នាយករដ្ឋមន្ដ្រីបានព្រមានធ្ងន់ៗលើក្រុមអ្នកគាំទ្រគណបក្សសម្ព័ន្ធដើម្បីប្រជាធិបតេយ្យរបស់លោក ខឹម វាសនា ដោយប្រដៅឲ្យចេះប្រើពាក្យសម្ដីសមរម្យ ខណៈពួកគេនាំគ្នាចូលរួមផ្តល់យោបល់តាមហ្វេសប៊ុកនាយករដ្ឋមន្រ្តី។
លោកនាយករដ្ឋមន្ដ្រី ហ៊ុន សែន នៅថ្ងៃពុធនេះបានបង្ហោះសារលើហ្វេសប៊ុករបស់លោក ដោយផ្ញើសារមួយចូលរួមរំលែកទុក្ខមរណៈភាពអ្នកធ្វើអត្ថាធិប្បាយផ្នែកកីឡាលោក ម៉ា សេរី ដែលបានស្លាប់ដោយសារជំងឺមហារីកថ្លើមនៅព្រឹកថ្ងៃទី៨កុម្ភៈនេះ។
ប៉ុន្ដែនៅក្រោមសាររំលែកទុក្ខនោះ ក្រុមអ្នកគាំទ្រគណបក្សសម្ព័ន្ធដើម្បីប្រជាធិបតេយ្យ (LDP) ជាច្រើនបានលើកមតិថា៖ «បើរឿងកេងចំណេញយកប្រជាប្រិយភាពអ៊ីចឹង ដឹងលឿនណាស់ ត្រង់អ្នកស្ម័គ្រចិត្ត LDP ១៣នាក់ជាប់គុកយ៉ាងអយុត្តិធម៌ ផ្សាយស្ទើរគ្រប់សារព័ត៌មាន ផ្ញើតាមឆាតផង ខមមិនផង គាត់មិនដឹងសោះ។ ពិតជាអស្ចារ្យណាស់ នាយករដ្ឋមន្ដ្រីស្រុកខ្ញុំ»។
អ្នកខ្លះទៀតថា ករណីនៅចាប់ខ្លួននៅខេត្តកំពតនោះគឺ «តុលាការធ្វើតាមតែមាត់សម្ដេចប៉ុណ្ណោះ» និងខ្លះទៀតបានប្រើពាក្យសម្ដីអសុរសលើបណ្ដាញហ្វេសប៊ុករបស់លោក ហ៊ុន សែន។
បើតាមបណ្ដាញហ្វេសប៊ុក អ្នកគាំទ្រ LDP ភាគច្រើនបានស្នើឲ្យលោក ហ៊ុន សែន ជួយអន្ដរាគមន៍ដើម្បីដោះលែងសកម្មជន LDP ចំនួន១៣នាក់ ដោយពួកគេថា ករណីនោះបណ្ដាលមកពីការឃុបឃិតគ្នារបស់អាជ្ញាធរនៅខេត្តកំពត។
លោក ហ៊ុន សែន បានតបវិញថា សូមឲ្យអ្នកគាំទ្រ LDP ទាំងអស់និយាយស្ដីអ្វីឲ្យមានសេចក្ដីថ្លៃថ្នូរ និងសុជីវធម៌ ដោយលោកថា៖ «សូមបងប្អូនចូលមកនិយាយមានភាពថ្លៃថ្នូរនិងមានសុជីវធម៏។ តើមកពឹងខ្ញុំឬមកប្រដៅខ្ញុំឬមកជេរខ្ញុំ»។
កាលពីថ្ងៃ៤ កុម្ភៈ កន្លងទៅ សមាជិក LDP ចំនួន១៣នាក់ នៅស្រុកឈូក ខេត្តកំពត ត្រូវបានសមត្ថកិច្ចចាប់ខ្លួនពាក់ព័ន្ធជម្លោះដីធ្លីមួយនៅភូមិតេជោក្បាលដំរី។
អគ្គលេខាធិការរង LDP លោក ឆឺយ ប៊ុនធឿន អះអាងថា ការចាប់ខ្លួនសមាជិករបស់លោក គឺធ្វើឡើងដោយគ្មានដីកាចាប់ខ្លួនត្រឹមត្រូវតាមច្បាប់នោះទេ ខណៈអាជ្ញាធរថា អ្នកទាំង១៣នាក់នោះ ត្រូវបានចាប់ខ្លួន ពាក់ព័ន្ធនឹងការឈូសឆាយបំផ្លាញដំណាំប្រជាពលរដ្ឋនៅភូមិតេជោក្បាលដំរី ក្នុងឃុំតេជោអភិវឌ្ឍន៍។
ពាក់ព័ន្ធករណីនេះដែរ លោក ហ៊ុន សែន បញ្ជាក់ថា ការចាប់ឃុំខ្លួនសកម្មជន LDP ទាំងនោះ គឺបានធ្លាក់ដល់ដៃរបស់តុលាការហើយ និងបានណែនាំឲ្យពួកគេស្វែងរកមេធាវីដើម្បីការពារសកម្មជនទាំងនោះ ជាជាងមកបង្កភាពអនាធិបតេយ្យលើហ្វេសប៊ុករបស់លោក។
លោកថា៖ «រឿងនៅខេត្តកំពតបានស្ថិតក្នុងដៃតុលាការរួចទៅហើយ។ សុំរកមេធាវីតតាំងក្តី តាមផ្លូវតុលាការ។សូមកុំហួសហេតុពែកល្មមៗ បានហើយ»។
ប៉ុន្ដែបន្ទាប់ពីលោក ហ៊ុន សែន បានតបខមមិនដូច្នេះ ក្រុមអ្នកគាំទ្រ LDP បានឆ្លើយតបដោយថា ពួកគេគ្រាន់តែចង់ឲ្យលោកនាយករដ្ឋមន្ដ្រីជួយដោះស្រាយ ដើម្បីអាចដោះលែងសកម្មជនដែលជាប់ឃុំប៉ុណ្ណោះ។
ប្រមុខបក្ស LDP លោក ខឹម វាសនា នៅថ្ងៃពុធនេះដែរ បានសរសេរលើហ្វេសប៊ុកដោយទទូចឲ្យអ្នកគាំទ្ររបស់លោក ឈប់ចូលផ្ដល់មតិយោបល់លើហ្វេសប៊ុកលោក ហ៊ុន សែន ដោយថា ទុកឲ្យលោកនាយករដ្ឋមន្ដ្រីមានពេលវេលាគ្រប់គ្រាន់ដើម្បីសម្រេចអំពីរឿងនេះ។ ស្របពេលមានប្រតិកម្មពីលោកនាយករដ្ឋមន្ដ្រីដូច្នេះ លោក ខឹម វាសនា បែរជាចោទថា អាចមានអ្នកផ្សេងទៀតដែលមាននិន្នាការនយោបាយប្រឆាំងចូលបន្លំខ្លួនជាអ្នកគាំទ្រ LDP ដើម្បីបំពុលបរិយាកាសទៅវិញ៕