តុលាការធម្មនុញ្ញរបស់កូរ៉េខាងត្បូងជាតុលាការខ្ពស់បំផុតបានសម្រេចនៅថ្ងៃសុក្រនេះ ដកលោកស្រី ប៉ាក ឃៀនហេ ពីតំណែងប្រធានាធិបតី ដោយចោទថាបានជាប់ពាក់ព័ន្ធរឿងអាស្រូវនយោបាយ។
ក្រោយការសម្រេចនេះ កូរ៉េខាងត្បូងនឹងរៀបចំការបោះឆ្នោតជ្រើសរើសប្រធានាធិបតីថ្មី នៅខែឧសភាខាងមុខ គឺក្រោយ៦០ថ្ងៃនៃការដកប្រធានាធិបតីពីតំណែង។
លោកស្រី ប៉ាក អាយុ៦៥ឆ្នាំ ត្រូវបានសភាបោះឆ្នោតដកតំណែងកាលពីខែធ្នូចុងឆ្នាំ២០១៦ ដោយចោទថា មានរឿងអាស្រូវ ពុករលួយ និង រំលោភអំណាចរដ្ឋ បន្ទាប់ពីការចោទមិត្តភ័ក្ររបស់លោកស្រី គឺលោកស្រី ឈ័រ ស៊ូនស៊ីលថា ដាក់សម្ពាធដល់អ្នកធ្វើជំនួញធំប្រើរូបភាពប្រធានាធិបតី ឲ្យបង់ប្រាក់វិភាគទានចូលមូលនិធិសប្បុរសធម៌ និងគាំទ្រសកម្មភាពនយោបាយ។
ការបោះឆ្នោតគាំទ្រសេចក្តីសម្រេចរបស់សភានេះគឺធ្វើឡើងក្នុងសំឡេងចៅក្រម៦ ក្នុងចំណោម៨សំឡេង។ លោកស្រី ប៉ាក ឃៀនហេ ចាប់តាំងពីសភាបោះឆ្នោតដកតំណែងមក គឺតំណែងប្រធានាធិបតីមានតែឈ្មោះប៉ុណ្ណោះ ចំណែកអំណាចសម្រេចលើកិច្ចការរដ្ឋមិនមានទេ។
ទោះយ៉ាងណា លោកស្រី ប៉ាក ឃឿន ហេ និង លោកស្រី ឈ័រ នៅតែបញ្ជាក់ថា ពួកគេមិនបានប្រព្រឹត្តខុសដូចការចោទប្រកាន់នោះទេ។
ក្នុងដំណើរការនៃការប្រកាសសេចក្តីសម្រេចរបស់តុកាលារធម្មនុញ្ញនេះ ប្រជាពលរដ្ឋរាប់ម៉ឺននាក់ទាំងគាំទ្រ និង ប្រឆាំងលោកស្រី ប៉ាក បានចេញដើរតវ៉ាលើផ្លូវ។
ក្នុងករណីនេះ ក៏បានប៉ះពាល់ខ្លាំងដល់ ក្រុមហ៊ុនផលិតគ្រឿងអេឡិចត្រូនិចធំមួយរបស់កូរ៉េខាងត្បូងគឺក្រុមហ៊ុនSamsung កំពុងជួបបញ្ហាដោយសារប្រធានប្រតិបត្តិសំខាន់៤នាក់ក៏ត្រូវបានតុលាការចាត់ការដែរ។
លោកស្រី ប៉ាក ឃឿនហេ គឺជា កូនស្រីលោក ប៉ាកជុងហ៊ី អតីតមេដឹកនាំផ្តាច់ការនៅកូរ៉េខាងត្បូង។ លោកស្រីគឺជា ស្ត្រីទី១ដែលជាប់ឆ្នោតជា មេដឹកនាំកូរ៉េខាងត្បូង ឡើងកាន់តំណែងតាមការបោះឆ្នោតកាលពីឆ្នាំ២០១២៕