តូបលក់ដូររបស់អាជីវករជាង១២០០តូបនៅផ្សារស្ទឹងត្រែង ត្រូវបានឆេះទាំងស្រុងកាលពីយប់ថ្ងៃព្រហស្បតិ៍ ដោយអាជ្ញាធរអះអាងថាមិនអាចគ្រប់គ្រងការពន្លត់បាន បើទោះមានរថយន្តពន្លត់អគ្គិភ័យក៏ដោយ។
ស្នងការនគរបាលខេត្តស្ទឹងត្រែង លោក ម៉ៅ តារា ប្រាប់វីអូឌីនៅព្រឹកថ្ងៃសុក្រនេះថាកាលពីយប់ម៉ោង១០និង៥នាទី មានហេតុការណ៍ឆេះផ្សារស្ទឹងត្រែង ដោយលោកបញ្ជាក់ថាភ្លើងបានចាប់ផ្តើមឆេះពីកណ្តាលផ្សារហើយបណ្តាលឲ្យហ្គាសមួយចំនួនផ្ទុះ ទើបមានការរាលដាលខ្លាំង។ លោកបញ្ជាក់ថាដោយសារបញ្ហានេះ សមត្ថកិច្ចមិនអាចគ្រប់គ្រងការពន្លត់បានភ្លាមៗនោះទេ។
លោកមានប្រសាសន៍ថា៖ “ដល់ទៅផ្ទុះហ្គាសហ្នឹង គឺឆាបឆេះវឹងៗ គឺថាផ្ទុះមួយគ្រាប់ គឺឆេះប្រហែល៥តូប រាលដាលហ្មង អញ្ចឹងធ្វើឲ្យយើងពិបាកក្នុងការអន្តរាគមន៍បាញ់ពន្លត់ ទីមួយគឺវានៅកណ្តាល យើងចូលបាញ់អត់ដល់ ទីពីរគឺផ្ទុះហ្គាសអញ្ចឹង គ្រោះថ្នាក់ បាយផ្កាភ្លើង សុទ្ធតែផ្កាភ្លើង ដូចផ្សាគ្រាប់អញ្ចឹង គឺជះពេញមេឃទាំងអស់”។
លោកបន្តថាសមត្ថកិច្ចខេត្តបានប្រើរថយន្តពន្លត់អគ្គិភ័យខេត្តអស់បីគ្រឿងនិងរថយន្តពន្លត់អគ្គិភ័យពីខេត្តរតនគិរីនិងក្រចេះថែមទៀត។ លោកបញ្ជាក់ថា៖ “អគ្គិភ័យនេះគឺថាវាឆេះឆាប់ខ្លាំងមែនទែន យើងមិនអាចគ្រប់គ្រងសភាពការណ៍បានទេ ឃើញដូច្នេះ គឺឯកឧត្តមអភិបាលខេត្ត លោកបានបញ្ជាឲ្យយកអេស្កាលែតទ័រហ្នឹង ទៅកាយតូចខាងៗ ដែលទើបឆេះតិចៗហ្នឹង កុំឲ្យអណ្តាតភ្លើងឆាបឆេះទៅដល់ផ្ទះប្រជាពលរដ្ឋនៅជុំវិញផ្សារហ្នឹង”។
បើតាមស្នងការខេត្ត មិនមានមនុស្សស្លាប់ឬរងរបួសដោយសារអគ្គិភ័យនេះនោះទេ។ ទោះជាយ៉ាងណា លោកមិនទាន់អាចបញ្ជាក់ពីមូលហេតុនៃអគ្គិភ័យនេះបានទេ។ លោកមានប្រសាសន៍ថា៖ “ចំពោះមូលហេតុ យើងអត់ទាន់អាចសន្និដ្ឋានបានទេ ឥឡូវនេះ ឯកឧត្តមអភិបាលខេត្តលោកបង្កើតជាគណៈកម្មការស្រាវជ្រាវមួយ ដើម្បីធ្វើការស្រាវជ្រាវជុំវិញបញ្ហានេះ”។ លោកបញ្ជាក់បន្ថែមថាតូបអាជីវករនៅផ្សារនោះមានចំនួន១២២០តូប ហើយត្រូវបានឆេះទាំងស្រុង។
អ្នកស្រី ភិន ភារី អាយុ៥៤ឆ្នាំ ជាអាជីវករលក់ស្បែកជើងនិងកាបូបនៅផ្សារដែលឆេះនោះ អះអាងថាតូបរបស់អ្នកស្រីត្រូវបានឆេះទាំងស្រុង ហើយតាមការប៉ាន់ស្មានអស់តម្លៃប្រមាណ៣ម៉ឺនដុល្លារ។ អ្នកស្រីបន្តថាអ្នកស្រីមិនទាន់ដឹងពីមូលហេតុឆេះនោះទេ ប៉ុន្តែថាមិនអាចមកពីការឆ្លងចរន្តអគ្គិសនីនោះទេ ដោយសារផ្សារត្រូវបិទភ្លើងតាំងពីម៉ោង៦ល្ងាច។ ទោះជាយ៉ាងណា អ្នកស្រីបញ្ជាក់ថាកន្លងទៅ អាជ្ញាធរធ្លាប់បានស្នើឲ្យអាជីវកររើទៅលក់នៅផ្សារថ្មីពីរកន្លែងផ្សេងទៀត តែអាជីវករមិនព្រម។
អ្នកស្រីមានប្រសាសន៍ថា៖ “មិនដឹងពីមូលហេតុថាពិតប្រាកដ តែគ្រាន់តែដឹងថាមិនមែនមកពីទុស្សេខ្សែភ្លើងឬផ្ទុះហ្គាសទេដោយសារផ្សារហ្នឹង បិទម៉ោង៦ល្ងាចគេបិទទាំអស់ព្រោះគេមិនឱ្យមានភ្លើង ហើយឆេះនៅម៉ោង១០ អញ្ចឹងខ្ញុំច្បាស់ណាស់ថាមិនមែនមកពីទុស្សេខ្សែភ្លើងទេ។ កន្លងមកធ្លាប់ឲ្យពួកយើងរុះរើចេញតែអ្នកលក់ក្នុងផ្សារស្ទឹងត្រែងហ្នឹងមិនពេញចិត្ត ពួកអាជ្ញាធរធ្លាប់ឲ្យរើធ្វើសាថ្មីទេ ដោយសារតូបថ្មីថ្លៃពេកពួកអ្នកលក់មិនអាចជួលបាន អញ្ចឹងហើយចេះតែមានការមិនពេញចិត្តគ្នាទៅវិញទៅមក”។
អ្នកស្រីបញ្ជាក់បន្ថែមថា៖ “ឥវ៉ាន់អីទើបយកចូល មិនទាន់ឲ្យលុយគេផង ឥឡូវឆេះអស់បាត់ហើយ។ ចង់ឲ្យអាជ្ញាធរជួយរកកន្លែងឲ្យលក់ឲ្យបានសមរម្យ ប្រហែលជាលក់នៅតាមសួនច្បារហ្នឹងសិនហើយ ព្រោះផ្សារថ្មីនោះស្ងាត់ណាស់”។
គួរបញ្ជាក់ថាកាលពីឆ្នាំ២០០៧ ផ្សារថ្មីខេត្តពោធិ៍សាត់ត្រូវបានឆេះទាំងស្រុងចំថ្ងៃចូលឆ្នាំខ្មែរ ហើយបន្ទាប់មកមានការសាងសង់ថ្មី ដោយដាក់ឈ្មោះថាផ្សារហ៊ុន សែន៕ រាយការណ៍បន្ថែមដោយ កញ្ញា រ័ត្ន សុភក្តិ
