រដ្ឋាភិបាលមីយ៉ាន់ម៉ា បានថ្លែងថាពួកគេមានការព្រួយបារម្ភខ្លាំង អំពីរបាយការណ៍យ៉ាងរសើប របស់អង្គការសហប្រជាជាតិ (UN) នៅពេលថ្មីៗនេះ ដែលបានចោទថា ពួកយោធា ធ្វើសកម្មឃោរឃៅលើជនជាតិភាគតិចរ៉ូហ៊ីងយ៉ា។
នៅក្នុងសេចក្តីប្រកាសព័ត៌មានចេញផ្សាយកាលពីថ្ងៃពុធម្សិលមិញ ក្រសួងការបរទេសមីយ៉ាន់ម៉ា ថ្លែងថា រដ្ឋាភិបាលបានស៊ើបអង្កេត ចំពោះការចោទប្រកាន់ថា យោធា រដ្ឋាភិបាលបានធ្វើទុកបុកម្នេញលើជនជាតិភាគតិចរ៉ូហ៊ីងយ៉ា ដោយបញ្ជាក់ថា មិនមានភស្តុតាងគ្រប់គ្រាន់ដូចការចោទប្រកាន់ទេ។ នេះបើតាមសារព័ត៌មាន Channel News Asia។
អង្គការសហប្រជាជាតិ ផ្នែកការពារសិទ្ធិមនុស្ស កាលពីសប្តាហ៍មុនបានចេញរបាយការណ៍ស៊ើបអង្កេតថា យោធាមីយ៉ាន់ម៉ាបានព្យាយាម សម្លាប់ជាទ្រង់ទ្រាយធំ រំលោភបូក លើជនជាតិរ៉ូហ៊ីងយ៉ា កាន់សាសនាឥស្លាម ដែលសកម្មភាពនេះ គេចាត់ទុកថា មានបំណងបោសសំអាតឬ លុបបំបាត់ជនជាតិភាគតិច។
តាមរបាយការណ៍អង្គការសហប្រជាជាតិបង្ហាញថា ជនជាតិរ៉ូហ៊ីងយ៉ាគេចចេញពីប្រទេសមីយ៉ាន់ម៉ា នៅភាគខាងជើងក្នុងរដ្ឋរ៉ាឃីន ដោយសារបាញ់ប្រហារពីពួកយោធា ឆ្លងទៅកាន់ប្រទេសបង់ក្លាដេសជាប្រទេសជិតខាងប្រមាណ៦៦០០០នាក់ ចាប់តាំងពីហិង្សាកើតឡើងកាលពីថ្ងៃទី៩ខែតុលាឆ្នាំ២០១៦កន្លងទៅ៕
