ន្ធបោះឆ្នោតសភាឯកត្តនាម ដែលធ្វើយ៉ាងណា បំបែកកុំឲ្យសមាជិកសភាបម្រើ តែបក្សរបស់ខ្លួនដូចបច្ចុប្បន្ននេះ នោះគឺអាចរំដោះអ្នករដ្ឋបាលឲ្យចេញផុតពីអ្នកនយោបាយបានហើយ៕
