អ្នកវិភាគមួយចំនួនបង្ហាញទស្សនៈប្រហាក់ប្រហែលគ្នាទៅលើសារនយោបាយមួយឃ្លាដែលថា «ដូរមេឃុំបម្រើបក្ស ដាក់មេឃុំបម្រើរាស្ត្រ» នោះពួកគេថាជាសារជំរុញឲ្យមានអភិបាលកិច្ចនៅថ្នាក់មូលដ្ឋាន តាមរយៈការជាប់ជាមេឃុំឬចៅសង្កាត់ ដែលបម្រើរាស្ត្រពិតប្រាកដ។
នៅពេលថ្មីៗនេះ គណបក្សសង្គ្រោះជាតិបានប្រកាសគោលនយោបាយជាអទិភាព៥ចំនុច សម្រាប់ឃោសនារកសំឡេងឆ្នោតជ្រើសរើសក្រុមប្រឹក្សាឃុំសង្កាតនាពេលខាងមុខ ក្នុងនោះមានទាំងពាក្យថា «ដូរមេឃុំបម្រើបក្ស ដាក់មេឃុំបម្រើរាស្ត្រ»។
ប៉ុន្តែសារនយោបាយមួយឃ្លានេះ ត្រូវបានគណបក្សប្រជាជនព្រមានប្តឹង បើបក្សប្រឆាំងមិនព្រមកែតម្រូវ ដោយចាត់ទុកថា ជាសារនយោបាយមានរូបភាពញុះញង់ បង្កហេតុ និងប្រមាថដល់មន្ត្រីឃុំសង្កាត់នៅទូទាំងប្រទេស ដោយថាពួកគេកំពុងបម្រើពលរដ្ឋគ្រប់និន្នាការគ្មានការរើសអើង។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា លើកឡើងថាសារនយោបាយដែលសរសេរថា ដូរមេឃុំបម្រើបក្ស ដាក់មេឃុំបម្រើរាស្ត្រនោះ លោកថាហាក់មិនបានសំដៅដល់មេឃុំគណបក្សណាមួយទេ ដោយសារបក្សប្រឆាំងក៏មានមេឃុំនិងចៅសង្កាត់ដែរ។ លោកថា តែផ្ទុយទៅវិញសារនយោបាយនោះបានជំរុញឲ្យមន្ត្រីថ្នាក់ក្រោមជាតិបង្កើនការយកចិត្តទុក្ខដាក់បម្រើពលរដ្ឋទៅវិញទេ ដើម្បីបានជាប់ជាមេឃុំ។
ប៉ុន្តែលោក ឯម សុវណ្ណារ៉ា វិភាគថាសារនយោបាយនេះអាចចាក់ចំបេះដូងបក្សកាន់អំណាចដែលមានអាសនៈមេឃុំច្រើនជាង។
លោកថា៖ «ពាក្យស្លោកហ្នឹងវាហាក់មិនចំត្រង់ចំនុចណាដែលថា វាញុះញង់វាអុចអាលឬក៏វាទៅរំខានអ្នកនយោបាយមួយផ្សេងទៀតទេ។ អានេះវាគ្រាន់តែជាការលើកទឹកចិត្តសម្រាប់មេឃុំដែលជាប់ឆ្នោតហ្នឹង ឲ្យគិតប្រយោជន៍ប្រជាពលរដ្ឋហ្នឹងជាធំ កុំគិតពីប្រយោជន៍បក្ខពួក។ ដូច្នេះបើសិនជាមេឃុំណាមិនគិតបម្រើពលរដ្ឋជាធំទេ អាហ្នឹងពលរដ្ឋមិនបោះឆ្នោតឲ្យ។ អានេះជាយន្តការមួយជួយដល់សេចក្តីត្រុវការឬជាបំណងរបស់ពលរដ្ឋ។ អញ្ចឹងបើចង់ឲ្យដូរពាក្យហ្នឹង វាប៉ះពាល់ដល់សេចក្តីត្រូវការរបស់ប្រជាពលរដ្ឋទៅវិញទេ។ ហើយប្រសិនបើគណបក្សបក្សប្រជាជនរៀបចំយន្តការនេះប្តឹងផ្តល់ជាមួយគណបក្សសង្គ្រោះជាតិមែន អាហ្នឹងយើងឃើញថា បញ្ហានេះជាការខាត់របស់គណបក្សប្រជាជន ក្នុងការដណ្តើមប្រជាប្រិយភាពនិងរងផលប៉ះពាល់កាន់តែធ្ងន់ទៅវិញទេ។ នេះបើតាមទស្សនៈដែលខ្ញុំគិត»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី អះអាងថាទាំងមេឃុំគណបក្សប្រឆាំង ទាំងមេឃុំបក្សកាន់អំណាច លោកថា ពួកគេតែងធ្វើការបម្រើបក្សជាធំដូចគ្នា។ ប៉ុន្តែលោកថា សារនយោបាយថា «ដូរមេឃុំបម្រើបក្ស ដាក់មេឃុំបម្រើរាស្ត្រ» លោកវិភាគថា ហាក់បានជំរុញឲ្យអ្នកនយោបាយ បន្តពង្រឹងប្រសិទ្ធភាពការងារនៅថ្នាក់មូលដ្ឋាន ដើម្បីឆ្លើយតបទៅនឹងបញ្ហារបស់ពលរដ្ឋកាន់តែច្រើន ដើម្បីទាក់ទាញសំឡេងគាំទ្រពេលបោះឆ្នោត។ ប៉ុន្តែលោកវិភាគថា ជាការខាតទៅវិញទេ បើអ្នកនយោបាយណាមិនបានធ្វើការបំពេញតម្រូវការពលរដ្ឋ ហើយបែរជាបង្កើតព្រឹត្តិការណ៏ដើម្បីប្រយោជន៍បក្សខ្លួនឯងនោះ។
លោកថា៖ «នៅពេលដែលពលរដ្ឋចាប់ផ្តើមយល់ដឹងច្រើន ទទួលបានព័ត៌មានគ្រប់គ្រាន់ អ្នកនយោបាយត្រូវតែមានការប្រុងប្រយ័ត្នជាងមុន អាហ្នឹងបានអាចទាក់ទាញទឹកចិត្តនិងបេះដូងគាត់បាន ប៉ុន្តែបើគាត់នូវតែគិតថាពលរដ្ឋមិនដឹងអីទេ ការធ្វើឡើងបែបហ្នឹងដោយសារតែមានអ្នកញុះញង់អីអញ្ចឹងទៅ អាហ្នឹងខ្ញុំគិតថា អ្នកនយោបាយហ្នឹង បានដើរក្រោយពលរដ្ឋមួយជំហានធំហើយ»។
ទោះជាយ៉ាងណាមកដល់ពេលនេះ បក្សប្រឆាំងមិនទាន់ប្រកាសផ្លូវការពីការកែតម្រូវសារនយោបាយនេះតាមការចង់បានរបស់បក្សកាន់អំណាចនៅឡើយទេ។
បើតាមអ្នកវិភាគ ពាក្យដូរមេឃុំបម្រើបក្ស ដាក់មេឃុំបម្រើរាស្ត្រនេះ បានចាក់ចំបេះដូងពលរដ្ឋ ដែលថាពួកគេចង់បានមន្ត្រីជួយដោះស្រាយបញ្ហាពលរដ្ឋ ច្រើនជាងមន្ត្រីធ្វើការបម្រើតែបក្ខពួកនិងគ្រួសារនិយម ហើយថាបើបក្សកាន់អំណាចឈានទៅប្តឹងបក្សប្រឆាំង ពីសារនយោបាយនេះ ពួកគេព្រមានថា បក្សកាន់អណាច និងបន្តធាក់ចុះប្រជាប្រិយភាព ដោយពលរដ្ឋមើលឃើញថា អ្នកដែលចង់ជំរុញឲ្យមន្ត្រីរបស់ខ្លួនបម្រើរាស្ត្រពិតប្រាកដ ត្រូវបានគេចាត់វិធានការច្បាប់ទៅវិញ៕