អ្នករាយការណ៍ពិសេសរបស់អង្គការសហប្រជាជាតិស្តីពីសិទ្ធិមនុសុ្សនៅកម្ពុជា លោកស្រី រ៉ូណា ស្មីត ចាប់ផ្តើមបំពេញទស្សនកិច្ចនៅកម្ពុជាពីថ្ងៃនេះ ក្នុងរយៈពេលដប់ថ្ងៃ ដើម្បីតាមដាន និងត្រួតពិនិត្យមើលស្ថានភាពសិទ្ធិកុមារ និងសិទ្ធិមនុស្សនៅប្រទេសកម្ពុជានាពេលបច្ចុប្បន្ន។ នេះបើសេចក្តីប្រកាសព័ត៌មានរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា។
ក្នុងដំណើរទស្សនកិច្ចនៅកម្ពុជាចាប់ពីថ្ងៃទី៨ ដល់ថ្ងៃទី១៨ ខែសីហា លោកស្រី ស្មីត ផ្តោតសំខាន់ទៅលើសុវត្ថិភាពក្នុងការរស់នៅរបស់កុមារ ជាពិសេស លោកស្រី ព្រួយបារម្ភរឿងជួញដូរលើកុមារ។
លោកស្រីថា៖ «ខ្ញុំមានបំណងស្វែងយល់ជាពិសេសអំពីការជួញដូរ និងកេងប្រវ័ញ្ចលើកុមារ រួមទាំងគោលជំហរក្នុងការមើលថែរក្សាកុមារ»។
បើតាមសេចក្តីប្រកាសព័ត៌មាន ក្នុងដំណើរទស្សនៈកិច្ចនេះ លោកស្រី ស្មីត មានគម្រោងជួបពិភាក្សាជាមួយមន្រ្តីជាន់ខ្ពស់ក្នុងជួររដ្ឋាភិបាល តំណាងសង្គមស៊ីវិល និងមន្រ្តីការទូតនានា។
អ្នករាយការណ៍ពិសេសរូបនេះ ក៏នឹងធ្វើសន្និសីទសារព័ត៌មានមួយនៅថ្ងៃសុក្រ ទី១៨ សីហា វេលាម៉ោង ១៥រសៀល នៅការិយាល័យសិទ្ធិមនុស្ស អ.ស.ប(OHCHR) ដើម្បីបង្ហាញពីលទ្ធផលនៃដំណើរទស្សនកិច្ចលើកទី៤របស់លោកស្រីមកកាន់ប្រទេសកម្ពុជា៕