គណៈកម្មាធិការចរាចរណ៍ផ្លូវគោក រំឭកអ្នកបើកបរទាំងអស់ ធ្វើដំណើរនៅក្នុងថ្ងៃបុណ្យចូលឆ្នាំចិន វៀតណាម នៅពាក់កណ្តាលខែកុម្ភៈនេះ ឲ្យគោរពច្បាប់ចរាចរណ៍ ដើម្បីការពារសុវត្ថិភាព ដោយថា គ្រោះថ្នាក់មានកំណើនខ្ពស់ជារៀងរាល់ឆ្នាំ។
ក្នុងលិខិតគណៈកម្មាធិការជាតិសុវត្ថិភាពចរាចរណ៍ផ្លូវគោក ចុះថ្ងៃទី៩នេះ ឲ្យដឹងថា គ្រោះថ្នាក់ចរាចរណ៍ផ្លូវគោក តែងមានកំណើនខ្ពស់ នៅរាល់ឱកាសពិធីបុណ្យផ្សេងៗ នៅក្នុងប្រទេសកម្ពុជា បានបណ្ដាលឲ្យមានកំណើនជនរងគ្រោះ ជាអតិបរមា និងមានការខូចខាតទ្រព្យសម្បត្ដិជាច្រើន។ ករណីនេះ គណៈកម្មាធិការអំពាវនាវទៅអ្នកធ្វើដំណើរក្នុង ថ្ងៃបុណ្យចូលឆ្នាំចិន វៀតណាម ចាប់ពីថ្ងៃទី១៦-១៧-១៨ ខែកុម្ភៈនេះ ឲ្យគោរពច្បាប់ចរាចរណ៍ទាំងអស់គ្នា ពោលមិនត្រូវបើកបរក្នុងស្ថានភាពស្រវឹង មិនគោរពសិទ្ធិអាទិភាព មិនពាក់មួកសុវត្ថិភាព ការវ៉ាជែងប្រថុយប្រថាន ការដឹកនាំទំនិញ ឫអ្នកដំណើរលើសកំណត់ជាដើម -ល- ដោយថាដើម្បីការពារសុវត្ថិភាព។
របាយការណ៍ដែលផ្សាយលើវេបសាយនគរបាលជាតិបានឲ្យដឹងថា គិតចាប់ពីថ្ងៃទី១ ដល់ ថ្ងៃទី៣១ ខែមករា ឆ្នាំ២០១៨នេះ ដោយបានសម្លាប់មនុស្ស ១៦៨នាក់ និង ៣៩៥នាក់ ទៀតបានរងរបួសធ្ងន់ស្រាល។
របាយការណ៍នោះបានបញ្ជាក់ថា ការបើកបរក្រោមឥទ្ធិពលនៃគ្រឿងស្រវឹង ការបើកបរជែងមិនគោរពសិទ្ធិ និងកត្តាយានយន្ត សុទ្ធតែជាដើមហេតុនៃគ្រោះថ្នាក់ចរាចរណ៍។
របាយការណ៍ដដែលនេះ ឲ្យដឹងផងដែរថា រាជធានីខេត្តដែលកើតមានគ្រោះថ្នាក់ចរាចរណ៍ច្រើនមានដូចជា កំពង់ធំ កំពង់ចាម កណ្តាល ភ្នំពេញ បន្ទាយមានជ័យ ក្រចេះ និងព្រៃវែង។
កាលពីឆ្នាំ២០១៧ គ្រោះថ្នាក់ចរាចរណ៍ បានសម្លាប់មនុស្សជិត ១៨០០នាក់ ខណៈមនុស្សជាង ៥៥០០នាក់ទៀតបានរងរបួស ៕