គ្រូបង្រៀន និងអ្នកគ្រប់គ្រងសាលានៅឯប្រទេសថៃ កំពុងតែជំរុញកម្មវិធីសិក្សាទូទាំងប្រទេស ដើម្បីអប់រំសិស្សក្មេងៗអំពីសុខាភាពផ្លូវភេទ ជាផ្នែកមួយនៃកិច្ចខិតខំប្រឹងប្រែង ដើម្បីកាត់បន្ថយចំនួនដ៏ខ្ពស់នៃសិស្សស្រីមានផ្ទៃពោះទាំងវ័យក្មេង។
សារព័ត៌មានបាងកកប៉ុស្តិ៍របស់ថៃ បានផ្សាយថា ការសម្រេចដូច្នេះ បានកើតឡើងក្រោយពីច្បាប់ស្ដីពីការបង្ការ និងដំណោះស្រាយបញ្ហាមានផ្ទៃពោះរបស់ក្មេងជំទង់ បានចូលជាធរមានកាលពីខែមុន។
កាសែតថៃមួយនេះ បានរាយការណ៍បន្តថា គ្រូបង្រៀន និងគណៈគ្រប់គ្រងសាលា នឹងផ្ដល់ការអប់រំអំពីការរួមភេទ និងឥរិយាបថត្រឹមត្រូវចំពោះការអប់រំអំពីការរួមភេទពីអ្នកជំនាញ។
លេខាធិការអចិន្ត្រៃយ៍នៃក្រសួងអប់រំថៃ លោក កាំចន តាទីយីកវី បាននិយាយថា សិស្សថៃ កាលពីមុន តែងតែបោះបង់ការសិក្សារបស់ពួកគេ នៅពេលពួកគេមានផ្ទៃពោះ ប៉ុន្តែ ចាប់ពីពេលបច្ចុប្បន្ននេះទៅ ក្រសួងអប់រំថៃ នឹងធានាថា គ្រប់ក្មេងស្រីទាំងអស់ មានសិទ្ធិស្មើគ្នាចំពោះការទទួលបានការអប់រំផ្លូវការ។
យោងតាមក្រសួងសុខាភិបាលសាធារណៈ ប្រទេសថៃមានចំណាត់ថា្នក់ទី ១៥ នៅអាស៊ី និងចំណាត់ថ្នាក់លេខ ៥ នៅក្នុងតំបន់អាស៊ីអាគ្នេយ៍ ជាប្រទេសដែលមានក្មេងស្រីមានផ្ទៃពោះទាំងវ័យក្មេងច្រើនជាងគេ។ ជាមធ្យម ក្មេងស្រីជំទង់ ៥២នាក់ ត្រូវបានគេរកឃើញថាមានផ្ទៃពោះ នៅក្នុងចំណោមក្មេងស្រីចំនួន ១ពាន់នាក់ មានវ័យចន្លោះ ១៥ឆ្នាំ ទៅ ១៩ឆ្នាំ។
អ្នកស្រី ចិត្តទិម៉ា ផានុតិឆា អ្នកសម្របសម្រួលលនៃមូលនិធិតស៊ូមតិតសុខភាពស្ត្រី បាននិយាយថា ក្មេងប្រុសជំទង់ ៩០ភាគរយ ពុំដឹងពីរបៀបប្រើប្រាស់ស្រោមនោះឡើយ ហើយក្មេងស្រីជំទង់ ៨០ភាគរយ ពុំបានដឹងពីវិធីលេបថ្នាំបង្ការមានផ្ទៃពោះនោះឡើយ ក្រោយពេលពួកគេរួមភេទរួចរាល់នោះ៕
