សាលាដំបូងរាជធានីភ្នំពេញនឹងប្រកាសសាលក្រមទាក់ទិននឹងសំនុំរឿងដែល លោក ហ៊ុន សែន ប្តឹងលោក សម រង្ស៊ី ពីបទបរិហាកេរ្តិ៍ នៅម៉ោង៣រសៀលនេះ ទាក់ទងរឿងចំនួនអ្នកចុច Likes ហ្វេសប៊ុក។
នៅព្រឹកថ្ងៃទី៨ ខែវិច្ឆិកានេះ សាលាដំបូងបានបើកសវនាការលើសំនុំរឿងដែល លោក សោម សឿន តំណាងឲ្យលោកនាយករដ្ឋមន្ត្រីប្តឹងប្រធានគណបក្សប្រឆាំងពីបទបរិហាកេរ្តិ៍ជាសាធារណៈ ដោយថាលោក សម រង្ស៊ី បានចោទថា លោក ហ៊ុន សែន បានជួលមនុស្សឲ្យធ្វើគណនីក្លែងក្លាយចូលគាំទ្រឬ Like ទំព័រហ្វេសប៊ុនរបស់ខ្លួនដើម្បីប្រជាប្រជាប្រិយភាព។
បើតាមលោក សោម សឿន អះអាងថា ការចោទប្រកាន់របស់លោក សម រង្ស៊ី នេះគ្មានការពិត និងថាបានធ្វើឲ្យប៉ះពាល់ដល់មុខមាត់របស់ថ្នាក់ដឹកនាំនិងស្នើឲ្យតុលាការផ្តន្ទាទោសតាមច្បាប់និងទារសំណងជម្ងឺចិត្ត២០លានរៀល។
ចំណែកមេធាវី លោក សំ សុគង់ ដែលការពារក្តីឲ្យលោក សម រង្ស៊ី បានច្រើនចោលការចោទប្រកាន់នេះ ដោយស្នើឲ្យតុលាការទម្លាប់បទចោទប្រកាន់។
ប៉ុន្តែចៅក្រមក្នុងអង្គជំនុំជម្រះលោក អ៊ឹម វណ្ណះ ប្រកាសថាសាលក្រមនៃសំនុំរឿងបរិហាកេរ្តិ៍របស់ថ្នាក់ដឹកនាំ ទាក់ទិននឹងរឿងរិះគន់ហ្វេសប៊ុកនេះ នឹងប្រកាសនៅម៉ោង៣រសៀលថ្ងៃអង្គារនេះ៕