ក្រុមឧទ្ទាមរដ្ឋអ៊ីស្លាមនៅថ្ងៃនេះបានប្រកាសទទួលខុសត្រូវចំពោះការវាយប្រហារគ្រាប់បែកអត្តឃាតនៅក្នុងប្រទេសប៉ាគីស្ថាន ដែលបានសម្លាប់មនុស្សយ៉ាងតិច៧០នាក់ និងបណ្ដាលឲ្យមនុស្សរាប់រយនាក់រងរបួស កាលពីថ្ងៃចន្ទម្សិលមិញ នៅពេលដែលអ្នកកាន់ទុក្ខជាច្រើននាក់បានជួបជុំគ្នានៅក្នុងមន្ទីរពេទ្យធំមួយក្នុងទីក្រុងហ្គេតតា។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters ដែលបានដកស្រង់ព័ត៌មានពីទីភ្នាក់ងារព័ត៌មាន Amag របស់ក្រុមរដ្ឋអ៊ីស្លាម។
បើតាម Reuters ក្រុមរដ្ឋអ៊ីស្លាមបានប្រកាសថា ជនអត្តឃាតម្នាក់មកពីក្រុមរដ្ឋអ៊ីស្លាមបានចុចគ្រាប់បែកបំផ្ទុះខ្លួនឯងនៅឯកន្លែងជួបជុំរបស់បុគ្គលិកក្រសួងយុត្តិធម៌និងស្ថានីយប៉ូលិសនៅទីក្រុងហ្គេតតា។
ចំណែកក្រុមបះបោរតាលីបង់ប៉ាគីស្ថានក៏បានប្រកាសទទួលខុសត្រូវចំពោះការវាយប្រហារនេះដែរ។
ទីភ្នាក់ងារព័ត៌មាន AFP កាលពីថ្ងៃម្សិលមិញបានផ្សាយថា មនុស្សយ៉ាងតិច៤៥នាក់ត្រូវបានសម្លាប់នៅក្នុងការបំផ្ទុះគ្រាប់បែកនៅឯមន្ទីរពេទ្យនៅទីក្រុងហ្គេតតា ប៉ុន្តែសារព័ត៌មាន BBC របស់អង់គ្លេសបានផ្សាយថា តួលេខអ្នកស្លាប់បានកើនឡើងដល់៧០នាក់ ហើយអ្នករងរបួសមានរហូតដល់ទៅ១២០នាក់៕
