ក្រុមមន្ត្រីនិយាយនៅថ្ងៃនេះថា ហ្វីលីពីននឹងស្វែងរកជំនួយពីសហរដ្ឋអាមេរិក និងចិន ដើម្បីល្បាតផ្លូវសមុទ្រសំខាន់មួយ ខណៈដែលក្រុមសកម្មប្រយុទ្ធឥស្លាម បានផ្លាស់ប្ដូរការវាយប្រហារទៅលើនាវាដឹកជញ្ជូនអន្តរជាតិវិញ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រុមមន្ត្រីឆ្មាំឆ្នេរសមុទ្រ បាននិយាយថា ក្រុងម៉ានីលមិនចង់ឲ្យច្រកសមុទ្រ Sibutu ដែលស្ថិតនៅចន្លោះប្រទេសម៉ាឡេស៊ី និងហ្វីលីពីននោះ ក្លាយទៅជាជម្រកចោរសមុទ្រនោះឡើយ។
បើតាមមន្ត្រីឆ្មាំសមុទ្រហ្វីលីពីន ច្រកសមុទ្រទឹកជ្រៅ ដែលជាផ្លូវចេញចូលនៃនាវាដឹកទំនិញ ១ម៉ឺន ៣ពាន់គ្រឿង ក្នុងមួយឆ្នាំៗនោះ គឺជាផ្លូវសមុទ្រដ៏ខ្លីមួយភ្ជាប់ប្រទេសអូស្ត្រាលី ទៅនឹងប្រទេសចិន ជប៉ុន និងកូរ៉េខាងត្បូង។
កាលពីឆ្នាំមុន ក្រុមខ្មាន់កាំភ្លើងអាប៊ូសាយ៉ាហ្វមកពីភាគខាងត្បូងប្រទេសហ្វីលីពីន បានឡើងប្លន់លើនាវា និងចាប់ជំរិតបុគ្គលិកនាវារាប់សិបនាក់ នៅក្នុងដែនទឹកស្ថិតនៅចន្លោះប្រទេសម៉ាឡេស៊ី ឥណ្ឌូនេស៊ី និងហ្វីលីពីន៕