សភាកូរ៉េខាងត្បូងនៅថ្ងៃសុក្រនេះ បានបោះឆ្នោតគាំទ្រការដកអំណាចចេញពីលោកស្រី ប៉ាក ឃឿនហេ ទាក់ទងនឹងអំពើពុករលួយ រឿងអាស្រូវនយោបាយ ដែលនាំឲ្យមានការស្តីបន្ទោសខ្លាំងលើរដ្ឋាភិបាលរបស់លោកស្រី ហើយពលរដ្ឋរាប់សែនផ្ទុះការតវ៉ានៅតាមផ្លូវ។
សភាជាតិបានបោះឆ្នោតផ្ទេរអំណាចរបស់លោកស្រី ប៉ាក ទៅឲ្យនាយករដ្ឋមន្ត្រីជាអ្នកសម្រេចការងារជាតិវិញ ហើយរុញការសម្រេចនេះទុកឲ្យតុលាការធម្មនុញ្ញសម្រេចលើករណីនេះថា ត្រឹមត្រូវឬអត់ចំពោះការដកអំណាចរបស់លោកស្រី ប៉ាក ឃឿនហេ។ នេះបើតាមភ្នាក់ងារសារព័ត៌មានរ៉យទ័រ។
ក្នុងអំឡុងពេលនេះ លោកស្រី ប៉ាក ឃឿនហេ នៅតែមានតួនាទីជាប្រធានាធិបតីរយៈពេល៦ខែទៀត ខណៈប្រទេសកំពុងមានភាពមិនច្បាស់លាស់ក្នុងការរៀបចំនយោបាយផ្ទៃក្នុង។
ការអនុម័តរបស់សភាក្នុងការដកអំណាចរបស់លោកស្រី ប៉ាក ឃឿនហេ នៅថ្ងៃនេះ ធ្វើឡើងក្នុងសំឡេង ២ភាគ៣ ក្នុងចំណោមអាសនៈសរុបចំនួន៣០០។
អ្នកនាំពាក្យរដ្ឋសភាលោក Chung Se-Kyun ថ្លែងថាសភាបានសម្រេចអនុម័តដកអំណាចលោកស្រី ប៉ាក ឃឿនហេ ហើយ។ លោកបញ្ជាក់ថា ទោះអ្នកណាគាំទ្រឬប្រឆាំងក៏ដោយ គឺគ្រប់តំណាងរាស្ត្រនិងប្រជាពលរដ្ឋកូរ៉េទាំងអស់អាចមើលឃើញស្ថានភាពនេះទាំងអស់គ្នា គឺមានកំហុសធ្ងន់ធ្ងរនិងប៉ះពាល់ខ្លាំង៕
