រាជរដ្ឋាភិបាលកម្ពុជាបានបញ្ជាឲ្យមន្រ្តីគ្រប់ជាន់ថ្នាក់ធ្វើជាគំរូក្នុងការគោរពច្បាប់ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍ដែលបណ្ដាលឲ្យរបួស បាត់បង់ជីវិត និងខូចខាតទ្រព្យសម្បត្តិ។
ក្រសួងមហាផ្ទៃបានចេញនូវបទបញ្ជាផ្ទៃក្នុងមួយចុះថ្ងៃទី ០៨ ខែ ធ្នូម្សិលមិញ ស្ដីពីការជំរុញការអនុវត្តច្បាប់ស្ដីពីចរាចរណ៍ផ្លូវគោក ដោយក្រសួងមហាផ្ទៃលើកឡើងថា ដើម្បីរួមចំណែកទប់ស្កាត់ និងកាត់បន្ថយការបាត់បង់ជីវិត រងរបួស និង ខូចខាតទ្រព្យសម្បត្តិ ដែលជាបញ្ហាប្រឈមចំពោះមុខ និងយូរអង្វែង។
ក្នុងបទបញ្ជាផ្ទៃក្នុងនេះក្រសួងមហាផ្ទៃបានបញ្ជាឲ្យមន្រ្តីរាជការ ក្រោមឱវាទទាំងអស់ ត្រូវធ្វើជាគំរូក្នុងការគោរពប្រតិបត្តិច្បាប់ស្ដីពីចរាចរណ៍ផ្លូវគោកតាមរយៈការអនុវត្តអនុវត្តឲ្យបាននូវប្រការដែលដាក់ចេញចំនួន ១២ ដូចជា ការពាក់មួកសុវត្ថិភាពជានិច្ចទាំងអ្នកបើក និងអ្នករួមដំណើរតាមម៉ូតូ និង ត្រូវពាក់ខ្សែក្រវ៉ាត់សុវត្ថិភាពជានិច្ចទាំងអ្នកបើកបរ និងអ្នករួមដំណើរខាងមុខតាមរយៈរថយន្តជាដើម។
ជាមួយគ្នានោះដែរក្រសួងក៏បញ្ជាឲ្យមន្រ្តីទាំងអស់ត្រួតពិនិត្យលក្ខណៈបច្ចេកទេសយានយន្តជានិច្ច ត្រូវមានបណ្ណសម្គាល់ និងផ្លាកលេខបំពាក់យានយន្ត មានបណ្ណបើកបរ និងបើកបរគោរពសិទ្ធិអាទិភាព គោរពភ្លើង ឬសញ្ញាចរាចរណ៍ និងបើកបរប្រកាន់ស្ដាំជានិច្ច។
ក្នុងបទបញ្ជាផ្ទៃក្នុងក្រសួងមិនអនុញាតឲ្យមន្រ្តីរាជការផ្ទុកអ្នកដំណើរឬ ទំនិញលើសច្បាប់កំណត់ ហាមបើកបរលើសល្បឿនកំណត់ មិនត្រូវបើកបរក្រោមឥទ្ធិពលគ្រឿងស្រវឹង មិនបត់ឬជែងគ្នាដោយប្រថុយប្រថាន មិនបើកក្នុងស្ថានភាពងងុយ ត្រូវបើកដោយប្រុងប្រយត្ន មានការយោគយល់អធ្យាស្រ័យ និង ជួយផ្សព្វផ្សាយអប់រំបន្តដល់សមាជិកគ្រួសារ មិត្តភក្តិ ឲ្យចូលរួមគោរពច្បាប់ចរាចរណ៍។
ដើម្បីពង្រឹងការអនុវត្តក្រសួងមហាផ្ទៃក៏ជំរុញឲ្យថ្នាក់ដឹកនាំគ្រប់អង្គភាព ក្រោមឱវាទក្រសួងមហាផ្ទៃ ចាត់ធ្វើការត្រួតពិនិត្យជាប្រចាំថ្ងៃ នៅគ្រប់គោលដៅច្រកចេញចូលក្រសួង ឬអង្គភាព អំពីសកម្មភាពអនុវត្តរបស់មន្រ្តីគ្រប់រូបនូវការពាក់បួកសុវត្ថិភាព ការដាក់ខ្សែក្រវ៉ាត់សុវត្ថិភាព និងការបំពាក់ផ្លាកលេខ ដើម្បីមានវិធានការអប់រំជាក់ស្ដែង និង ជូនដំណឹងជាបន្ទាន់ទៅសាម៉ីអង្គភាពក្នុងករណីល្មើសមិនរាងចាល ដើម្បីចាត់វិធានការរដ្ឋបាល៕
