ប្រទេសចិនបាននិយាយនៅថ្ងៃពុធនេះថា ហ្វីលីពីនពុំអើពើនឹងសំណើយន្តការពិភាក្សាប្រក្រតីមួយជុំវិញជម្លោះដែនទឹក ខណៈចិនបានអះអាងម្ដងទៀតថាទ្វាររបស់ខ្លួនតែងបើកជានិច្ចសម្រាប់ពិភាក្សាទ្វេភាគីជាមួយក្រុងម៉ានីលអំពីសមុទ្រចិនខាងត្បូង។
ចិនបានអះអាងជាម្ចាស់លើដែនទឹកភាគច្រើននៅសមុទ្រចិនខាងត្បូងដែលជាច្រកចេញចូលនៃនាវាពាណិជ្ជកម្មតម្លៃ៥ពាន់ពាន់លានជារៀងរាល់ឆ្នាំ។ ហ្វីលីពីន វៀតណាម ម៉ាឡេស៊ី តៃវ៉ាន់ និងប៊្រុយណេ ក៏បានអះអាងជាម្ចាស់លើតំបន់ត្រួតស៊ីគ្នានោះផងដែរ ព្រមទាំងមានទំនាក់ទំនងយោធាជាមួយក្រុងវ៉ាស៊ីងតោន។
ប្រទេសហ្វីលីពីនបាននាំយកករណីនេះទៅតុលាការអន្តរជាតិនៅទីក្រុងឡាអេប្រឆាំងទៅនឹងការអះអាងរបស់ចិន ប៉ុន្តែចិនបានច្រានចោល ហើយចង់ដោះស្រាយបញ្ហានេះលក្ខណៈទ្វេភាគី។
ទីភ្នាក់ងារព័ត៌មានរ៉យទ័របានរាយការណ៍ថា ក្រសួងការបរទេសចិនបាននិយាយនៅក្នុងសេចក្ដីប្រកាសព័ត៌មានមួយថា ប្រទេសទាំងពីរបានឯកភាពកាលពីឆ្នាំ១៩៩៥ ដើម្បីដោះស្រាយជម្លោះនៅសមុទ្រចិនខាងត្បូងក្នុងលក្ខណៈសន្តិវិធីនិងមិត្តភាព តាមរយៈការពិភាក្សាផ្អែកលើមូលដ្ឋានសមភាពនិងការគោរពគ្នាទៅវិញទៅមក។
ចិននិងហ្វីលីពីនបានជួបពិភាក្សាគ្នាជាច្រើនលើកទៅលើការគ្រប់គ្រងជម្លោះដែនទឹកនោះ ប៉ុន្តែភាគីទាំងពីរពុំមានការចរចាណាត្រូវបានរៀបចំឡើងដើម្បីដោះស្រាយជម្លោះពិតប្រាកដនៅសមុទ្រចិនខាងត្បូងនោះឡើយ៕