នៅឯសហគមន៍អឺរ៉ុបឯណោះវិញ តើមានអ្វីកើតឡើងបន្ទាប់ពីលោក ត្រាំ ឈ្នះការបោះឆ្នោតជាប្រធានាធិបតីថ្មីរបស់អាមេរិក? ប្រធានគណៈកម្មការសហភាពអឺរ៉ុប បានថ្លែងថា អឺរ៉ុបត្រូវតែទទួលខុសត្រូវចំពោះការធ្វើទំនាក់ទំនងជាមួយនឹងរុស្ស៊ី ទ្វីបអាហ្វ្រិក និងតំបន់មជ្ឈឹមបូព៌ា សម្រាប់ “គោលនយោបាយភាពជាអ្នកជិតខាង”របស់ខ្លួន បន្ទាប់ពី លោក ត្រាំ ត្រូវបានជ្រើសរើសជាប្រធានាធិបតីអាមេរិក។
លោក ចូហានណេស ហាន បានសរសេរនៅលើ Twitter ថា អឺរ៉ុបត្រូវតែរែងពុនចំណែកនៃការទទួលខុសត្រូវអន្តរជាតិដោយខ្លួនឯង ជាពិសេសជាមួយបណ្ដាប្រទេសជិតខាង ប៉ុន្តែ លោកថា អាមេរិក និងអឺរ៉ុប កាន់តែខ្លាំងបំផុតនៅពេលធ្វើការរួមគ្នា។
នៅអំឡុងយុទ្ធនាការឃោសនាបោះឆ្នោតរបស់លោក លោក ត្រាំ បានសន្យាផ្លាស់ប្ដូរគោលនយោបាយអាមេរិក ដោយបានកោតសរសើរប្រធានាធិបតីរុស្ស៊ី លោក វ៉្លាឌីមៀរ ពូទីន និងចោទសួរចំពោះការចំណាយរបស់កងទ័ពអាមេរិក និងការសន្យាដទៃទៀតនៅអឺរ៉ុប។
សហភាពអឺរ៉ុបប្រឈមមុខនឹងទង្វើកាន់តែគឃ្លើនរបស់រុស្ស៊ីនៅតំបន់ភាគខាងកើត ជម្លោះនៅមជ្ឈឹមបូព៌ា រហូតដល់ភាគខាងត្បូង និងកំណើននៃការគំរាមកំហែងពីពួកបះបោរអ៊ីស្លាម៕
