បន្ទាប់ពីយុទ្ធនាការយ៉ាងស្វិតស្វាញបំផុតនៅក្នុងប្រវត្តិសាស្ត្របោះឆ្នោតអាមេរិក ទីបំផុតទៅបេក្ខជនបក្សសាធារណរដ្ឋ លោក ដូណាល់ ត្រាំ នៅថ្ងៃនេះ បានយកឈ្នះលើអ្នកស្រី ហ៊ីលឡារី គ្លីនតុន ដើម្បីក្លាយទៅជាប្រធានាធិបតីទី ៤៥ របស់សហរដ្ឋអាមេរិក។
លោក ត្រាំ បានទទួលសំឡេងគាំទ្រនៅបណ្ដារដ្ឋធំៗ ដូចជា ផ្លរិដា ខារ៉ូលីណាខាង និងអូហៃយ៉ូ ជាដើម្បី ដើម្បីទទួលបានសំឡេងឆ្នោតលើសពី ២៧០សំឡេងទៅទៀត។
នៅក្នុងសុន្ទរកថាជាប្រវត្តិសាស្ត្ររបស់លោកនៅទីក្រុងញូវយ៉ក លោក ត្រាំ បានប្ដេជ្ញាផ្សះផ្សាជាតិឡើងវិញ បន្ទាប់ពីយុទ្ធនាបោះឆ្នោត។ លោក ត្រាំ ថ្លែងថា៖ “ដល់ពេលរួមគ្នាជាពលរដ្ឋតែមួយ ហើយព្យាបាលរបួសបែកបាក់ឡើងវិញ។ ខ្ញុំសន្យាចំពោះពលរដ្ឋគ្រប់គ្នានៅលើទឹកដីយើងថា ខ្ញុំនឹងក្លាយជាប្រធានាធិបតីសម្រាប់ប្រជាជនអាមេរិកទាំងអស់”។
ប្រធានាធិបតីជាប់ឆ្នោតរូបនេះ ក៏បានកោតសរសើរដល់គូប្រជែងរបស់លោក គឺអ្នកស្រី ហ៊ីលឡារី គ្លីនតុន ចំពោះការបម្រើសាធារណជនជាច្រើន។
លោក ថែ្លងថា៖ “អ្នកស្រី ហ៊ីលឡារី បានប្រឹងប្រែងយ៉ាងយូរ និងយ៉ាងខ្លាំងក្លា ហើយយើងមានសេចក្ដីត្រេកអរយ៉ាងធំចំពោះការបម្រើរបស់អ្នកស្រីចំពោះប្រទេសយើង”៕
