គណបក្សកាន់អំណាចអះអាងថា តំណាងរាស្ត្រគណបក្សនេះគ្រោងនឹងស្នើទៅសភាឲ្យធ្វើវិសោធនកម្មមាត្រាមួយចំនួនក្នុងច្បាប់ស្ដីពីគណបក្សនយោបាយ នៅខែចុងមីនាឬដើមខែមេសាខាងមុខ តាមការចង់បានរបស់លោកនាយករដ្ឋមន្ត្រី ហ៊ុន សែន។
ការស្នើសុំធ្វើវិសោធនកម្មមាត្រាមួយចំនួនក្នុងច្បាប់ស្តីពីគណបក្សនយោបាយនោះទំនងជាលោក ហ៊ុន សែន មិនចង់ឲ្យលោក សម រង្ស៊ី ធ្វើជាប្រធានគណបក្សសង្គ្រោះជាតិ ខណៈប្រធានគណបក្សប្រឆាំងរូបនេះត្រូវបានកាត់ទោសនិងជាប់បណ្តឹងរបស់រដ្ឋាភិបាលមួយចំនួនទៀត។
ច្បាប់ស្ដីពីគណបក្សនយោបាយដែលមាន ១១ជំពូក ៤៥មាត្រា បានបង្កើតឡើងកាលពីឆ្នាំ១៩៩៧។ តាមច្បាប់តំណាងរាស្ត្រ មួយភាគបួន ឬជាង៣០រូបនៃតំណាងរាស្ត្រសរុប១២៣រូប អាចស្នើសុំធ្វើវិសោធនកម្មច្បាប់នេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានប្រាប់VODថា ក្រុមប្រឹក្សាផ្នែកច្បាប់របស់គណបក្សប្រជាជនកម្ពុជា កំពុងពិនិត្យមើលសេចក្ដីព្រាងថ្មី មុននឹងបញ្ជូនទៅសភាពិនិត្យនិងអនុម័ត។ ទោះយ៉ាងនេះក្ដី លោក សុខ ឥសាន មិនទាន់ឲ្យដឹងថា គណបក្សប្រជាជនកម្ពុជា កែប្រែមាត្រាណាខ្លះនៅឡើយទេ។
លោក សុខ ឥសាន បញ្ជាក់ថា ការស្នើសុំវិសោធនកម្មមាត្រាមួយចំនួននៅក្នុងច្បាប់ស្តីពីគណបក្សនយោបាយនោះ ដើម្បីហាមមេដឹកនាំគណបក្សណាមួយ ដែលបានប្រព្រឹត្តបទល្មើសព្រហ្មទណ្ឌ មិនឲ្យធ្វើជាប្រធាន ឬអនុប្រធានបក្សនោះ ជាពិសេសលោកថា លោក សម រង្ស៊ី មិនអាចធ្វើជាប្រធានបក្សសង្គ្រោះជាតិបាននោះទេ។លោកមានប្រសាសន៍ថា «សម្រាប់អនុវត្តទូទៅសម្រាប់ប្រធានគណបក្ស គ្រប់គណបក្ស ឥឡូវនេះគណបក្សនៅកម្ពុជាមិនមែន៦៨ទេ ឥឡូវឡើងដល់៧១ហើយ នៅទូទំាងប្រទេសកម្ពុជាមានគណបក្សនយោបាយ៧១ហើយដែលបានចុះបញ្ជី គ្រប់គណបក្សទំាងអស់ត្រូវគោរពច្បាប់ហ្នឹង និយាយឲ្យចំលោក សម រង្ស៊ី ចេញច្បាប់ហ្នឹងមកគឺត្រូវធាក់ចេញតែម្តង ពីព្រោះគាត់មានសាលក្រមស្ថាពររបស់តុលាការរួចហើយ ដូច្នេះមិនមានពិបាកអីទេ»។
លោកមេធាវី ហុង គឹមសួន មានប្រសាសន៍ថា ការធ្វើច្បាប់ឬវិសោធនកម្មច្បាប់ណាមួយ គេត្រូវសិក្សានិងមានការគំាទ្រពីប្រជាពលរដ្ឋ ពោលត្រូវគិតប្រយោជន៍ប្រជាពលរដ្ឋនិងប្រទេសជាតិជាធំ ជាជាងគិតតែផលប្រយោជន៍បុគ្គល បក្សពួក និងគ្រួសារនិយមជាដើម។
ករណីនេះលោក ហុង គឹមសួន យល់ថា គណបក្សកាន់អំណាចមិនចំាបាច់កែប្រែមាត្រាមួយចំនួននៅក្នុងច្បាប់ស្តីពីគណបក្សនយោបាយនោះទេ ដោយថាបើតុលាការឯករាជ្យគួរតែយកច្បាប់ព្រហ្មទណ្ឌដែលមានស្រាប់ទៅអនុវត្តប្រសើរជាង។ លោកពន្យល់ថា «ការដឹកនាំប្រទេសតែម្នាក់ឯង ឬក៏បក្សពួកឯង វាអត់មានទៅជាសេរីពហុបក្ស ដោយយកលេសអំពីរឿងធ្វើយ៉ាងម៉េចឲ្យឃើញថាមនុស្សខុស ឬក៏អ្នកទំាងនោះមិនអាចដឹកនាំបាន ច្បាប់យើងមាន បើអ្នកណាធ្វើខុសដាក់ទោស ឬដាក់ទណ្ឌកម្មទៅអ្នកនោះទៅ ឲ្យតែតុលាការពិតជាឯករាជ្យ ការគោរពច្បាប់ គោរពសេរីភាព សិទ្ធិមនុស្ស ឲ្យតែវាត្រឹមត្រូវ»។
អ្នកឃ្លាំមើលពីការអភិវឌ្ឍសង្គមនិងនយោបាយ លោក គឹម សុខ លើកឡើងថា អ្វីដែលលោក ហ៊ុន សែន ចង់ឲ្យធ្វើវិសោធនកម្មច្បាប់ នៅពេលនេះ លោកវិភាគថា អាចជាការចង់ផ្តួលគូប្រគួតរបស់ខ្លួន តាមរយៈ អំណាចតុលាការ និងអំណាចសភា ។
ប៉ុន្តែលោកថាវិធានការនេះ បើអ្នកនយោបាយមិនចុះសម្រុងគ្នា លោកថា ផលប៉ះពាល់ពីជម្លោះនេះ នឹងធ្លាក់ទៅលើប្រជាពលរដ្ឋ និងប្រទេសជាតិទាំងមូល។
លោកថា៖ «ករណីថាអស់លាក់ ធ្វើមិនបានតាំងពីការចាប់លោក សម រង្ស៊ី ការចាប់ដៃលោក សម រង្ស៊ី សង្កាត់ទាំងពីរចូលមកចាប់ដៃលោក កឹម សុខា ។ហើយមកដល់ពេលនេះអស់ខ្យល់មែនទែន គឺប្រើវិធីនយោបាយឈ្នៀនីស ដើម្បីសង្កត់អ្នកទាំងពីរ ទាំងលោក សម រង្ស៊ី ទាំងលោក កឹម សុខា ហើយមកដល់ពេលនេះកាន់តែធ្ងន់ធ្ងរមែនទែន គឺប្រើវិធីផ្លូវច្បាប់ដើម្បីខ្ទប់ដំណើរលោក សម រង្ស៊ី មិនឲ្យចូលស្រុកទៅទៀត»។
បើគិតត្រឹមថ្ងៃទី១៨ ខែមករា ឆ្នាំ២០១៧ លោក សម រង្ស៊ី បានជាប់បណ្តឹងយ៉ាងតិចចំនួន៥ទៀត ដែលភាគច្រើន បណ្តឹងទាំងនោះ ប្តឹងដោយលោកនាយករដ្ឋមន្ត្រី ហ៊ុន សែន។
បណ្តឹងទាំងនោះ មានករណីរិះគន់ហ្វេសប៊ុក លោក ហ៊ុន សែន ការរិះគន់ថា រដ្ឋាភិបាលនៅពីក្រោយ ការបាញ់សម្លាប់លោក កែម ឡី ការផ្សព្វផ្សាយសន្ធិសញ្ញាព្រំដែនឆ្នាំ១៩៧៩ ការរិះគន់ប្រធានរដ្ឋសភា លោក ហេង សំរិន និងសំណុំរឿងថ្មីចុងក្រោយនេះ គឺលោក ហ៊ុន សែន បានប្តឹងពីបទបរិហាកេរ្តិ៍ដោយទារសំណងជម្ងឺចិត្ត១លានដុល្លារ ទាក់ទិននឹងលោក សម រង្ស៊ី និយាយតាមឯកសាបែកធ្លាយមួយថា លោក ហ៊ុន សែន សន្យាផ្តល់លុយឲ្យកញ្ញា ធី សុវណ្ណថា ១លានដុល្លារ សម្រាប់រៀបគម្រោងបំបែកបំបាក់បក្សប្រឆាំង។ ប៉ុន្តែគណបក្សសង្រ្គោះជាតិចាត់ទុកករណីទាំងអស់នេះជារឿងនយោបាយ។
លោក ហ៊ុន សែន នៅតែមានប្រសាសន៍ដដែលថា ហាមមិនឲ្យអ្នកមានទោសធ្វើជាប្រធាន និងអនុប្រធានគណបក្សនយោបាយនោះទេ។ ចំណែកលោក សម រង្ស៊ី យល់ថាសម្តីរបស់លោក ហ៊ុន សែន កំពុងភ័យស្លន់ស្លោខ្លាចចាញ់ឆ្នោតឆ្នាំ២០១៨ខាងមុខ៕
