រដ្ឋមន្ត្រីការពារជាតិថ្មីរបស់ជប៉ុនកាលពីថ្ងៃចន្ទម្សិលមិញបានបញ្ជាឲ្យកងទ័ពជប៉ុន ត្រៀមខ្លួនកម្ទេចមីស៊ីលកូរ៉េខាងជើងដែលគំរាមកំហែងដល់ប្រទេសជប៉ុន។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP ដែលបានដកស្រង់ការចុះផ្សាយរបស់ប្រព័ន្ធផ្សព្វផ្សាយជប៉ុន។
ទូរទស្សន៍រដ្ឋជប៉ុន NHK បានផ្សាយថា អ្នកស្រី Tomomi Inada បានចេញបញ្ជាថា ក្រុងព្យុងយ៉ាងកំពុងត្រៀមបាញ់គ្រាប់មីស៊ីល។
កាលពីសប្ដាហ៍មុននាយករដ្ឋមន្ត្រីជប៉ុន លោក ហ្ស៊ិនសូ អាបេ បានជ្រើសរើសអ្នកស្រី Inada ធ្វើជារដ្ឋមន្ត្រីការពារជាតិថ្មី។ អ្នកស្រី Inada គឺជាមនុស្សជិតស្និទ្ធនិងមានទស្សនៈជាតិនិយមដូចលោក អាបេ ផងដែរ។
ទូរទស្សន៍ NHK បានផ្សាយថា អ្នកស្រី Inada រំពឹងថានឹងពិនិត្យឡើងវិញទៅលើបទបញ្ជាត្រៀមខ្លួននៅរៀងរាល់ ៣ខែម្ដង ដើម្បីឲ្យក្រុងតូក្យូអាចរក្សាស្មារតីប្រុងប្រយ័ត្ន។
អ្នកនាំពាក្យក្រសួងការពារជាតិជប៉ុនបានបដិសេធឆ្លើយបំភ្លឺទៅនឹងព័ត៌មាននេះ។
ការតែងតាំងអ្នកស្រីបានកើតឡើងកាលពីថ្ងៃទី៣ ខែសីហា ចំថ្ងៃដែលកូរ៉េខាងជើងបាញ់គ្រាប់មីស៊ីលចូលទៅក្នុងដែនទឹកជប៉ុន ស្ថិតនៅចម្ងាយ២៥០គីឡូម៉ែត្រពីឆ្នេរសមុទ្រ ដែលនោះគឺជាការវាយប្រហារជាលើកដំបូងទៅលើដែនទឹកគ្រប់គ្រងដោយជប៉ុន៕