ប្រមុខការទូតជប៉ុន បានស្នើឡើងនូវវេទិកាជប៉ុនជាមួយបណ្ដាប្រទេសនៅតាមដងទន្លេមេគង្គ ខណៈដែលតំបន់នេះមានសកម្មភាពនៃទំនាក់ទំនងកាន់តែខ្លាំងក្លាជាមួយមហាអំណាចចិន ប៉ុន្តែ មិនបានលើកឡើងពីវិវាទនយោបាយកម្ពុជានោះឡើយ។
រដ្ឋមន្ត្រីការបរទេសជប៉ុន លោក តារ៉ូ កូណូ កំពុងស្ថិតនៅក្នុងដំណើរទស្សនកិច្ចរបស់លោកនៅក្នុងប្រទេសកម្ពុជានៅថ្ងៃនេះ។
ប្រមុខការទូតជប៉ុនរូបនេះ បានចុះហត្ថលេខាលើការផ្ដល់ជំនួយឥតសំណង និងឥណទានសម្បទានទំហំជាង ៩២លានដុល្លារ ជាមួយប្រមុខការទូតកម្ពុជា លោក ប្រាក់ សុខុន នៅថ្ងៃនេះ។
ជាងនេះទៅទៀត លោក តារ៉ូ កូណូ បានជួបពិភាក្សាជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាពផងដែរ ដើម្បីជជែកអំពីទំនាក់ទំនងរវាងប្រទេសទាំងពីរ និងទំនាក់ទំនងរវាងប្រទេសជប៉ុន និងតំបន់ទន្លេមេគង្គ។
ទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន បានឲ្យដឹងថា ប្រទេសជប៉ុនគ្រោងនឹងរៀបចំវេទិកាជប៉ុន-មេគង្គ ដែលជាកិច្ចប្រជុំកំពូលរវាងមេដឹកនាំជប៉ុន និងក្រុមមេដឹកនាំនៃបណ្ដាប្រទេសនៅតាមដងទន្លេមេគង្គ។
គម្រោងជំនួបកំពូលជប៉ុន-មេគង្គ ត្រូវបានគ្រោងឡើង ក្រោយពីបណ្ដាមេដឹកនាំនៃតំបន់ទន្លេមេគង្គ បានជួបប្រជុំជាមួយមេដឹកនាំចិនយ៉ាងតិច ៣ដងរួចមកហើយ ចាប់តាំងពីចុងឆ្នាំមុន រហូតដល់ ៣ខែដើមឆ្នាំ២០១៨នេះ។
បើតាមទំព័រហ្វេសប៊ុកលោកនាយករដ្ឋមន្ត្រី គ្មានទេវិវាទនយោបាយរវាងបក្សកាន់អំណាច និងបក្សប្រឆាំង នៅក្នុងរបៀបវារៈនៃជំនួបរវាងប្រមុខការទូតជប៉ុន និងមេដឹកនាំកម្ពុជា ដែលខុសពីជំនួបរវាងលោក ហ៊ុន សែន និងលោក Kentaro Sonoura ដែលជាបេសកជនពិសេសតំណាងឲ្យនាយករដ្ឋមន្ត្រីជប៉ុន លោក ស៊ិនហ៊្សូ អាបេ កាលពីថ្ងៃទី២៣ ខែមីនាកន្លង។ នៅក្នុងជំនួបនាពេលនោះ តំណាងរដ្ឋាភិបាលជប៉ុន បានបង្ហាញជំហរទៅកាន់មេដឹកនាំកម្ពុជាថា ជប៉ុនចង់ឃើញការបោះឆ្នោតដោយសេរី និងយុត្តិធម៌នាខែកក្កដាខាងមុខនេះ។
ទោះជាយ៉ាងណា ដំណើរទស្សនកិច្ចប្រមុខការទូតជប៉ុននៅកម្ពុជានេះ បានកើតឡើងចំពេលដែលព្រះមហាក្សត្រកម្ពុជា ព្រះបាទ នរោត្ដម សីហមុនី បានយាងទៅបំពេញទស្សនកិច្ចនៅក្នុងប្រទេសជប៉ុនផងដែរ។
នៅវិវាទនយោបាយកម្ពុជាថ្មីៗនេះ ក្រុមមេដឹកនាំគណបក្សសង្គ្រោះជាតិ ដែលត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុននោះ រំពឹងថា រដ្ឋាភិបាលជប៉ុននឹងជួយសម្របសម្រួលបញ្ចប់ជម្លោះនយោបាយមួយនេះ ហើយអាចជួយឲ្យកម្ពុជាងាកទៅដើរលើផ្លូវមួយ ដែលសហគមន៍អន្តរជាតិហៅថា គន្លងលទ្ធិប្រជាធិបតេយ្យសេរីពហុបក្ស៕
