លោកនាយករដ្ឋមន្ត្រី ហ៊ុន សែន បានបន្តឌឺដងឲ្យបក្សប្រឆាំង ខណៈលោកបង្ហើបថានៅកៀកថ្ងៃបោះឆ្នោតខាងមុខនេះ ប្រាក់ខែគ្រូបង្រៀននឹងត្រូវតម្លើងជាង១០ម៉ឺនរៀលបន្ថែមទៀត។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នឹងត្រូវធ្វើឡើងនៅថ្ងៃទី៤ ខែមិថុនា ឆ្នាំ២០១៧ ពោលគឺនៅសល់តែជាង៤ខែទៀតប៉ុណ្ណោះ។
ពេលចុះជួបគ្រូបង្រៀនមួយចំនួន នៅខេត្តព្រៃវែង ព្រឹកថ្ងៃទី១០ កុម្ភៈនេះ លោក ហ៊ុន សែន បង្ហើបថានៅខែមេសាខាងមុខ ប្រាក់ខែគ្រូបង្រៀនកម្រិតទាបបំផុត នឹងត្រូវតម្លើង១៥ម៉ឺនរៀលបន្ថែមទៀត ពោលគឺតម្លើងពីជាង៨០ម៉ឺនទៅ៩៥ម៉ឺនរៀល។
លោក ហ៊ុន សែន បន្តបែបឌឺដងថា ប្រាក់ខែដែលរដ្ឋាភិបាលតម្លើងរយៈពេល២ខែខាងមុខទៀតនេះ លោកថា ជាលុយពិតនិងបានរំឭកគ្រូបង្រៀនថា ប្រយ័ត្នចាញ់បោកអ្នកមកសន្យាខ្យល់។
លោកថា៖ «កាលពីមុន វា៨០ម៉ឺន៥០០រយ(៨០០៥០០រ) ដល់ទៅខែ៤(មេសា)នេះឡើងដល់៩៥ម៉ឺនទាបបំផុត។អានេះលុយមែនទែន មិនមែនលុយខ្យល់ទេ។ បន្តិចទៀតគេមកសន្យាលើហ្នឹងហើយ តិចទៅតាមគេឡប់។ខ្ញុំជឿថាមិនតាមទេ ព្រោះអ្នកសន្យា គេពួកែណាស់មិនចេះអស់ខ្សល់ទេ»។
បើទោះបីជាលោក ហ៊ុន សែន សំណេះសំណាលជាមួយគ្រូបង្រៀនពេលនេះ មិនបញ្ចេញឈ្មោះអ្នកដែលលោកឌឺដងក៏ដោយ ក៏ប៉ុន្តែកាលពីអាណត្តិមុន គណបក្សសង្គ្រោះជាតិបានសន្យាថា បើខ្លួនឈ្នះការបោះឆ្នោត បានឡើងកាន់អំណាច នឹងតម្លើងប្រាក់ខែដល់មន្ត្រីរាជការ ទាបបំផុតឲ្យបានដល់១លានរៀលឬស្មើនឹង២៥០ដុល្លារ ។
មន្ត្រីជាន់ខ្ពស់របស់គណបក្សសង្គ្រោះជាតិ លោក សុន ឆ័យ លើកឡើងថាគណបក្សប្រឆាំងស្វាគមន៍ទៅនឹងរាជរដ្ឋាភិបាលដែលបានប្រឹងប្រែងតម្លើងប្រាក់ខែដល់មន្ត្រីរាជការនិងកងកម្លាំងប្រដាប់អាវុធនេះ។ ប៉ុន្តែហាក់បានឌីដងវិញថា តាមរយៈនយោបាយខ្យល់នេះ អាចនឹងជំរុញឲ្យរដ្ឋាភិបាលប្រឹងប្រែងបន្ថែមទៀត ពីការដោះស្រាយបញ្ហារបស់មន្ត្រីរាជការ។
លោកថា៖ «អញ្ចឹងយើងសង្ឃឹមថានយោបាយនេះ នឹងនៅតែជាខ្យល់មួយមានប្រសិទ្ធភាព ខ្យល់នេះនឹងនាំឲ្យគណបក្សទាំងអស់គិតពីជីវភាពរបស់ពលរដ្ឋរបស់ខ្លួន ហើយនឹងធ្វើម៉េចឲ្យពួកគាត់រស់នៅបានសមរម្យថ្លៃថ្នូរ ។ ហើយបើគណបក្សប្រជាជនអាចបង្កើតបានលើសពី១លានឬ១លាន៥សែនអី វារឹតតែប្រសើ។ ព្រោះអ្វីជាគោលនយោបាយយើង យើងបានប្រកាសតាំង២០១៣ ឥឡូវជិត៥ឆ្នាំហើយ វាអាចត្រូវឡើយលើសពីនោះ ដូចនេះបើរាជរដ្ឋាភិបាលឬគណបក្សដឹកនាំប្រទេសអាចតម្លើងដល់១លាន៥សែន យើងអបអរសាទរ»។
ប្រធានស្តីទីសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី លើកឡើងថា ចំនួនទឹកប្រាក់ដែលលោក ហ៊ុន សែន ប្រកាសតម្លើងពេលនេះ លោកស្រីថាគ្រាន់តែជាការជួយដោះបន្ទុកមួយផ្នែកដល់គ្រូបង្រៀនប៉ុណ្ណោះ ។ លោកស្រីថា ការតម្លើងនេះមិនទាន់ធានាបានពីជីវភាពរស់នៅសមរម្យរបស់លោកគ្រូ អ្នកគ្រូនៅឡើយទេ ដោយថា បើប្រៀបធៀបនឹងតម្លៃទំនិញនៅលើទីផ្សារ។
លោកស្រី អ៊ុក ឆាយ៉ាវី បន្តថាប្រាក់ខែឡើងដល់២លានរៀល ទើបអាចធ្វើឲ្យលោកគ្រូអ្នកគ្រូដែលមានសមាជិកគ្រូសារច្រើន រស់នៅបានសមរម្យបាន។
មន្ត្រីសង្គមស៊ីវិលរូបនោះជំរុញឲ្យរដ្ឋាភិបាលយកចិត្តទុកដាក់បន្ថែមទៀត ទៅលើជីវភាពលោកគ្រូបង្រៀន ទាំងអ្នកកំពុងបំពេញការងារ និងអ្នកដែលបានចូលនិវត្តន៍ ដោយថាពួកគេទាំងនោះកំពុងប្រឈមនឹងជីវភាពរស់នៅ ដោយសារតែទទួលបានប្រាក់ឧបត្ថម្ភតិចតួចពីរដ្ឋាភិបាល។
លោកស្រីថា៖ «ក្នុងនាមគាត់ជាបញ្ញវន្ត គួរតែមានការលើកកម្ពស់ ហើយនឹងតម្លើងប្រាក់បៀវត្សដល់លោកគ្រូអ្នកគ្រូដែលចូលនិវត្តនោះ កាន់តែឲ្យគាត់រស់នៅសមរម្យផង ហើយនឹងយើងយកចិត្តទុកដាក់ចំពោះលោកគ្រូអ្នកគ្រូដែលកំពុងតែបម្រើការហ្នឹងធ្វើម៉េចឲ្យប្រាក់បៀវត្សរបស់គាត់ហ្នឹងសាកសមនិងទំនិញទីផ្សារសព្វថ្ងៃនេះ»។
បើតាមសមាគមគ្រូបង្រៀន បច្ចុប្បន្នមានជិត១២ម៉ឺននាក់ ពួកគេទទួលបានប្រាក់ខែសរុប ទាំងរបបកូន ប្រពន្ធ និងអត្ថប្រយោជន៍ផ្សេងទៀត ច្រើនបំផុតសម្រាប់គ្រូនៅមហាវិទ្យាល័យ បានជាង១លានរៀល និងកម្រិតទាបបំផុត នៅវិទ្យាល័យបានជាង៨០ម៉ឺនរៀល។
ចំនួនប្រាក់ខែដែលគ្រូទទួលបាននេះ សមាគមថាជាកម្រិតទាបនៅឡើយ ធ្វើឲ្យជីវភាពពួកគេជាថ្នាលបណ្តុះធនធានមនុស្សដ៏សំខាន់មួយនេះ រស់នៅក្នុងស្ថានភាពលំបាកនៅឡើយ៕