គនរបាលវៀតណាមនៅខេត្តជាប់ព្រំដែន បានឧបត្ថម្ភជាប្រេងម៉ាស៊ូតនិងលុយដល់នគរបាលខេត្តក្រចេះ ខណៈភាគីទាំងពីរបានបញ្ជាក់ជំហរពង្រឹងទំនាក់ទំនងនិងកិច្ចសហប្រតិបត្តិការក្នុងការទប់ស្កាត់បទល្មើសផ្សេងៗដែលកើតមានតាមព្រំដែន។
កិច្ចប្រជុំលើកទី២៨ និងលើកទិសដៅសហប្រតិបត្តិការលើកទី២៩របស់អាជ្ញាធរខេត្តក្រចេះរបស់កម្ពុជា និង អាជ្ញាធរខេត្តប៊ិញភឿករបស់វៀតណាមបានធ្វើឡើងនៅថ្ងៃទី៥ខែមេសា នៅស្នងការដ្ឋាននគរបាលខេត្តក្រចេះ។នេះបើតាមការចុះផ្សាយរបស់អគ្គស្នងការដ្ឋានគរបាលជាតិ។
នៅក្នុងកិច្ចប្រជុំនោះភាគីទាំងពីរបានពិភាក្សាពីការរក្សាសណ្តាប់ធ្នាប់តាមព្រំដែន ទប់ស្កាត់អំពើភេរវកម្ម ការជួញដូរអាវុធនិងឧក្រិដ្ឋកម្មផ្សេងៗទៀត។
ក្នុងឱកាសនោះ ភាគីវៀតណាមបានផ្តល់ប្រេងម៉ាស៊ូតចំនួន៤ពាន់លីត្រដល់ស្នងការនគរបាលខេត្តក្រចេះលោក លន់ សុផាត ទុកចាត់ចែងការងារក្នុងអង្គភាពនិង ផ្តល់លុយចំនួន១ម៉ឺនដុល្លារ សម្រាប់ជួយដល់ការកសាងអគារមជ្ឈមណ្ឌលកែប្រែអ្នកញៀនថ្នាំនិង ស្តារនីតសម្បទាដែលកំពុងកសាងឡើងនៅខេត្តក្រចេះ៕