ពលរដ្ឋខ្មែរវ័យ ១៤ឆ្នាំម្នាក់ និង ១៦ឆ្នាំម្នាក់ ត្រូវបានរាយការណ៍ថា ត្រូវអាជ្ញាធរថៃចាប់បញ្ជូនមកប្រទេសកំណើតវិញ បន្ទាប់ពីពួកគេត្រូវបានតម្រួតថៃចាប់ខ្លួនអស់រយៈពេលប៉ុន្មានខែមកហើយ ក្រោយឆ្លងដែនចូលកាប់ឈើដោយខុសច្បាប់។ នេះដោយយោងតាមសេចក្ដីរាយការណ៍នៅលើគេហទំព័រនគរបាលជាតិ។
សេចក្ដីរាយការណ៍ដដែល បានឲ្យបន្ថែមថា យុវជនទាំងពីរនាក់នោះ ត្រូវបានសមត្ថកិច្ចថៃចាប់បញ្ជូនមកប្រទេសកំណើតវិញ កាលពីថ្ងៃម្សិលមិញនេះ តាមច្រកជាំស្រង៉ាំ ស្រុកអន្លង់វែង ខេត្តឧត្ដរមានជ័យ។
បើតាមសេចក្ដីរាយការណ៍ ក្មេងប្រុសអាយុ ១៤ឆ្នាំ ដែលមានស្រុកកំណើតពីខេត្តកំពង់ឆ្នាំង ត្រូវបានអាជ្ញាធរថៃចាប់ឃុំខ្លួនតាំងពីថ្ងៃទី១៤ ខែឧសភាឆ្នាំនេះ។ ចំណែកឯយុវជនអាយុ ១៦ឆ្នាំ មកពីខេត្តព្រះវិហារ ត្រូវសមត្ថកិច្ចថៃចាប់ឃុំខ្លួនតាំងពីដើមខែមេសាមកម៉្លេះ។
ពួកគេទាំងពីរនាក់ ត្រូវបានអាជ្ញាធរថៃចាប់ឃុំខ្លួននៅពន្ធនាគារខេត្តស៊ីសាកេត បន្ទាប់ពីបានឆ្លងដែនដោយខុសច្បាប់ ចូលទៅកាប់ឈើប្រណិតនៅក្នុងទឹកដីថៃ៕