មេដឹកនាំគណបក្សសង្គ្រោះជាតិ លោក កឹម សុខា បានថ្លែងថា ក្រុមអ្នកគាំទ្របក្សកាន់អំណាចបានបំភ្លៃការពិតជុំវិញកញ្ចប់ថវិកា ៥០ម៉ឺនដុល្លារ ដែលបក្សលោកបានសន្យាផ្ដល់ទៅឃុំ-សង្កាត់ នៅអំឡុងយុទ្ធនាការឃោសនាបោះឆ្នោត។ ប៉ុន្តែគណបក្សសង្រ្គោះជាតិ បានបញ្ជាក់គោលនយោបាយ៥០ម៉ឺនដុល្លារគឺទាល់តែគណបក្សប្រឆាំងឈ្នះការបោះឆ្នោត២០១៨ ទើបអាចអនុម័តថវិកាជាតិមកប្រើប្រាស់។
បន្ទាប់ពីបាត់បង់ការគ្រប់គ្រងនៅតាមឃុំ-សង្កាត់ដល់ទៅជិត៥០០ នៅទូទាំងប្រទេស ក្រុមអ្នកគាំទ្រគណបក្សប្រជាជនកម្ពុជា ត្រូវបានគេមើលឃើញថា កំពុងធ្វើយុទ្ធនាការជំរុញទៅប្រជាពលរដ្ឋ ឲ្យទាមទារថវិកាកន្លះលានដុល្លារ ដែលគណបក្សសង្គ្រោះជាតិ បានសន្យាផ្ដល់ទៅឃុំ-សង្កាត់ ក្រោយការបោះឆ្នោតថ្នាក់មូលដ្ឋានកាលពីចុងសប្ដាហ៍កន្លងមកនេះ។
ប៉ុន្តែក្នុង “វេទិកាថ្លែងអំណរគុណម្ចាស់ឆ្នោតនៅ” ស្រុកស្អាង ខេត្តកណ្ដាល នាព្រឹកថ្ងៃទី០៧ ខែមិថុនា នេះលោក កឹម សុខា បានថ្លែងថា ក្រុមអ្នកគាំទ្របក្សកាន់អំណាចទាំងនោះ កំពុងបំភ្លៃខុសពីការពិត និងធ្វើឲ្យប្រជាពលរដ្ឋមានការយល់ច្រឡំ។
លោកថ្លែងថា «មានក្រុមខ្លះ មានតំណាងរាស្ត្រ ជាអ្នកចេះដឹងខ្លះផង គេបំភ្ល័យពាក្យគេថាឥឡូវ ឃុំ ជិត៥០០ដែលសង្គ្រោះជាតិឈ្នះ គេប្រាប់ប្រជាពលរដ្ឋឲ្យទារកន្លះលាន ពីមេឃុំ ពីគណបក្សសង្គ្រោះជាតិពីលោក កឹម សុខា។ និយាយអញ្ចឹងចាញ់យើងទៀតហើយ បើចង់ឲ្យប្រជាពលរដ្ឋទារយកកន្លះលានដុល្លារបោះឲ្យសង្គ្រោះជាតិឈ្នះ កន្លះលាននឹងបានមែន នេះដូចជារុញគូថថែម និយាយថាយកចំណេញ តែទៅមកៗដូចរុញឲ្យប្រជាពលរដ្ឋខំបោះថែមទៀត បោះប៉ុណ្នឹងអត់ទាន់ធ្លាក់កន្លះលានទេ ទាល់តែបោះ២០១៨ទៀត បានធ្លាក់កន្លះលានមួយឃុំ»។
លោក កឹម សុខា ថ្លែងទៀតថា ក្នុងការបោះឆ្នោតឃុំ សង្កាត់ អាណត្តិនេះ នៅក្នុងស្រុកស្អាង ខេត្តកណ្តាល គណបក្សសង្គ្រោះជាតិឈ្នះ១២ឃុំ ក្នុងចំណោម១៦ឃុំ។ លោកថានេះជាសញ្ញាវិជ្ជមានមួយ នឹងធ្វើឲ្យបក្សសង្គ្រោះជាតិឈ្នះឆ្នោតដឹកនាំរដ្ឋាភិបាលនៅឆ្នាំ២០១៨ខាងមុខនេះ។
អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា មានប្រសាសន៍ថា លោកមិនចាប់អារម្មណ៍នឹងការលើក ឡើងរបស់លោក កឹម សុខា នោះទេ ដោយលោកថាពលរដ្ឋម្ចាស់ឆ្នោតគាត់យល់ច្បាស់ពីសារនយោបាយភូតកុហករបស់មេដឹកនាំបក្សប្រឆំាងរូបនោះ។
លោកនិយាយថា «សំខាន់ប្រជាពលរដ្ឋគាត់កាន់តែយល់ដឹងជាងមុន កាន់តែឆ្លាតជាងមុន ហើយអ្វីៗដែលយើងនិយាយជាមួយគាត់ ហើយយើងកុហកហើយ កុហកទៀត ប្រជាជនគាត់យល់ច្បាស់ហើយ ហើយអ្វីដែលយើងចង់ធ្វើអំពើល្អសម្រាប់ជាតិ និងសង្គម គឺយើងត្រូវការភាពច្បាស់លាស់ ហើយអ្វីទំាងអស់គឺត្រូវតែធ្វើទៅលើលទ្ធភាពជាក់ស្តែង ហើយធនធានជាក់ស្តែងរបស់ជាតិ»។
កាលពីពេលថ្មីៗនេះ មន្ត្រីនៅរាជបណ្ឌិតសភាកម្ពុជាមួយក្រុម ភាគច្រើនជាបណ្ឌិត រួមទាំងលោកបណ្ឌិត សុខ ទូច ផង អះអាងថា គោលនយោបាយលុយកន្លះលានដុល្លាររបស់គណបក្សសង្គ្រោះជាតិមិនទាន់អាចអនុវត្តន៍បានទេ ព្រោះមេឃុំចៅសង្កាត់មួយចំនួនសមត្ថភាពនៅទាប ប៉ុន្តែគណបក្សប្រឆំាងធានាថា នឹងបង្រៀនមេឃុំមកពីគ្រប់គណបក្សនយោបាយ ឲ្យចេះគ្រប់គ្រងលុយចំនួន៥០ម៉ឺនដុល្លារ ក្នុងការអភិវឌ្ឍមូលដ្ឋាន ជាលុយផ្តល់ពីថ្នាក់ជាតិប្រចាំឆ្នាំ បើគណបក្សសង្រ្គោះជាតិដឹកនាំរដ្ឋាភិបាលក្រោយបោះឆ្នោត២០១៨។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ យល់ថា ការលើកឡើងរបស់មន្ត្រីរដ្ឋាភិបាលដែលជំរុញឲ្យពលរដ្ឋទារលុយពីបក្សប្រឆំាងនោះ លោកថាការធ្វើយុទ្ធនាការអត្តឃាតខ្លួនឯង។ លោកនិយាយថា «នីតិវិធីនៃការប្រើប្រាស់ថវិកាជាតិគឺខុសពីអ្វីដែលពួកគេលើកឡើង ថវិកាឃុំនេះគឺជាថវិកាដែលអនុម័តឬក៏ឯកភាពពីរដ្ឋាភិបាល ហើយនឹងមានការឆ្លងកាត់អនុម័តពីសភាជាតិដែរ។ មិនមែនថវិកាបានមកពីប្រភពគណបក្សទេ វាជាថវិកាជាតិ បើសិនជាមហាជនគេដឹងពីនីតិវិធី ឬដំណើរការនៃការប្រើប្រាស់ថវិកា ឬក៏ប្រភពនៃថវិកាសម្រាប់ឃុំ សង្កាត់ វាធ្វើឲ្យតម្លៃអ្នកដែលនិយាយទំាងបំពាន គឺកាន់តែធ្លាប់ចុះវាធ្វើឲ្យប៉ះពាល់ធ្ងន់ធ្ងរដែរដល់ប្រជាប្រិយភាពរបស់គណបក្សនយោបាយដែលជាអ្នកគំាទ្រ ដែលគាត់បានធ្វើ»។
តាមលទ្ធផលក្រៅផ្លូវការបង្ហាញថា គណបក្សប្រជាជនកម្ពុជា ថយចុះមេឃុំ ចៅសង្កាត់ ពី១៥៩២ កាលពីឆ្នាំ២០១២ មកនៅ១១៥៨ ឆ្នាំ២០១៧ ខណៈគណបក្សសង្រ្គោះជាតិ កើនមេឃុំ ពីចំនួន៤០ ទៅដល់៤៨៧ មេឃុំ ចៅសង្កាត់៕