បន្ទាប់ពីលោក ត្រាំ ឈ្នះការបោះឆ្នោត នាយករដ្ឋមន្ត្រីអង់គ្លេស អ្នកស្រី ថេរ៉េសា ម៉េយ៍ បានថ្លែងអបអរសាទរដល់ជ័យជម្នះនេះ ដោយអ្នកស្រីថា អង់គ្លេស និងសហរដ្ឋអាមេរិក នឹងនៅតែជាដៃគូជិតស្និទ្ធ និងរឹងមាំ ខាងពាណិជ្ជកម្ម សន្តិសុខ និងយោធា។
អ្នកស្រី ម៉េយ៍ ថ្លែងក្នុងលិខិតមួយថា អ្នកស្រីសូមអបអរសាទរដល់លោក ដូណាល់ ត្រាំ ដែលត្រូវបានជ្រើសរើសធ្វើជាប្រធានាធិបតីថ្មីរបស់អាមេរិក បន្ទាប់ពីយុទ្ធនាការដ៏ស្វិតស្វាញ។
អ្នកស្រីបន្តថា ចក្រភពអង់គ្លេស និងសហរដ្ឋអាមេរិក មានទំនាក់ទំនងចាស់ទុំ និងពិសេសនឹងគ្នា ដោយផ្អែកលើតម្លៃនៃសេរីភាព ប្រជាធិបតេយ្យ និងគំនិតផ្ដួចផ្ដើម។ អ្នកស្រីថា ប្រទេសទាំងពីរនឹងនៅតែជាដៃគូដ៏រឹងមាំ និងជិតស្និទ្ធខាងពាណិជ្ជកម្ម សន្តិសុខ និងយោធា៕
