ក្រសួងមហាផ្ទៃក្រើនរំលឹកឲ្យអាជ្ញាធរលុបបំបាត់ប៉ុស្តិ៍ត្រួតពិនិត្យអាណាធិបតេយ្យតាមផ្លូវគោកនិងផ្លូវទឹក ខណៈមានការត្អូញត្អែរពីប្រជាពលរដ្ឋ អំពីបញ្ហាប៉ុស្តិ៍ត្រួតពិនិត្យអាណាធិបតេយ្យដើម្បីទារលុយនេះ។
នៅក្នុងសេចក្ដីណែនាំស្ដីពីការបង្កើនការត្រួតពិនិត្យលុបបំបាត់ប៉ុស្តិ៍ត្រួតពិនិត្យអាណាធិបតេយ្យ ចុះថ្ងែទី៦ ខែកុម្ភៈ ឆ្នាំ២០១៧ឲ្យដឹងថា ក្នុងរយៈពេលថ្មីៗនេះ មានប្រជាពលរដ្ឋត្អូញត្អែរអំពីបញ្ហាប៉ុស្តិ៍ត្រួតពិនិត្យអាណាធិបតេយ្យពីសំណាក់កងកម្លាំងសមត្ថកិច្ចនិងកម្លាំងផ្សេងៗទៀត ដែលបានប្រើប្រាស់សិទ្ធិអំណាចខុសច្បាប់ឬឆ្លៀតឱកាសដាក់ប៉ុស្តី៍ត្រួតពិនិត្យអាណាធិបតេយ្យដើម្បីទារលុយពីប្រជាពលរដ្ឋ ដែលបញ្ហានេះបានធ្វើឲ្យប៉ះពាល់ធ្ងន់ធ្ងរដល់ការអនុវត្តកម្មវិធីនយោបាយរបស់រាជរដ្ឋាភិបាល។
សេចក្ដីណែនាំឲ្យដឹងទៀតថា ដើម្បីលុបបំបាត់ប៉ុស្តិ៍ជជុះនេះ ក្រសួងមន្ត្រីនគរបាលទាំងអស់ត្រូវធ្វើការប្រជុំអប់រំ និងរំឮកណែនាំដល់កងកម្លាំងនគរបាលក្រោមឱវាទរបស់ខ្លួនឡើងវិញ និងចាត់វិធានការឲ្យកងកម្លាំងទាំងនោះទទួលខុសត្រូវ ចុះល្បាតត្រួតពិនិត្យតាមផ្លូវគោក ផ្លូវទឹកជាប្រចាំ ដើម្បីមានវិធានការលុបបំបាត់ ការដាក់ប៉ុស្ដិ៍ត្រួតពិនិត្យអាណាធិបតេយ្យទាំងនោះ។
ក្រសួងមហាផ្ទៃណែនាំឲ្យមន្ត្រីនគរបាលទាំងអស់ត្រូវដឹងច្បាស់អំពីគោលការណ៍របស់អគ្គស្នងការនគរបាលជាតិ ក្នុងការចាត់វិធានការយ៉ាងម៉ឺងម៉ាត់ តាមរូបភាពវិធានការរដ្ឋបាល និងវិធានការច្បាប់បញ្ជូនទៅតុលាការផ្ដន្ទាទោស ដោយគ្មានការយោគយល់ចំពោះមន្ត្រីនគរបាលជាតិណា ដែលប្រព្រឹត្តខុសឆ្គង លួចលាក់ ធ្វើសកម្មដាក់ប៉ុស្តិ៍ត្រួតពិនិត្យអាណាធិបតេយ្យ ឬ ឆ្លៀតយកមុខនាទីរបស់ខ្លួនដើម្បីទទួលប្រាក់កាសពីប្រជាពលរដ្ឋ ឬ អាជីវករខុសច្បាប់ទោះបីតាមវិធីណាក៏ដោយ៕
